މި އަހަރު ދިވެހިބަހުގެ އެކެޑަމީން ބޭއްވި އަދަބީ ބައެއް މުބާރާތްތަކުގެ ނަތީޖާ ފާޅުކުރުމުގެ ޖަލްސާ މި މަހުގެ 12ވާ ބުރާސްފަތި ދުވަހުގެ ރޭ ބާއްވާ ގޮތަށް އެކެޑަމީން ނިންމައިފިއެވެ.
ދިވެހިބަހުގެ އެކެޑަމީން ބޭއްވި އަދަބީ ތިން މުބާރާތްކަމުގައި ވާ އަލްއުސްތާޛު މުޙައްމަދު ޖަމީލު ދީދީގެ ހަނދާނީ ވާދައިގެ ތައްޓަށް ބާއްވާ މަޒުމޫނު ލިޔުމުގެ 39ވަނަ ޤައުމީ މުބާރާތާއި އައްޝައިޚް މަލިމް މޫސާ މާފަތްކަލޭފާނުގެ ހަނދާނީ ވާދައިގެން ތައްޓަށް ބާއްވާ ކުރުވާހަކަ ލިޔުމުގެ 36ވަނަ ޤައުމީ މުބާރާތާއި ހުތްޢަލިދީދީގެ ވާދައިގެ ތައްޓަށް ބާއްވާ ޅެންހެދުމުގެ 27ވަނަ ޤައުމީ މުބާތުގެ ނަތީޖާ މި ޖަލްސާގައި ފާޅުކުރުމަށް ވަނީ އެ އެކަޑަމީން ނިންމާފައެވެ.
މި މުބާރާތްތަކުގެ އިސްކޫލުތަކުގެ ބައިން، ކޮންމެ އުމުރުފުރައަކުން އެންމެ މޮޅު 10ދަރިވަރުން ހޮވާނެއެވެ. އަދި ކޮންމެ މުބާރާތެއްގެ އިސްކޫލުތަކުގެ ބައިގެ ކޮންމެ އުމުރުފުރާއަކުންނާއި އަމިއްލަ ފަރާތްތަކުގެ 18އަހަރުން ދަށާއި 18އަހަރުން މަތީގެ ގިންތީން އެއްވަނަ، ދެވަނަ، ތިންވަނަ ދަރިވަރުންނާއި، މީހުން ވެސް ހޮވާނެއެވެ.
މި މީހުންނަށް ރައީސުލްޖުމްހޫރިއްޔާ ދެއްވާ އިނާމާއި، ތައްޓާއި، ތަޢުލީމީ ވުޒާރާއިން ދެއްވާ ތައްޓާއި، ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ދެއްވާ ތައްޓާއި، ދިވެހިބަހުގެ އެކެޑަމީން ދޭ ތައްޓާއި އިނާމާއި ހަނދާނީ ލިޔުން ދެވޭނެއެވެ.
މި އަހަރުގެ މަޒުމޫނު ލިޔުމުގެ މުބާރާތުގައި އިސްކޫލުތަކުގެ ދަރިވަރުންނާއި އަމިއްލަ ފަރާތްތައް ހިމެނޭހެން 999 ބައިވެރިންނާއި، ކުރުވާހަކަ ލިޔުމުގެ މުބާރާތުގައި 931 ބައިވެރިންނާއި ޅެންހެދުމުގެ މުބާރާތުގައި 493 ބައިވެރިން ވަނީ ވާދަކޮއްފައެވެ.
އަދި މި މުބާރާތްތަކުގައި 121 ސްކޫލެއްގެ ދަރިވަރުންނާއި އަމިއްލަ މީހުންނާއެކު ޖުމުލަ 2423 މީހުން ބައިވެރިވިއެވެ. މި މުބާރާތްތަކުގައި އަތޮޅުތަކުން 100 ސުކޫލަކުންނާއި މާލޭ ސަރަހައްދުން 21 އިސްކޫލަކުން ވަނީ ވާދަކޮށްފައެވެ.
މި މުބާރާތްތަކަކީ މުޅި ރާއްޖޭގައި އެއް ވަގުތެއްގައި ދާދިވަރުގަދަކޮށް މޮނިޓާކޮށްގެން ލޯކަލް ގަވާމެންޓު އޮތޯރިޓީއާއި ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތަކުގެ އެހީތެރިކަމާ އެކުގައި ކުރިއަށް ގެންދިޔަ މުބާރާތްތަކެކެވެ.