ރައީސް އެދިވަޑައިގަތީ މުހައްމަދު އަބްދުﷲއާއި މުއާޒު ބްރޯޑްކޯމްއަށް އައްޔަނުކޮށްދިނުމަށް

މޯލްޑިވްސް ބްރޮޑްކާސްޓިން ކޮމިޝަންގެ ހުސްވެފައިވާ ދެ މެންބަރު ކަމުގެ މަގާމަށް، ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުހައްމަދު އަބްދުﷲ (މުހަންމާ) އާއި، ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ތަރުޖަމާނުކަން ކުރެއްވި އިބްރާހީމް މުއާޒު އަލީ އައްޔަނުކުރެއްވުމަށް ރައީސް ޑރ. މުހައްމަދު މުއިއްޒު އެދިވަޑައިގެންފިއެވެ.

ބްރޯޑްކޯމްގެ ދެ މަގާމު ހުސްވެފައި ވަނީ އެ ކޮމިޝަންގެ ރައީސާއަކަށް ހުންނެވި މަރިޔަމް ވަހީދާއާއި އެ ކޮމިޝަންގެ މެންބަރު އަލީ ޔޫސުފްގެ ދައުރު މިމަހުގެ ފަހަކަށް ހަމަވެފައިވުމާ ގުޅިގެންނެވެ.

އެ ދެ މަގާމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލި ބޭފުޅުންގެ ތެރެއިން ޝަރުތު ހަމަވާ ބޭފުޅުން، ރައީސް މުއިއްޒު އިސްކަން ދެއްވާ ތަރުތީބުން ވަނީ މިއަދު ރައްޔިތުންގެ މަޖިލީހަށް ހުށަހަޅުއްވާފައެވެ. އެ ތަރުތީބަކީ:

• މުހައްމަދު އަބްދުﷲ (މުހަންމާ)، ހއ. އިހަވަންދޫ، ހުސްއަކުރުގެ

• އިބްރާހިމް މުއާޒު އަލީ، ހަޒާރުމާގެ، ނ. ފޮއްދޫ

• އިބްރާހިމް އަޝްރަފު، ވ. މަށިވެލި

• ލެފްޓިނެންޓް ކާނަލް ރިޓަޔާޑް ޒުބައިރު އަހުމަދު މަނިކު، ގ. މަލްވިނަ

• އަބްދުﷲ ހުމައިދު، ފަޒާ، ޅ. ހިންނަވަރު

• އައިޝަތު ދިޔާނާ ތޯހިރު، ސެވަންސްޓާ، ސ. ހިތަދޫ

• އައިމިނަތު ސަރާހަތު އިއްޒަތު، ގ. ގޮފި

• ޝިމްލާ އަމްހަދު، އާސްޓްރަލްގެ، ސި. ހިތަދޫ

• އިސްމާއިލް ޝަފީގް، މ. ސްލީޓް

• ޝިފްޒާ މުސްތަފާ، މާދަޑު، ޏ. ފުވައްމުލަކު

• އަލީ ނިޝާން، ގ ކޫލްގްރާސް

• މުހައްމަދު ޝަމީމް، ހ. ޕްރިޓީވިލާ

އެ ދެ މަގާމަށް ޝަރުތުހަމަވާ 12 ބޭފުޅުން ތިއްބަވާއިރު، މަގާމަށް މީހުން އައްޔަންކުރަން އިންޓަވިއުކުރުމުގެ މަސައްކަތް ކުރަނީ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީންނެވެ.

ފާހަގަކޮށްލެވޭ ގޮތުގައި ރައީސް އޮފީހުގެ ތަރުޖަމާނެއްގެ ގޮތުގައި މަސައްކަތްކުރުމުގެ ކުރިން މުއާޒު މަސައްކަތް ކުރެއްވީ ދައުލަތުގެ މީޑިއާގައެވެ. ރައީސް ޔާމީންގެ ވެރިކަން ނިމުމުން، އޭނާ ވަނީ ކުރީގެ ނާއިބު ރައީސް އަހްމަދު އަދީބު އިސްކޮށް ހުންނަވާ އުފެއްދެވި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)އަށް ސޮއިކުރައްވައިފައެވެ. އަދި އެ ޕާޓީގެ ނައިބު ރައީސްގެ މަގާމު ވެސް ފުރުއްވިއެވެ.

އެހެން ނަަމަވެސް، މި ފަހުން ސިޔާސީ ހަރަކާތްތަކުން އޭނާ މާ ގިނައިން ފެނިފައެެއް ނުވެއެވެ. އޭގެ ފަހުން 2023ގައި އޮތް ރިޔާސީ އިންތިޚާބާ ދިމާކޮށް އޭނާ ވަނީ އެމްޑީޕީއަށް ސޮއިކުރައްވާފައެވެ.

މުހަންމާ އަކީ ފިލްމީ ދާއިރާއިން މީހުންގެ މެދުގައި މަގުބޫލުކަން ހޯދި ބޭފުޅެކެވެ. އޭނާ ފަހުން އޭނާ ވަނީ ސިޔާސީ ދާއިރާގައި ހަރަކާތްތެރި ވެފައެވެ. އެގޮތުން ރައީސް ޔާމީންގެ ދައުރުގައި މަޖިލީހުގައި އިހަވަންދޫ ދާއިރާގެ މެންބަރުކަން އޭނާ ވަނީ ކުރައްވާފައެވެ.

މުހަންމާ ވަނީ މިހިނގާ 20ވަނަ ރައްޔިތުންގެ މަޖިލީހުގެ އިންތިޚާބުގައި ކުރިމަތިލުމަށް ޕީއެންސީގެ އިހަވަންދޫ ދާއިރާގެ ޕްރައިމަރީގައި ވާދަކުރައްވާފައެވެ. ނަމަވެސް އެ އިންތިޚާބުން އޭނާ ވަނީ ނާކާމިޔާބާ ކުރިމަތިލާންޖެހިފައެވެ.