ނިޝާން ޢިއްޒުންދީންގެ ޢިއްޒަތުގެ ވެރިޔާ އަބްދުﷲ ޞާދިގު (ސޯދުބެ)ގެ ޅެންވެރިކަމުގެ ސަމާސާ ރަހައަށް ދިވެހިބަހުގެ އެކެޑަމީގެ ރައީސް ޑރ. އަޝްރަފް އަބްދުއްރަހީމް އެތައް ތައުރީފެއް ރޭ ކުރައްވައިފިއެވެ.
ޅެންވެރީންގެ ދުވަހަކީ ދިވެހި ޅެންވެރިކަމުގެ ޝާޢިރުއްޝަބާބް، އަލްމަރުޙޫމު އިބްރާހީމް ޝިހާބުގެ ހަނދާނުގައި ސަރުކާރުން ރަސްމީކޮށް ފާހަގަކުރާ ދުވަހެކެވެ. އެގޮތުން, މި އަހަރުގެ ޅެންވެރިންގެ ދުވަސް ޚާއްސަކުރީ ސޯދުބެއަށެވެ.
ރޭ ބޭއްވި މި އަހަރުގެ ޅެންވެރީންގެ ދުވަހުގެ ރަސްމީ ޖަލްސާގައި ސޯދުބެގެ ޅެންތަކުގެ ސަމާސާ ރަހައިގެ ވާހަކަދައްކަވަމުން އަޝްރަފް ވިދާޅުވީ، މި ޒަމާނަށް އައި ބަދަލުތަކުގެ ވާހަކަ ޅެންބަހުރުވައިން، ސަމާސާ ރާގަކަށް، ފުރިހަމަކަމާ އެކު ގެނެސްދެއްވީ ސޯދުބެ ކަމަށެވެ. ސޯދުބެގެ ޅެންތަކުން ނެގޭ މާނަ އެހާވެސް ފުންކަން ފާހަގަކުރައްވާ އަޝްރަފް ވިދާޅުވީ، އެއީ ވަރަށް ވެސް މޮޅު ޅެންތަކެއް ކަމަށެވެ.
"އެކަމަކު ހާދަ ފުނޭ. ކުޑަ މީހާއަށް ކުޑަ މާނަ. ބޮޑު މީހާއަށް ބޮޑު މާނަ. ސަމާސާ ކޮށްލަން ބޭނުންވާ މީހާއަށް ސަމާސާ މާނަ،" އަޝްރަފް ވިދާޅުވިއެވެ.
އޭނާ ވަނީ ސޯދުބެގެ ޅެންތަކުން އެތައް މިސާލެއް ނަންގަވައިފައެވެ.
"ނުވާނެއޭ ކިޔާހާ ކަންކަން މިހާރު އެބަ ވެއޭ. ދުވާލާ ރެއަށް ގޮތްތަކެއް އެބަ ވެޔޭ. ތަފާތު ގޮތްތަކެއް އެބަ ވެޔޭ މިހާރު. ކުރީގައި ހުޅަނގު މޫސުން އަންނަ ދުވަސްވަރާއި މިއަދު އިރުވައި މޫސުން އަންނަ ދުވަސްވަރާ ފައްތަރުވެއްޖެ. ހުޅަނގު މޫސުމުގައި ވީ ކަންތައްތައް މިއަދު އިރުވައި މޫސުމުގަ ވާން ފަށައިފި،" ސޯދުބެގެ ޅެމަކުން ބައިތެއް ކިޔުއްވައި އަޝްރަފް ވިދާޅުވިއެވެ.
"މި ކަހަލަ ބޮޑެތި ވާހަކަތައް ވަރަށް ސަމާސާ ރާގެއްގައި ޅެމުން ހުށަހަޅައިދެއްވި ހަމައެކަނި ބޭފުޅަކީ އަޅުގަނޑުމެންގެ މިރޭގެ ޅެންވެރިޔާ އަބްދުﷲ ޞާދިގު،" ސޯދުބެގެ ޅެމުގެ ސަމާސާ ރަހައިގެ މިސާލެއް ނަންގަވައި އަޝްރަފް ވިދާޅުވިއެވެ.
"...ހާދަހާ ހިތްގައިމޭ. މުޅި ވެށި އަޅުގަނޑުމެންނަށް އެބަ ސިފަކޮށްދޭ [ސޯދުބެގެ ޅެންތަކުން]. އަޅުގަނޑުމެންގެ ވަށައިގެން މިހުރި އެތައް ތަކެއްޗެއް. ތިމާވެށި އެ ލަފުޒަކީ ވެސް ސޯދުބެގެ އެއްޗެއް ނޫންތޯ؟"
ޅެންވެރިންގެ ދުވަހުގެ ރަސްމީ ޖަލްސާގައި މިނިސްޓަރު އާދަމް ނަސީރާއި ޑރ. އަޝްރަފް -- ސަން ފޮޓޯ/ މުހައްމަދު އަފްވާން ޞަލާހް
ސޯދުބޭގެ ޅެންތަކުގައި ދިވެހިބަހުގެ ފިލާވަޅުތައް ވެސް ފުރިހަމަކަމާ އެކު ގެނެސްދެއްވާފައިވަނީ ވަރަށް ވެސް ސަމާސާ ގޮތަކަށް ކަމަށް އަޝްރަފް ވިދާޅުވިއެވެ. އެ ޅެންތަކަކީ އަދުގެ ދަރިވަރުންނަށް ވެސް އެތައް ފިލާވަޅުތަކެއް ކަމަށާއި، އެއީ އޭގެ ދެވަނައެއް ނުވާ ފަދަ އަގުހުރި މަސައްކަތެއް ކަމަށް އޭނާ ވިދާޅުވިއެވެ.
އަޝްރަފް ވިދާޅުވީ ޅެންބަހުރުވައިން ސޯދުބެގެ ގެނެސްދިން އެ ފިކުރުތައް މިއަދު ބަލައިގަންނަން ޖެހޭ ކަމަށެވެ.
"ކިޔޭ ބަހުރު ލޮނު، އެއީ ކަނޑުގެ ލޮނުގެ ވާހަކަ. ކިޔޭ ބަހުރު ލޮނު ބޯފެނަށް ތިބެ ހަދައި. މިއަދު ލޮނު ނަގައިގެން ބޯފެނަށް މި ހަދަނީ. ހަދައިގެން މިކިޔަނީ ކީކޭ؟ ސޯދުބެ ވިދާޅުވަނީ. ކިޔޭ ބަހުރު ލޮނު ބޯފެނަށް ތިބެ ހަދައި. މިއީ މީރުފެނޭ ކިޔައިގެން ބޮއޭ. މިއަދު އެ މީރު އެއްޗަކަށް މިވީ،"
އަޝްރަފް ވިދާޅުވީ, ސޯދުބެގެ އެފަދަ ޅެންބައިތުތަކުން އެތައް އެތައް އިބުރަތެއް ހާސިލުކުރެވޭނެ ކަމަށެވެ. ސަމާސާ، އެހެންނަމަވެސް މި ޒަމާނަށް ފެތޭނެ އެތައް މިސާލުތަކެއް ކަމަށެވެ.
"މުހައްޒަބު ގެދޮރުގައި ޒީނަތްކުރަން. މިހާރު ވަރަށް ތަހުޒީބުވެއްޖެ. މިހުރީ ވަށައިގެން ކޮންކްރީޓް. ކުދިކުދި އިމާރާތްތަކުގައި ސިޓިން ރޫމް ހަދައިގެން ތިއްބަވާނެ. ދެން މިވަނީ ކިހިނެއްތޯ؟ އެތާ އެތެރެ އެބަޖެހޭ ޒީނަތްތެރިކުރަން. ދެން މިހެން އުޅެފައި މި ދެވެނީ ތަންކޮޅެއް ވާ ބޮޑު ރަށަކަށް. ހަމަ ދެވުނީ އަސްތަޣުފިރުﷲ. އެ ދެން ސަލާމަތެއް ނެތް،"
"...މުހައްޒަބު ގެދޮރުގައި ގެ ޒީނަތްކުރަން. އިހަށް ވަލުތެރޭ ހުންނަ ގަސް މިއަދު ގޭތެރެއަށް ގެނެސްގެން ހައްދަނީ،" ހިނިފުޅުވަޑުވައި އަޝްރަފް ވިދާޅުވިއެވެ.
"ލަވަ އިހުގައި އަޑުއަހަނި. ލަވަ އިހުގަ އަޅުގަނޑުމެން އަޑުއަހަނި ރޭޑިއޯއިން. މިއަދު އެބައި ނިމުނީ. ކިހިނެއް މިވަނީ؟ ލަވަ އިހުގައި އަޑުއަހަނި. ލަވަ އަދު ތިބެގެން ބަލަނި. މިއަދު ބަލަނި. ހެޔޮވަރު ވަރަކަށް. މަހޭނެތި ދާނޭ. މިއަދު ބެލުން އޮތީ. މަންޒަރާ އެކުގައި،" އަޝްރަފް ވަނީ އެފަދަ އެތައް މިސާލެއް ސޯދުބެގެ ޅެންބައިތުތަކުން ފާހަގަކުރައްވައިފައެވެ.
އަޝްރަފް ވިދާޅުވީ، ޅެންވެރިންގެ އަގުވަޒަންކުރުމުގެ ގޮތުން ތަފާތު ހުށަހެޅުންތަކާ އެކު ޅެންވެރިންގެ ހަވީރެއް މި މަހު ފަހުކޮޅު ބާއްވާނެ ކަމަށެވެ.
ޅެންވެރީންގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޖެނުއަރީ މަހުގެ 15ވަނަ ދުވަހެވެ.
މި ދުވަހުގެ މައިގަނޑު މަގުސަދަކީ ދިވެހި ޅެންވެރީންގެ ޚިދުމަތުގެ އަގު ވަޒަންކުރުމާއި ދިވެހި ޅެންވެރިކަމަށް ދިވެހީން ހޭލުންތެރިކުރުވައި ބަހުގެ އަދަބުގެ ލޯބި އާލާކޮށް ދިރުވުމެވެ.
މި އަހަރު ފާހަގަކުރަނީ 37 ވަނަ ޅެންވެރީންގެ ދުވަހެވެ. އެ ގޮތުން މި އަހަރުގެ ޅެންވެރީންގެ ދުވަހުގެ ޝިއާރަކީ "އަހަންނަކީ ދިވެއްސަކީން. ދިވެހި އުޅުމުގެ ވެއްސަކީން''އެވެ.
ދިވެހިބަހުގެ އެކެޑަމީން ބުނި ގޮތުގައި އެ ޝިއާރު އިޚުތިޔާރުކޮށްފައިވަނީ، ސޯދުބެ ހައްދަވައިފައިވާ "ދިވެއްސަކީން" ޅެމާ ގުޅުވައިފައެވެ.