ޕާސްޕޯޓުން ފެނުނު ކުޑަ މައްސަލައަކާ ގުޅިގެން ބޮޑު ހޭދައެއް ކުރި ޗުއްޓީ ދަތުރު ގެއްލިއްޖެ

އަމިއްލަ ޕާސްޕޯޓުން ފެނުނު ވަރަށް އާދައިގެ މައްސަލައަކާ ގުޅިގެން އިނގިރޭސިވިލާތަށް ނިސްބަތްވާ އަންހެނަކު ބޮޑު ހޭދައެއްކޮށްގެން ތައްޔާރުވި ޗުއްޓީ ދަތުރުގައި ނުފުރި ދަތުރު އޭނާއަށް ގެއްލިއްޖެއެވެ.

ކްލޭޔާ ނަމަކަށް ކިޔާ މި އަންހެންމީހާ މެންޗެސްޓަ އެއާޕޯޓަށް ފުރަން ދިޔައީ އެތައް އަހަރެއްގެ ބުރަ މަސައްކަތުން އޭނާ އެއްކުރި ފައިސާ ޚަރަދުކޮށްގެން ފިންލޭންޑްގެ އުތުރު ރީޖަންގައިވާ ލަޕްލޭންޑްއަށް ދަތުރު ކުރުމަށެވެ.

މިއީ 37 އަހަރުގެ ކްލޭޔާގެ އާއިލާއަށް އޭނާ ސަޕްރައިޒެއްގެ ގޮތުގައި ރޭވި ދަތުރެއް ކަމަށާއި މެންޗެސްޓަ އެއާޕޯޓުގެ ސްޓާފުންގެ ފަރާތުން ކްލޭޔާއަށް ނުފުރުނޭކަން އެންގުމުން އެކަމާ ވީދެރައިން ލޮލުން ކަރުނަ އައި ކަމަށާއި އެ ވަގުތު އެއާޕޯޓު ތެރެއަށް އޭނާ ވެއްޓުނު ކަމަށް ވަނީ ބުނެފައެވެ.

މި ދަތުރަށް ތައްޔާރުވުމުގެ ގޮތުން ކްލޭޔާ ބުރަ މަސައްކަތުން އެއްކުރި ފައިސާގެ އަދަދު 4،500 ޕައުންޑް (5،730 އެމެރިކާ ޑޮލަރަށް) އަރައެވެ. ފިންލޭންޑްގެ ލަޕްލޭންޑަށް ދިއުމަށް އެމީހުން ވަނީ ވަކި ހާއްސަ ޕެކޭޖެއް ވެސް ނަގާފައި ކަމަށާއި މިއީ އާއިލާއާ އެކު ކްރިސްމަސް ފާހަގަ ކުރުމަށް ކްލޭޔާ ރޭވި އޭނާގެ ޑްރީމް ދަތުރެއް ކަމަށް މީޑިއާއަށް މައުލޫމާތު ދެމުން ވަނީ ބުނެފައެވެ.

ކްލޭޔާ އޭނާގެ ދެ ކުދިން އަދި ފިރިމީހާއާ އެކު--ފޮޓޯ/ދައައިރިޝްސަން

ކްލޭޔާގެ ޕާސްޕޯޓުގައި ފޮޓޯ ހަރުކުރެވިފައިވާ ގަނޑުގެ ތަންކޮޅެއް އިރައިގެން ގޮސްފައި ހުރުމުން އިމިގްރޭޝަނުން ވަނީ ޕާސްޕޯޓު ގަބޫލުނުކޮށްފައެވެ. ކްލޭޔާ ބުނިގޮތުގައި މީގެކުރިންވެސް އެތައް ފަހަރެއް މަތިން ދަތުރުތައް ކޮށްފައިވާއިރު ޕާސްޕޯޓުގެ އެ ގަނޑު އިރައިގެން ގޮސްފައި ހުރި ހުރުން އެއްވެސް އެއާޕޯޓަކުން މައްސަލައަކަށް ނަހަދައެވެ. އެހެންވެ އެއީ މާބޮޑު މައްސަލައެއް ކަމަށް ނަހަދާ ޕާސްޕޯޓު އާކުރުން އެހާ މުހިއްމުނުވީ ކަމަށް ކްލެޔާ ވަނީ ބުނެފައެވެ.

މި މައްސަލައާ ގުޅިގެން، އާއިލާއިން އޭނާއާ ނުލާ އެ ދަތުރުކުރި ކަމަށާއި އާއިލާއާ އެކު އެފަދަ ދަތުރެއް ކުރިމަގުގައި ކުރެވޭނެ ދުވަހެއް އަވަސް ފުރުސަތެއްގައި ނުލިބޭނެ ކަމަށް ކްލެޔާ ވަނީ ބުނެފައެވެ.

އިނގިރޭސި ސަރުކާރުގެ ވެބްސައިޓުގައި ބުނާގޮތުން ޕާސްޕޯޓަށް އެއްވެސް ކަހަލަ ގެއްލުމެއް ލިބިފައިވާނަމަ ޕާސްޕޯޓު އާ ކުރަންޖެހެއެވެ. ޕާސްޕޯޓުގެ އެއްވެސް ގަނޑެއްގައި ލޯވަޅެއް ހުރުން، އިރައިގެން ގޮސްފައި ހުރުން އަދި އޭގެ ކަވަރަށް ވެސް ގެއްލުމެއް ލިބިފައިވާ ނަމަ ދަތުރު ނުކުރެވޭނެ ކަމަށް އިނގިރޭސި ސަރުކާރުގެ ވެބްސައިޓުގައި ވަނީ ބުނެފައެވެ.