މަސްތުވާތަކެތި ބޭނުންކުރުމުގެ ތުހުމަތުގައި ހިފެހެއްޓުމުން އޭނާ ހުއްދަ ނެތް ތަނަކަށް ވަނީ ނިދަން ކަމަށާއި މަސްތުވާތަކެތި ބޭނުންކުރަން ނޫންކަމަށް މުއްދަތުގެ މަޖިލީހުގައި މީހަކު ބުނެފިއެވެ.
މަސްތުވާތަކެތި ބޭނުންކުރުމުގެ ތުހުމަތުގައި ފުލުހުން ހައްޔަރުކުރީ ހ. ކްރިސްޓަލްލޭންޑް ހުސައިން އައްޒާމެވެ. މީނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާ ބުނީ ހައްޔަރުކުރީ ތަނަކަށް ނިދަން ވަދެ އޮއްވާ ކަމަށެވެ. ނަމަވެސް އޭނާ ހައްޔަރުކުރީ ކޮންތާކުން ކަމެއް ކޯޓު އަމުރުން ސާފެއް ނުވެއެވެ.
ކޯޓު އަމުރުން އެނގޭގޮތުގައި މި މައްސަލައިގައި އެކަށީގެންވާ މިންވަރަށް ހެކި ހުށަހަޅާފައި ވެއެވެ. އަދި ސީނަށް ދިޔަ ފުލުހުންގެ ބަޔާން ވެސް ހުށަހަޅާފައި ވެއެވެ.
މީނާއަކީ މަސްތުވާތަކެއްޗަށް ދެވިހިފާފައިވާ މީހެއް ކަމުންނާއި މިހާރު ވެސް ފަރުވާ ބޭނުންވާ މީހެއް ކަމުން ކޯޓުން ވަނީ އޭނާ ޑްރަގް އޮފެންޑާ ރިމާންޑް ސެންޓަރެއްގައި ބަންދުކުރުމަށް އަމުރުކޮށްފައެވެ. އޭނާގެ ބަންދަށް ޖަހާފައި ވަނީ 30 ދުވަހެވެ.
މަގުމަތީގައި ދިރިއުޅެ، މަސްތުވާތަކެއްޗަށް ދެވިހިފާފައިވާ މީހުން މާލޭގައި ގިނަ އަދަދަކަށް އުޅެއެވެ.
މިފަދަ މީހުންނާއި ޑްރަގުގެ ފަރުވާ ބޭނުންވާ މީހުންނަށް އެ ފަރުވާ ފޯރުކޮށްދިނުމަށް މި ފަހުން ވަނީ ރިމާންޑް ސެންޓަރުތައް ގާއިމްކޮށް، ފަރުވާ ދޭން ފަށާފައެވެ.
މިފަދަ މީހުންނަށް ފަރުވާދޭ ރިމާންޑް ސެންޓަރު ގާއިމްކޮށްފައި ވަނީ ކ. ހިންމަފުއްޓާއި ހުޅުމާލޭގައެވެ.