ދުންފަތާ ދުރުވާން ބޭނުންވާ މީހުންނަށް ބޭނުންވާ އެހީތެރިކަން ފޯރުކޮށްދޭ ހޮޓްލައިންގެ ޚިދުމަތް މިއަދު ފަށައިފިއެވެ.
އެ ޚިދުމަތް ހޯދުމަށް ގުޅާނެ ނަމްބަރަކީ 1676 އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު އެކްސްގައި ބުނެފައިވަނީ، ދުންފަތުގެ އިސްތިއުމާލުކުރުން ހުއްޓާލުމަށް ކުރާ މަސައްކަތުގައި އެ ހޮޓްލައިން މެދުވެރިކޮށް ތަޖުރިބާކާރުންގެ އިރުޝާދާއި އެހީތެރިކަން ކޮންމެ ވަގުތަކު ވެސް ލިބޭނެކަމަށެވެ.
އެ ހޮޓްލައިން ތައާރަފުކުރާނެކަން ހާމަކުރައްވައި މިދިޔަ ހަފުތާގައި ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވީ، ދުންފަތުގެ އިސްތިއުމާލުކުރުމަށް އާދަވެފައިވާ ފަރާތްތަކަށް އެކަން ހުއްޓާލުމަށް ބޭނުންވާ އެހީތެރިކަން މުޅި ރާއްޖޭގައި ލިބޭނެހެން ސިޒޭޝަންގެ ޚިދުމަތް ގާއިމުކުރުމަށް ކެބިނެޓުން ނިންމައިފައިވާ ކަމަށެވެ.
މީގެ އިތުރުން، ދުންފަތް ކޮންޓްރޯލްކުރަން ރާއްޖޭގައި ކުރަންޖެހޭ އެންމެހާ މަސައްކަތްތައް ދެމެހެއްޓެނިވި ގޮތެއްގައި ކުރިއަށް ގެންދިޔުމަށް ފަސް އަހަރު ދުވަހުގެ ޕްލޭނެއް އެކުލަވާލުމުގެ މަސައްކަތް ދުނިޔޭގެ ސިއްޙަތު ޖަމިއްޔާ، ޑަބްލިއުއެޗްއޯގެ އެހީތެރިކަމާ އެކު މިހާރު ފަށާފައިވާ ކަމަށް އޭނާ ވަނީ ވިދާޅުވެފައެވެ.
މިދިޔަ މަހުގެ 15 އިން ފެށިގެން ވަނީ އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އެފަދަ އާލާތްތައް ރާއްޖެ އެތެރެކުރުން މަނާކޮށްފައެވެ. އަދި ވޭޕް ބޭނުންކުރުން އަންނަ އާދިއްތަ ދުވަހުން ފެށިގެން މަނާވާނެއެވެ.
މި ސަރުކާރުން ދުންފަތާ ދެކޮޅަށް ކުރަމުންދާ މަސައްކަތްތަކުގެ ތެރެއިން ސިނގިރޭޓުގެ އިމްޕޯޓް ޑިއުޓީ ވެސް ވަނީ ބޮޑުކޮށްފައެވެ. އެއާއެކު ސިނގިރޭޓުގެ އަގު ވަނީ ވަރަށް ބޮޑު އުފުލިފައެވެ.