މާލޭ ލޮނުޒިޔާރާތްމަގުގައި ހުންނަ "އިހުސާނު" ފިހާރައިން 500 ގްރާމުގެ ނެސްކެފޭ ކްލެސިކް ޕެކެޓެއް ވަގަށް ނެގި މީހަކު 27 ދުވަހަށް ޖަލަށްލާން މިދިޔަ ހޯމަ ދުވަހު ކްރިމިނަލް ކޯޓުން ހުކުމްކޮށްފިއެވެ.
ކްރިމިނަލް ކޯޓުގެ ހުކުމުގައިވަނީ ޞަފްވާން ޒުފްރަތު ނަމަކަށް ކިޔާ މި މީހާ އިހުސާނު ފިހާރައަށް ވަނީ މިދިޔަ އަހަރުގެ ޖުލައި މަހުގެ ދެވަނަ ދުވަހު ހެނދުނު 07:13 ގައި ކަމަށެވެ. އަދި, 500 ގްރާމުގެ ނެސްކެފޭ ކްލެސިކް ޕެކެޓެއް ނަގައި، ލައިގެން ހުރި ޖިންސުގެ އެތެރެއަށް ލައިގެން ދާން އުޅުން ކަމަށް ހުކުމުގައިވެއެވެ.
މި މައްސަލައިގައި އޭނާގެ މައްޗަށް ދައުވާ އުފުލާފައިވަނީ، އެހެން މީހެއްގެ މުދަލެއްގެ މައްޗަށް ހުއްދަނޫންގޮތެއްގައި ބާރު ހިންގަން އުޅުމުގެ ކުށުގެ ދައުވާއެވެ.
މި ދައުވާއަށް ޞަފްވާން ޒުފްރަތު ވަނީ އިއުތިރާފުވެފައެވެ. މިއީ އެއްވެސް މީހެއްގެ މަޖުބޫރުކަމެއް، ނުފޫޒެއް ނެތި އަމިއްލަ އިޚުތިޔާރުގައި ކުރި ކަމެއް ކަމަށް އޭނާ ބުނެފައިވެއެވެ.
މި ދައުވާއަށް އޭނާ އިއުތިރާފުވުމުން އޭނާގެ މައްޗަށް ޝައްކެއް ނެތް މިންވަރަށް ކުށް ސާބިތުވާކަމަށް ޝަރީއަތުން ކަނޑައެޅިއެވެ. މި ކުށަށް ކަނޑައެޅިފައިވާ އަސާސީ އަދަބަކީ އެއް އަހަރާ ހަ މަސް ދުވަހު މުއްދަތަށް ޖަލަށްލުންކަން ފާހަގަކުރިއެވެ.
ޞަފްވާން ޒުފްރަތުގެ މައްޗަށް ކަނޑައެޅޭ އަސާސީ އަދަބު މަތިކުރާނެ ހާލަތެއް ނެތްކަން ވެސް ޝަރީއަތުން ފާހަގަކުރިއެވެ. އޭނާ ދައުވާއަށް އިއުތިރާފުވުމުން އޭނާގެ އަދަބު 27 ދުވަހަށް މަދު ކޮށްދޭން ނިންމިއެވެ.
އެހެންކަމުން އޭނާގެ މައްޗަށް ހުކުމް ކުރީ 27 ދުވަހަށް ޖަލަށް ލުމަށެވެ.