މާލޭގެ ކާނިވަލުގައި ހުރި ސްޓޭޖު ތަޅާލުމަށް ފަހު އެ ތަނުގައި އާ ސްޓޭޖެއް އަޅައިދޭނެ ބަޔަކު ހޯދަން މާލެ ސިޓީ ކައުންސިލުން އިއުލާންކޮށްފިއެވެ.
އިއްޔެ ކުރި އެ އިއުލާނުގައި ބުނެފައިވަނީ އެ ކައުންސިލްގެ ބެލުމުގެ ދަށުގައިވާ ކާނިވަލް ސްޓޭޖް ތަޅާލުމަށް ފަހު އަމިއްލަ ތަކެތީގައި އާ ސްޓޭޖެއް ތަރައްގީކޮށްދޭނެ ބަޔަކު ހޯދުމަށް ބޭނުންވާ ކަމަށެވެ.
މި މަސައްކަތުގެ އަންދާސީ ހިސާބު ހުށަހެޅުމަށް މިހާރު ހުޅަވާލާފައިވާއިރު، ސުންގަޑިއަކީ މި މަހުގެ 16 ވަނަ ދުވަހުގެ ހެނދުނު 11:00ގެ ކުރިންނެވެ. ސިޓީ ކައުންސިލުން ބުނި ގޮތުގައި އަންދާސީ ހިސާބު ހުށަހެޅޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އެކަންޏެވެ.
އިއުލާނާ އެކު ސިޓީ ކައުންސިލުން އާއްމުކޮށްފައިވާ މައުލޫމާތު ކަރުދާހުން އެނގޭ ގޮތުގައި ބިޑަށް ޕޮއިންޓް ދިނުމަށް ހަމަޖެހިފައިވާ ގޮތުގައި:
- މަސައްކަތުގެ އަގަށް 50 އިންސައްތަ
- މަސައްކަތުގެ މުއްދަތައް 15 އިންސައްތަ
- މަސައްކަތުގެ ތަޖުރިބާއަށް 10 އިންސައްތަ
- ބިޑް ހުށަހަޅާ ފަރާތުން ހުށަހަޅާ ކޮންސެޕްޓަށް 25 އިންސައްތަ
ސްޓޭޖް އެޅުމުގެ މަސައްކަތައް ކައުންސިލުން އަގު ދައްކާނީ މަސައްކަތްކޮށް ނިންމުމަށްފަހު ބިލް ކުރުމުން ކަމަށް ސިޓީ ކައުންސިލުން ބުންޏެވެ.
ފާހަގަކޮށްލެވޭ ގޮތުގައި ގިނަ ދުވަސްތަކެއް ވަންދެން ބޭނުންކުރަމުންދިޔަ ކާނިވާ ސްޓޭޖް މިހާރު ވަނީ ވަރަށް ބޮޑަށް ބާވެ، ހަލާކުވެފައެވެ. އެތަން އެކިއެކި އިޖުތިމާއީ ހަރަކާތްތަކަށާއި، ސްޓޭޖް ޝޯތަކުގެ އިތުރުން ސިޔާސީ ހަރަކާތްތައް ހިންގުމަށް ވެސް ބޭނުންކުރެއެވެ.