ވޯލްޑް ބޭންކުން ރާއްޖެއަށް ފޯރުކޮށްދޭ ސްކޮލާޝިޕް ފުރުސަތުތަކެއްގެ ތެރެއިން މަސްވެރިކަމުގެ ދާއިރާއިން ރާއްޖެއިން ބޭރުން މަތީ ތައުލީމު ހާސިލުކުރުމުގެ ފުރުސަތުތަކަކަށް ކުރިމަތިލުމަށް ހުޅުވާލައިފިއެވެ.
ފިޝަރީސް މިނިސްޓްރީން ގެޒެޓުކޮށްފައިވާ އިއުލާނެއްގައިވަނީ، އެ ފުރުސަތުތައް ދެނީ ވޯލްޑް ބޭންކްގެ ޓްރާންސްފޯމިން ފިޝަރީޒް މެނޭޖްމަންޓް އިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓްގެ ދަށުން ކަމަށެވެ.
އެ ސްކޮލާޝިޕްތައް ދެނީ ފިޝަރީޒް ސައިންސް ނުވަތަ މެރިން ސައިންސްގެ ބެޗްލާސް ޑިގްރީ ދެ ކޯހަކަށާއި އެކުއަކަލްޗާ ދާއިރާއިން ކޯހަކަށެވެ. އެގޮތުން ފުރުސަތު ދީފައިވަނީ އެ ކޯސްތައް އޭޝިއާގެ ގައުމެއްގައި ހެދުމަށެވެ.
ސްކޮލާޝިޕްގެ ޝަރުތު:
- ޖީސީއީ އޯލެވެލްގެ ފަސް މާއްދާއިން 'ސީ'އިން ފެށިގެން މަތީ ގްރޭޑެއް ހާސިލުކޮށްފައިވުން އަދި ޖީސީއީ އޭލެވެލްގެ ތިން މާއްދާއިން 'ސީ'އިން ފެށިގެން މަތީ ގްރޭޑެއް ހާސިލުކޮށްފައިވުން
- ފައުންޑޭޝަން ނުވަތަ ސެޓްފިކެޓް ލެވެލްގެ ޔުނިވާސިޓީ އެންޓްރެންސް ގަބޫލުކުރާ ސަނަދެއް ހާސިލްކޮށްފައިވުން
އެޕްލިކޭޝަން ފޯމާއެކު ހުށަހަޅަންޖެހޭ ތަކެތި:
- ތައުލީމީ ސެޓުފިކެޓުތަކުގެ ކޮޕީ (އެޓެސްޓް ކުރަންޖެހޭ ލިޔުމެއް ނަމަ އެޓެސްޓް ކުރެވިފައިވާ ކޮޕީ)
- ފުލް ޓްރާންސްކްރިޕްޓްގެ ކޮޕީ (ގްރޭޑިން ކްރައިޓީރިއާ އެނގޭގޮތަށް)
- މުއްދަތު ހަމަނުވާ ދިވެހި ރައްޔިތެއްކަން އަންގައިދޭ ކާޑުގެ ކޮޕީ
- މިހާރު ހާސިލް ކޮށްފައިވާ އެންމެ މަތީ ސެޓްފިކެޓް ހާސިލް ކުރުމަށްފަހު ދިވެހިރާއްޖެއަށް ޚިދުމަތް ކޮށްފައިވާ މުއްދަތު އެނގޭނެ ރަސްމީ ލިޔުމެއް، ރަސްމީ ލިޔުމެއް ނުލިބިއްޖެނަމަ ސަބަބާއި މުއްދަތު އެނގޭނެ އަމިއްލަ ލިޔުމެއް
- އެހެން ޚިދުމަތުގެ ބޮންޑެއް އޮތްނަމަ ބޮންޑުކުރި ތަނަކުން ބޮންޑު އެއްކޮށް ރިލީޒްކުރާނެ ކަމުގެ ލިޔުން ހުށަހެޅުން
ސްކޮލާޝިޕުން ކުރާނެ ޚަރަދުތައް:
- ކޯސް ފީ
- ބުކް އެލަވަންސް (ސްކޮލާޝިޕްގައި ކިޔަވަމުންދާ މުއްދަތަށް އަހަރަކު އެއްފަހަރު)
- އެސްޓަބްލިޝްމަންޓް އެލަވަންސް (އެއްފަހަރު)
- ޑިޕާޗާ އެލަވަންސް (އެއްފަހަރު)
- ސްޓައިޕަންޑް (ސްކޮލާޝިޕްގައި ކިޔަވަމުންދާ މުއްދަތަށް)
އެ ސްކޮލާޝިޕް ލިބިއްޖެ ނަމަ ކޯސް ފުރިހަމަކުރުމަށްފަހު ސިވިލް ސާވިސްގެ ގަވާއިދުގައި ވާގޮތަށް، ފިޝަރީސް މިނިސްޓްރީގައި ޚިދުމަތް ކުރުމަށް ބޮންޑުކުރާނެއެވެ.
އެ ކޯސްތަކަށް ކުރިމަތިލުމަށް އަންނަ މަހުގެ ނުވަ ވަނަ ދުވަހުގެ 12:00ގެ ކުރިން ފިޝަރީސް މިނިސްޓްރީގެ ޕްރޮޖެކްޓް މެނޭޖްމެންޓް ޔުނިޓަށް ލިޔެކިޔުން ހުށަހެޅޭނެއެވެ. އެޕްލިކޭޝަނާ އެކު ހުށަހަޅަންޖެހޭ ހުރިހާ ލިޔުންތައް ހުށަހަޅައިފައި ނުވާނަމަ އެޕްލިކޭޝަން ބާތިލުކުރާނެކަން މިނިސްޓްރީން ފާހަގަކުރިއެވެ.
އެ ސްކޮލާޝިޕްތަކާ ގުޅޭ އިތުރު މައުލޫމާތު ބަންދުނޫން ކޮންމެ ދުވަހެއްގެ ހެނދުނު 08:00 އާއި 14:00 ދެމެދު 3033484އަށް ގުޅުމުން ލިބޭނެއެވެ.