މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ)އިން، އެ ޖަމްއިއްޔާގެ އަހަރީ އާޓް މުބާރާތާއި މައުރަޒު، "ފްރޭމް ބައި މާޓާޓޯ"ގައި ބައިވެރިވުމުގެ ފުރުސަތު ހުޅުވާލައިފިއެވެ.
މަޓާޓޯއިން ބުނީ، މިއީ ދިވެހި އުފެއްދުންތެރިންގެ ހުނަރު ފާހަގަކޮށް، ރާއްޖޭގެ މުއްސަނދި ސަގާފަތް ފަންނުވެރިން މެދުވެރިކޮށް ފަތުރުވެރިންނަށް ދައްކާލުމަށް ޚާއްޞަކޮށްގެން ބާއްވާ ހަރަކާތެއް ކަމަށެވެ.
އަންނަ އަހަރު ބާއްވާ މި މައުރަޒުގެ މައުޟޫއަކީ "ދަ މޯލްޑިވިއަން މިސްޓިކް"އެވެ.
މި މުބާރާތުގައި ބައިވެރިވުމުގެ ފުރުސަތު ހުޅުވާލައިފައި ވަނީ މާދަމާއިން ފެށިގެން އަންނަ މަހުގެ 20ގެ ނިޔަލަށެވެ.
މި މުބާރާތުގައި ހަތަރު އުމުރުފުރައެއްގެ ފަންނުވެރިންނަށް ބައިވެރިވެވޭނެއެވެ.
މަޓާޓޯއިން ބުނީ، ފަންނުވެރިންގެ މަސައްކަތްތަކަށް ފަނޑިޔާރުކަން ކުރަނީ ރާއްޖެއާއި ރާއްޖެއިން ބޭރުގެ މާހިރުން ހިމެނޭ ޕެނަލައަކުން ކަމަށެވެ. މި ހުށަހެޅުންތަކުގެ ތެރެއިން ކޮންމެ އުމުރުފުރައަކުން 10 މަސައްކަތެއް ޝޯޓްލިސްޓްކޮށް، އަންނަ އަހަރުގެ ފެބްރުއަރީ މަހުގައި ނެޝަނަލް އާޓް ގެލެރީގައި ބޭއްވުމަށް ހަމަޖެހިފައިވާ މަޓާޓޯގެ އާޓް މައުރަޒުގައި ބައިވެރިކުރާނެއެވެ.
މަޓާޓޯގެ އާޓް މުބާރާތް ބޭއްވުމުގައި ބައިވެރިވާ ފަރާތްތަކުގެ ތެރޭގައި:
- ޓޫރިޒަމް މިނިސްޓްރީ
- މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)
- ޔޫތު މިނިސްޓްރީ
- ނޭޝަނަލް ސެންޓަ ފޯ ދި އާޓްސް (އެންސީއޭ)
- މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)
- މޯލްޑިވިއަން އާޓިސްޓް ކޮމިއުނިޓީ (އެމްއޭސީ)
- ނޭޝަނަލް ހޮޓެލްސް އެންޑް ގެސްޓްހައުސެސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް)
މި މުބާރާތާ ބެހޭ އިތުރު މަޢުލޫމާތު އަދި މަސައްކަތްތައް ހުށަހަޅާނެ ގޮތުގެ މައުލޫމާތު ފްރޭމް ބައި މަޓާޓޯގެ ވެބްސައިޓުން ލިބޭނެއެވެ.