ދުވަސްވާ ވަރަކަށް މީހާގެ ދިރިއުޅުމުގެ އާދަތަކަށް ބަދަލުތައް އަންނާނެއެވެ. މީހާގެ ހަށިގަނޑަށް ވެސް ބޮޑެތި ބަދަލުތައް އަންނާނެއެވެ. ކުރިން އުޅޭހާ ފަސޭހައިން ދުވެހަދައި ނޫޅެވިދާނެއެވެ. އެއާއެކު މި ބަދަލުތަކަށް ވިސްނައި ހަށިގަނޑަށް ފައިދާ ވާނެ ކަސްރަތުތަކެއް ކުރަން ފަށަން މުހިއްމެވެ.
މީހާ ދުވަސްވާރަކަށް މީހާ ހިނގާބިނގާ އުޅުމުގެ ފެންވަރު ދަށްވާނެއެވެ. މީހާގެ މަސްތަކާއި ހުޅުތަކުގެ އިތުރުން ކަށިތަކަށް ވެސް އޭގެ އަސަރު، ދުވަސްވާ ވަރަކަށް ކުރަން ފަށާނެއެވެ. ދުޅަހެޔޮ ސިއްހަތެއްގައި ނުހުންނަ ނަމަ މި ކަންތައް ގޯސްވާ މިންވަރު އަވަސް ވާނެއެވެ.
ނަމަވެސް, ރަނގަޅު ޑައިޓެއްގެ އިތުރުން ހަށިގަނޑާއި އުމުރާ ގުޅޭ ކަސްރަތުތަކެއް ބޭނުން ކުރާނަމަ މިފަދަ ކަންތައް ދިމާވާ މިންވަރު ކުޑަކޮށްލެވިދާނެއެވެ. ދުވަސްވާއިރު ވެސް މީހާ އެކްޓިވް ކޮށް އުޅުމަށް މިއިން ފުރުސަތު ލިބޭނެއެވެ. އެހެންވީމާ ދުވަސް ވާ ވަރަކަށް މީހާ ރަނގަޅު ސިއްހަތެއްގައި ހުރުމަށް ކުރެވިދާނެ ބައެއް ކަސްރަތުތަކަކީ ކޮބާ ހެއްޔެވެ؟
ރެޒިސްޓެންސް ޓްރެއިނިން
ދުވަސްވާ ވަރަކަށް މީހާގެ މަސްލްތައް ވެސް ކުޑަވެ އެ ގެއްލެން މެދުވެރިވާނެއެވެ. މިކަމަށް އޮތް ހައްލަކީ ރެޒިސްޓެންސް ޓްރެއިނިންއެވެ. މިއީ މީހާ އިތުރަށް ވަރުގަދަ ކުރުމަށް ބާރުއަޅާ ހަރަކާތްތަކެވެ. އޭގެ ތެރޭގައި ވެއިޓް ލިފްޓު ކުރުމާއި ޕުޝްއަޕް އަދި ސްކުއަޓްސް ފަދަ ކަސްރަތުތައް ހިމެނެއެވެ. މިފަދަ ކަންތައް ފަށާނީ ހަށިގަނޑަށް އެންމެ ފުރަތަމަ ވާ ވަރަކަށެވެ. ދެން މަޑުމަޑުން ބަރުދަން އިތުރުކޮށް ސެޓުތައް ވެސް ގިނަ ކުރާނީއެވެ.
މޮބިލިޓީ ވޯކް
މަސްލްގެ ދުޅަހެޔޮކަން ދެމެހެއްޓުމަކީ އެ މަސްލްތައް ގަނޑުވުން ނުވަތަ ބާރުވުން ވެސް ކުޑަކޮށްދޭނެ ކަމެކެވެ. އެއާއެކު މަސްލްތައް ގިނައިން ބޭނުން ކުރެވޭނެ ކަސްރަތުތައް ކުރުން ވަރަށް މުހިންމެވެ. އޭގެތެ ރޭގައި މުޅި ހަށިގަނޑުގެ ގިނަ ގުނަވަންތައް ސްޓްރެޗް ކުރެވޭ ފަދަ ހަރަކާތްތައް ހިމެނެއެވެ. މިސާލަކަށް ޕިލާޓީސް އާއި ޔޯގާ ފަދަ ކަސްރަތުތަކަކީ މީހާގެ މަސްލްތައް ބާރުވިޔަ ނުދިނުމަށް ކުރެވިދާނެ ކަންތައްތަކެވެ.
ބެލެންސް ކުރާ ކަސްރަތުތައް
ދުވަސްވާ ވަރަކަށް މީހާގެ ހަށިގަނޑު ބޭނުންވާ ގޮތަށް ގުޑާ ނުލައި ނަމަ އޭގެ ސަބަބުން މީހާ ވެއްޓުމަށް އެކަށީގެންވެއެވެ. ވެއްޓިއްޖެ ނަމަ އޭގެ ސަބަބުން ލިބިދާނެ ގެއްލުންތައް އިތުރަށް ބޮޑެވެ. އެހެންވީމާ މީހާގެ ބެލެންސް ހިފެހެއްޓޭނެ ކަސްރަތުތައް ކުރުން ވަރަށް މުހިންމެވެ. އޭގެ ތެރޭގައި މީހާގެ "ކޯ" ވަރުގަދަ ކުރާނެ ކަސްރަތުތައް ކުރަން ޖެހެއެވެ. މިސާލަކަށް ކްރަންޗް އާއި ސިޓަޕްސް އަދި ޕްލޭންކް ފަދަ ކަސްރަތުތަކަކީ މީހާގެ ކޯ ވަރުގަދަ ކޮށްދޭނެ ކަސްރަތުތަކެވެ.
މީހާގެ އުމުރުން ދުވަސްވާ ވަރަކަށް ވެސް ކަސްރަތު ކުރުމަކީ ހުއްޓާލައިގެން ވާނެ ކަމެއް ނޫނެވެ. ދުޅަހެޔޮ ސިއްހަތަކަށް ކަސްރަތަކީ ކޮންމެ އުމުރެއްގައި ވެސް މުހިންމު އެއްޗެކެވެ.