މިދިޔަ ހޯމަ ދުވަހު ޓީޒާ ރިލީޒްކުރި ފިލްމު "ފަތޭ"އިން ހޮލީވުޑްގެ ވަރުގަދަ އެކްޝަން ފިލްމު "ޖޯން ވިކް"ގެ ހަނދާން ބެލުންތެރިންނަށް ގެނުވައިދޭނެ ކަމަށް ފިލްމުގެ ލީޑް އެކްޓަރު ސޯނޫ ސޫދު ބުނެފިއެވެ.
މީގެކުރިންވެސް އެކްޝަން ފިލްމުތަކުން ފެނިފައިވާ ސޯނޫ ފިލްމު ޑައިރެކްޝަނަށް ނުކުންނަ މި ފިލްމުގެ ޓީޒާއިން އެކްޝަން ފިލްމެއްގައި ހުންނަންޖެހޭ ހުރިހާ ރަހަތަކެއް އެބަހުރި ކަމަށް ގިނަ ބަޔަކު ވަނީ ބުނެފައެވެ.
ފިލްމު "ފަތޭ"އަކީ ސައިބަ ކްރައިމްއާ ދެކޮޅަށް އިންޑިއާގެ ޕޮލިސް ފޯސްގައި ކުރިން މަސައްކަތްކުރި އޮފިސަރަކު ނުކުމެ އެކަން ހުއްޓުވުމަށް ކުރާ މަސައްކަތްތައް ދައްކުވައިދޭ ފިލްމެކެވެ. މި ފިލްމުން ޑިޖިޓަލް ދުނިޔޭގެ އަނދިރިފަރާތް ދައްކުވައިދޭއިރު ބޮޑެތި ނުރައްކާތެރި ސްކޭމްތަކުގެ މަޅީގައި މީހުން ޖައްސުވާ މަންޒަރު ދައްކުވައިދޭ އެފަދަ ސްކޭމްތަކުން ރައްކާތެރި ހޯދާނެ ގޮތްތައް ވެސް ހިމެނޭ ކަމަށް ރިޕޯޓުތައް ބުނެއެވެ.
ސޯނޫ ސޫދު ބަތަލާ ޖެކްލީންއާ އެކު ފިލްމު "ފަތޭ"ގެ މަންޒަރެއްގައި--ފޮޓޯ/ބޮލީވުޑްހަންގާމާ
މިހާތަނަށް އާއްމުންގެ ފަރާތުން ސޯނޫއަށް ލިބެމުން އަންނަ ލޯތްބާއި އިހުތިރާމް ފިލްމުގެ ޓީޒާއަށް ލިބޭނެ ކަމަށް އުއްމީދުކުރާ ކަމަށާއި ބެލުންތެރިން އޭނާ މާޔޫސް ނުކުރާނެ ކަމުގެ ޔަގީންކަން އެބައޮތް ކަމަށް ސޯނޫ ވަނީ ބުނެފައެވެ.
ސައިބަ ދުނިޔޭގައި ހިނގާ ކަންކަން ބައެއް މީހުން ވަރަށް އާދައިގެ ކަންކަން ގޮތުގައި ނެގި ނަމަވެސް އެއީ ހީކުރާ ވަރަށްވުރެ މާ ނުރައްކާތެރި ދުނިޔެއެއް ކަމަށާއި ސައިބަ ކްރައިމްއިން ރައްކާތެރިކަން ހޯދުމަށް ކޮންމެ މީހަކު ވެސް އެކަމަށް އަހުލުވެރިވުން މުހިއްމު ކަމަށް ސޯނޫ ވަނީ ބުނެފައެވެ.
މި ފިލްމުގެ އެކްޝަން ސީންތަކުގައި ހޮލީވުޑްގެ ތަޖުރިބާކާރުން މަސައްކަތްކޮށްފައިވާއިރު ފިލްމުގައި ހޮލީވުޑްގެ ރަހަތައް އެކުލެވޭ ކަމަށް އެކްޓަރު ވަނީ ބުނެފައެވެ.
ސޯނޫގެ އިތުރުން ފިލްމުން ފެންނާނެ މުހިއްމު ތަރިންގެތެރޭ ބަތަލާ ޖެކްލީން ފެނާންޑެޒް އަދި ނަސީރުއްދީން ޝާހް ހިމެނެއެވެ. މި ފިލްމު ރިލީޒްކުރަން ނިންމާފައި ވަނީ އަންނަ މަހުގެ 10ވަނަ ދުވަހުއެވެ.