ދިރާގުގެ ކަސްޓަމަރުން މި ދުވަސްވަރު އެންމެ ގަދައަށް ދައްކާ އެއް ވާހަކައަކީ ދިރާގު ވިން އަ ސްޕީޑު ބޯޓު ޕްރޮމޯޝަންގެ ވާހަކައެވެ. މި ޕްރޮމޯޝަންގައި ދިރާގުން ވަނީ އަލް ޝާލީ މެރިން، މަޖެލަން 32ގެ ސްޕީޑުބޯޓެއް ދިނުމަށް ނިންމާފައެވެ. މި ޕްރޮމޯޝަންގެ ނަސީބުވެރި ފަރާތަކަށް ޔަމަހާގެ ފަރާތުން 175 ހޯސްޕަވަރުގެ ދެ އައުޓްބޯޑް އިންޖީނުވެސް ހަދިޔާކުރާނެއެވެ.
މިއަދު ދިރާގުން ވަނީ އިނާމަކަށް ލިބޭ މަޖެލަން 32ގެ ލޯންޗެއްގައި ނޫސްވެރިން ގޮވައިގެން މާލެ އަތޮޅުގެ ފިނޮޅަކަށް ގޮސް، ލޯންޗުގެ ތަޖުރިބާ ހޯދަން ފުރުސަތު ދީފައެވެ. މާލޭ ދުވާ ޓްރެކު ކުރިމަތިން ފުރައިގެން 15 ވަރަކަށް މިނެޓު ހޭދަކޮށް އެ ލޯންޗުގައި ފިނޮޅަށް ދެވޭއިރު، ގަޑިއަކު 40 މޭލު ބާރުމިނުގައި މި ލޯންޗު ދުއްވެއެވެ.
މި ލޯންޗު ވަރަށް ތިލަ ހިސާބުތަކަށް ވެސް ބީއްސޭނެ ---- ސަން ފޮޓޯ
މި ލޯންޗު ފަރުމާކޮށްފައި ވަނީ އަރަމުގައި ދަތުރުކޮށްލެވޭގޮތަށް ގިނަ ކަންތައްތަކެއް ހިމަނައިގެންނެވެ. މިގޮތުން، މަސްވެރިކަމަށް ނިކުންނަ ބޭނުންވާ ފަރާތްތަަކަށް ނުވަތަ ދަތުރު ދިޔުމަށް ވެސް މި ލޯންޗު ވަރަށް ފުރިހަމަވާނެއެވެ. އަދި، އެހެން ލޯންޗުތަކާ ޚިލާފަށް ރެސްޓުކުރެވޭހެން ކޮޓަރިއެއް މި ލޯންޗުގައި ފަރުމާކޮށްފައިވާއިރު، ފާހަނާއެއް ވެސް ހުރެއެވެ. އެހެންކަމުން، ފަޅުރަށްތަކަށް ދާ ދަތުރުތަކުގައި އޯވާނައިޓަކަށް ވެސް މި ސްޕީޑުބޯޓަކީ އެންމެ ފުރިހަމަ ލޯންޗެވެ.
އެ ލޯންޗުގައި ގާއިމުކޮށްފައި އިންނަ ކޮޓަރި --- ސަން ފޮޓޯ
ލޯންޗުގައި ހުންނަ ސިފަތަކަށް ބަލާއިރު، ކްރޫއިން ހިމަނައިގެން 14 މީހުންނަށް ދަތުރުކުރެވޭ ވަރަށް ސީޓު ހުރެއެވެ. ކްރޫ ސީޓުގެ ފަހަތުގައި މޭޒެއް ހެން ހުޅުވައިލެވޭ ބައެއް އިންނައިރު، މަސްވެރިންނަށް އައިސްގެ އިތުރުން ދިރޭ އެން ރައްކާ ކުރެވޭ ޖާގަތައް ހުރެއެވެ.
ފިނޮޅުތަކަށް ދަތުރުދާ މީހުން ލޯންޗު ގޮނޑުދޮށަށް ބީއްސާފައި ފުން ކުރަން އުނދަގޫވާތީ ވެސް މިހާރު ވިސްނާކަށް ނުޖެހޭނެއެވެ. މަޖެލަން 32 އަކީ ގޮނޑުދޮށަށް ވެސް ބީއްސާލެވޭފަދައިން ފަރުމާކޮށްފައިވާ ލޯންޗެކެވެ. އަދި، ފަތުރުވެރިން ބޭނުންވާހެން ސަންޓޭން ވާން ސަން ޑެކެއް ވެސް ލޯންޗުގައި އިންނާނެއެވެ.
ހަމައެހެންމެ، ކުޑަވެފައި ހާދިސާއެއް ދިމާވެދާނެ ކަމަށް ދަތުރުކުރަން ބިރު ގަންނަ މީހުން ވެސް މި ލޯންޗުގައި ދަތުރުކުރަން ހާސްވާކަށް ނުޖެހޭނެއެވެ. ރާއްޖޭގެ ގާނޫނުގައި ސަލާމަތީ ގޮތުން ހަމަކުރަން ޖެހޭ ހުރިހާ ކަމެއް މި ލޯންޗުގައި ވަނީ ފުރިހަމަކޮށްފައެވެ. އޭގެތެރޭގައި، އަލިފާން ނިއްވާ ފުޅިއާއި ނެވިގޭޝަން ހުރިހާ ލައިޓުތަކާއި ޖީޕީއެސްގެ އިތުރުން ކޮމިއުނިކޭޝަން ސެޓުތަކާއި ދިޔަވެއްޖެ ހާލުގައި ބޭނުންކުރާ ރަސްމީ ޕަންޕާއި އިތުރު ޕަންޕެއް ހުރެއެވެ.
މަޖެލަން 32 ލޯންޗު: މި ލޯންޗު ގައި 14 މީހުންނަށް ދަތުރުކުރެވޭ ވަރަށް ސީޓު ހުރޭ --- ސަން ފޮޓޯ
އެހެންވެ، މި ލޯންޗު ހޯދަން ދިރާގުގެ ކަސްޓަމަރުން ނޫޅެންވީ އެއްވެސް ސަބަބެއް ނެތެވެ. ހުރިހާ ބޭނުންތަކަށް ވެސް މި ލޯންޗުގައި ވަރަށް އަރާމުގައި ދަތުރުކޮށްލެވޭނެއެވެ.
މި ލޯންޗު ހޯދަން މިމަހުގެ 15ގެ ނިޔަލަށް ޕްރޮމޯޝަންގައި ބައިވެރިވެވޭނެއެވެ. އެގޮތުން ޕްރީޕެއިޑް ޕްލޭންތަކަށް 400 ރުފިޔާ، ނުވަތަ އެއަށްވުރެ މަތިން ރީޗާޖުކުރާ ކަސްޓަމަރުންނާއި ޕޯސްޓްޕެއިޑް 400 އަދި ފައިބާ ބްރޯޑްބޭންޑް 30އެމް އަށް ވުރެ މަތީގެ ޕްލޭންތަކަށް ސަބްސްކްރައިބްކުރާ ފަރާތްތަކަށް މި ޕްރޮމޯޝަންގެ ގުރުއަތުގައި ބައިވެރިވެވޭނެ ކަމަށް އެ ކުންފުނިން ބުންޏެވެ.
ދިރާގުން ވިން އަ ސްޕީޑު ބޯޓު ޕްރޮމޯޝަންގައި ދޭ ސިފަތައް ހުރި ލޯންޗެއް --- ސަން ފޮޓޯ
ދިރާގުގެ ޚިދުމަތް މިހާރު ބޭނުންކުރަމުންދާ ކަސްޓަމަރުންނާއި އަލަށް ދިރާގާއި ގުޅޭ ކަސްޓަމަރުންނަށް ވެސް މި ޕްރޮމޯޝަންގައި ބައިވެރިވުމުގެ ފުރުސަތު އެކުންފުނިން ވަނީ ހުޅުވާލާފައެވެ.
'ވިން އަ ސްޕީޑްބޯޓް' ޕްރޮމޯޝަންގައި ބައިވެރިވާ ކޮންމެ ކަސްތަމަރުންގެ ތެރޭގައި ވެސް ކޮންމެ މަހަކު ހާއްސަ ލަކީޑްރޯއެއް ކުރިއަށް ގެންދެއެވެ. އެގޮތުން އިނާމުގެ ގޮތުގައި ގޯ ޕްރޯ ހީރޯ 12، ސުންޓޯ ޑީ5 ވޮޗް، ޑީޖީއައި މިނީ އެސްއީ ފްލައި މޯ ކޮމްބޯ، އަދި ސްޕޯޓްސް ފިޝިންގް ގިއާ ސެޓް ފަދަ ހިތްގައިމު އިނާމުތައް ހިމެނޭނެ ކަމަށް އެ ކުންފުނިން ބުންޏެވެ.
އަދި މި ޕްރޮމޯޝަންގެ ބޮޑު އިނާމު ހޯދުމަށް ބައިވެރިވާ ހުރިހާ ޕްރީޕެއިޑް، ޕޯސްޓްޕެއިޑް އަދި ފައިބާ ބްރޯޑްބޭންޑް ކަސްޓަމަރުން ވެސް ކޮންމެ މަހަކު ކުރިއަށްދާ މި އިނާމު ލިބޭ ގުރުއަތުގައި އޮޓޮމެޓިކްކޮށް ބައިވެރިކުރެވޭނެ ކަމަށް ދިރާގުން ބުންޏެވެ.