ބިޒްނަސް ސެންޓާ ކޯޕަރޭޝަނުންދޭ ހުރިހާ ޚިދުމަތްތަކެއް ޑިޖިޓަލައިޒްކޮށް އެއް މަންސައަކުން ފޯރުކޮށްދިނުމަށް ޚާއްޞަ 'ކުމެވި ޕޯޓަލް'ގެ ނަމުގައި އިފުތިތާޙުކޮށްފިއެވެ.
ކުމެވި ޕޯޓަލް އިފުތިތާޙުކުރީ މި މަހުގެ 10 ވަނަ ދުވަހު ބީސީސީގައި ބޭއްވުނު ރަސްމިއްޔާތެއްގައެވެ. މި ޕޯޓަލް އިފުތިތާޙުކޮށްފައިވަނީ ބީސީސީގެ ފޭސްބުކް ޕޭޖު މެދުވެރިކޮށް ސުމޭކުކޮށެވެ.
ބީސީސީން ބުނީ، މި ޕޯޓަލްގެ މަޤުސަދަކީ ކުދި އަދި މެދުފަންތީގެ ވިޔަފާރިތަކަށް ފަސޭހަކޮށްދިނުން ކަމަށެވެ. މި އިފުތިތާޙުކުރި ޕޯޓަލްއަކީ ޔޫއެންޑީޕީއާއި ޖަޕާން ސަރުކާރުގެ އެހީތެރިކަމާ އެކު ކުރި މަސައްކަތެކެވެ.
ބީސީސީން ދެމުން އަންނަ ޚިދުމަތްތައް ކަމަށްވާ އޮތެންޓިކް މޯލްޑިވްސް، ސީޑް ބައި ބީސީސީ، ވިޔަފާރި ކޮންސަލްޓެންސީގެ ޚިދުމަތް، މަހަ ޕޯޓަލް، އަދި ކްރިއޭޓިވް އިކޮނޮމީ ފަންޑާއި އަމިއްލަ މަސައްކަތް ކުރައްވާ ފަރާތްތަކުގެ ދަފުތަރުގައި ހިމެނުމުގެ ފުރުޞަތު ވެސް މި ޕޯޓަލް މެދުވެރިކޮށް ލިބޭނެއެވެ.
ކުމެވި ޕޯޓަލުން ލިބޭ ޚިދުމަތްތައް:
- އޮތެންޓިކް މޯލްޑިވްސްގެ ސަޕްލަޔަރަކަށް ވާން އެދޭ ފަރާތްތަކަށް އެ ކަމަށް އެދި ހުށަހެޅުމުގެ ޚިދުމަތް
- ސީޑް ބައި ބީސީސީންދޭ ޚިދުމަތްތައް ކަމަށްވާ މަސައްކަތު ޖާގަތައް ހޯދުމަށް އެދި ހުށަހެޅުމުގެ ޚިދުމަތް
- ވިޔަފާރިއެއް ފަށަން ނުވަތަ ވިޔަފާރިއާ ބެހޭ ކަންކަމުގައި ތަޖުރިބާކާރުންގެ ޚިޔާލާއި މަޝްވަރާ ހޯދުމުގެ ޚިދުމަތް
- ކޮންސަލްޓެންސީގެ ޚިދުމަތަށް އެދި ހުށަހެޅުމުގެ ފުރުސަތު
- މަސްވެރި އުފެއްދުންތައް ވިއްކުމަށް ޚާއްޞަ މަހަ ޕޯޓަލްގެ ޚިދުމަތް
- އަމިއްލަ މަސައްކަތްކުރައްވާ ފަރާތްތަކުގެ ދަފުތަރުގައި ހިމެނުމުގެ ޚިދުމަތް
- ބީސީސީން ފެށި ކްރިއޭޓިވް އިކޮނޮމީ ފަންޑު ހޯދުމުގެ ޚިދުމަތް
މީގެ ކުރިން މި ޚިދުމަތްތަކަކީ ބީސީސީގެ ވެބްސައިޓުގައި ހިމެނިފައިވާ ވަކިވަކި ޚިދުމަތްތަކެކެވެ. ނަމަވެސް، ކުމެވި ޕޯޓަލާ އެކު އީފާސް މެދުވެރިކޮށް ލޮގްއިން ވެގެން އެ ހުރިހާ ޚިދުމަތެއް ވެސް އެއް މަންސައަކުން ލިބޭނެ މަގު މިހާރު މިވަނީ ފަހިކޮށްދީފައެވެ.