ރައްޔިތުންގެ ބޭނުންތަކަށް އިސްކަންދީގެން 15 އަހަރު ފަހުން ގަލޮޅު ސިޓީޕާކު އަލުން ހެދުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.
މި މަސައްކަތް ފަށާފައި ވަނީ، މިދިޔަ ހުކުރު ދުވަހުއެވެ. މިއީ އަލިކިލަގެފާނު މަގުގައި ހުންނަ ޕާކެކެވެ.
ގަލޮޅު ސިޓީ ޕާކު ތަރައްޤީ ކުރުމަށް ޓަކައި، ޕާކުގެ ވަށައިގެން ޓިނު ޖަހައި ބަންދުކުރުމަށް ފަހު 15 އަހަރު ވީއިރު، ވެސް އެ ތަނުގެ އެއްވެސް މަސައްކަތެއް ނުކޮށް އޮތުމުން، މަސްތުވާތަކެތި ބޭނުންކުރާ މީހުންގެ އައްޑާއަކަށް އެ ތަންވެ، އެ ކަމުގެ ސަބަބުން، އެ ސަރައްޙައްދުގައި ދިރި އުޅޭ ރައްޔިތުންނަށް، ތަފާތު އުނދަގޫތައް ވަމުންދާ ކަމަށާއި، އެ ކަމުގެ ޝަކުވާތައް ވެސް ކެނޑިނޭޅި، މާލެ ސިޓީ ކައުންސިލަށް ލިބެމުންދާކަމަށް އެ ކައުންސިލުން ވަނީ ފާހަގަ ކޮއްފައެވެ.
މި ކަމާ ގުޅިގެން މާލެ ސިޓީ ކައުންސިލްގެ މޭޔަރު އާދަމް ޢާޒިމްގެ އިސްނެންގެވުގެ މަތިން، ސިޓީ ޕާކުގައި ވަށައިގެން ޖަހާފަ ހުރި ޓިނުތައް ނަޓާލައި މިއަދު ވަނީ އެތަން ސާފުކޮށް ކޮންމެވެސް ވަރަކަށް އާބަތުރަ ފިލުވާފަވެއެވެ.
ގަލޮޅު ސިޓީ ޕާކުގެ ޕްލޭން
ގަލޮޅު ސިޓީ ޕާކު އަލުން ތައްޔާރުކުރުމުގެ މަސައްކަތް ކުރަނީ، އެ ތަނުގައި ޖާގަ އޮތް މިންވަރުން ރައްޔިތުންގެ ބޭނުންވާ ކަންކަމަށް، ވަރަށް ބޮޑަށް އިސްކަން ދީގެންކަށް ސިޓީ ކައުންސިލުން ވަނީ ފާހަގަކޮއްފައެވެ.
މި ގޮތުން ސިޓީޕާކު އަލުންހެދުމުގެ މަސައްކަތް ނިމޭއިރު ހުންނާނެ ތަންތަނަކީ:
- ތްރީ އޮން ތްރީ ބާސްކެޓް ކޯޓެއް
- އައުޓްޑޯ ބެޑްމިންޓަން ކޯޓެއް
- ދުވާ ޓްރެކްއެއް
- އައުޓްޑޯ ޖިމްއެއް
- ކުޑަކުދިން ކުޅޭނެ ހުސް ބިމެއް
- އިވެންޓް ބޭއްވުމަށް ޚާއްޞަ ސަރަޙަދެއް
- ޢުމުރުން ދުވަސްވީ މީހުންނަށް، އުނދޯލި ބަހައްޓައިގެން ތައްޔާރުކޮށްފަ އޮންނަ ހާއްސަ ސަރަޙައްދެއް
މި މަސައްކަތަކީ މޭޔަރު އާޒިމް މަގާމާ ހަވާލުވެ ވަޑައިގެންނެވުމަށް ފަހު، މާލެ ސިޓީއަކީ، ހިތްފަސޭހަ، އަމާން، ރައްކާތެރި އަދި އެކަކު އަނެކަކަށް އަޅައިލައި، އޯގާތެރި ރައްޔިތަކު ދިރިއުޅޭ ސިޓީއަކަށް ހެއްދެވުމަށް ކުރައްވާ މަސަކަތުގެ ތެރޭގައި ހިމެނޭ މަސައްކަތެކެވެ.