މަސްވެރިކަމުގެ ސިނާއަތް ކުރިއެރުވުމަށްޓަކައި އިތުރު މާކެޓުތައް ހޯދައި، މަހުގެ ތަފާތު އުފެއްދުންތައް އިތުރުކޮށް، ދުނިޔޭގެ ބާޒާރުގައި އެންމެ ރަނގަޅު އަގުލިބޭ އުފެއްދުންތަކަކީ ދިވެހި އުފެއްދުންތައް ކަމުގައި ހެދުމަށް މަސައްކަތްކުރަންޖެހޭ ކަމަށް މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ރައީސް އަދި ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު މިއަދު ގޮވައިލައްވައިފިއެވެ.
އެމަނިކުފާނު އެފަދައިން ގޮވައިލެއްވީ މިއަދު ފާހަގަކުރާ ދިވެހިރާއްޖޭގެ 44 ވަނަ މަސްވެރިންގެ ދުވަހުގެ މުނާސަބަތުގައި ދެއްވި ޚިތާބުގައެވެ.
ސިޔާމް ވިދާޅުވީ މަސްވެރިކަމަކީ ދިވެހިންގެ ހިތްތަކާ ވަރަށް ބޮޑަށް ގުޅިލާމެހިފައިވާ މަސައްކަތެއް ކަމަށެވެ. އަދި އެއީ އިގްތިޞާދުގެ މައި ލޭނާރު ކަމަށާއި މިއަދު ވެސް ރާއްޖޭގެ ގިނަ އަދަދެއްގެ އާއިލާތަކުގެ އާމްދަނީ ބިނާވެފައި ވަނީ މަސްވެރިކަމުގެ މައްޗަށް ކަމަށް އެމަނިކުފާނު ވިދާޅުވިއެވެ.
އެހެން ކަމުން މި ފަދަ ޚާއްސަ ދުވަހެއްގައި މަސްވެރިންގެ ކަންބޮޑުވުންތަކަށް ސަމާލުކަންދީ، އެ ކަންބޮޑުވުންތަަކަށް ޙައްލު ހޯއްދަވައި ދިނުމަށް މަސްވެރިކަމާ ގުޅުންހުރި އެންމެހާ ފަރާތްތަކުން މަސައްކަތް ކުރެއްވުމަކީ ވަރަށް މުހިންމު ކަމެއް ކަމުގައި ސިޔާމް ވިދާޅުވިއެވެ.
މިއަދު މަސްވެރިންނަށް ކުރިމަތިވެފައިވާ އެންމެ ބޮޑު ގޮންޖެހުމަކީ ބާނާ މަސްކޮޅު ފަސޭހަކަމާއެކު ކިރޭނެ ނިޒާމެއް ގާއިމުވެފައި ނެތުމާއި، ކިރާ މަހަށް އެކަށީގެންވާ އަގު ލިބުމުގައި ދިމާވެފައިވާ ދަތިތައްކަން ސިޔާމް ފާހަގަކުރެއްވިއެވެ. އެކަމުގެ ސަބަބުން މަސްވެރި އާއިލާތައް މިއަދު ހިތްދަތިކަން ތަހައްމަލު ކުރަމުންދާ ކަމަށް އެމަނިކުފާނު ވިދާޅުވިއެވެ.
އެހެންކަމުން އެ ހިތްވަރުގަދަ، ހީވާގި މަސްވެރިންނަށް ކުރިމަތިވެފައިވާ އެ ދަތިތައް ހައްލުކޮށްދެއްވުމަށް ކަމާބެހޭ އެންމެހާ ފަރާތްތަކުން ބިނާކުރަނިވި އަދި އުފެއްދުންތެރި މަސައްކަތްތަކެއް ކުރެއްވުމަށް ސިޔާމް ވަނީ އިލްތިމާސްކުރައްވާފައެވެ.
އަޅުގަނޑުގެ އިޚުލާސްތެރި ދުއާއަކީ ދިވެހިރާއްޖޭގެ ލޮބުވެތި، އުޚުއްވަތްތެރި މަސްވެރިންނަށް އަބަދުވެސް ކުރިއެރުމާއި ތަނަވަސްކަން މިންވަރުކުރެއްވުން. ހަމައެއާއެކު ދިވެހި ކަނޑު ފަޅުތަކުގައި މާތްﷲގެ ތަނަވަސް ރިޒުގު އިތުރުކޮށްދެއްވައި، މަސްވެރި ސިނާއަތް އަބަދުވެސް ފާގަތިކަންމަތީ ދިރި ދެމިއޮތުން، މީދޫ ދާއިރާގެ މެންބަރު އަހުމަދު ސިޔާމް
ސިޔާމް ވަނީ މަސްވެރިންގެ ދުވަހުގެ ހެޔޮ އެދުމާއި ތަހުނިޔާ، ރާއްޖޭގެ އެކި ކަންކޮޅުތަކުގައި އުޅޭ މަސްވެރިންނަށާއި، މަސްވެރިކަމުގެ ސިނާއަތުގައި ހަރަކާތްތެރިވާ އެންމެހާ ބޭފުޅުންނަށް އަރިސްކުރައްވާފައެވެ.