ހުޅުމާލޭ ދެވަނަ ފިޔަވަހީގައި ބިދޭސީއަކަށް ވަޅިން ހަމަލާދީ ފޭރުނުކަމުގެ ތުހުމަތުގައި މީހަކު ހައްޔަރުކޮށްފިއެވެ.
މި މައްސަލަ ފުލުހުންނަށް ރިޕޯޓުކުރީ އިއްޔެއެވެ.
ފުލުހުން މީޑިއާއާ ހިއްސާކުރި މެސެޖެެއްގައި ބުނީ، ދެވަނަ ފިޔަވަހީގައި ބިދޭސީއަކަށް ވަޅިން ހަމަލާދީ ފޭރުނުކަމުގެ ތުހުމަތުގައި މީހަކު ހައްޔަރުކޮށްފައިވާ ކަމަށެވެ.
އަނިޔާވި ބިދޭސީ މީހާއަށް ހިޔާގެ އެޗް16 ޓަވަރުގައި ހުރި ކްލިނިކުން ފަރުވާދިނުމަށް ފަހު ވަނީ ދޫކޮށްލާފައެވެ.
މި މައްސަލައިގައި ތުހުމަތުކުރެވޭ މީހާ ހޯދަން ސީސީޓީވީ ފޮޓޭޖް ބަލައި، އިއްޔެގެ ވަގުތެއްގައި އެ މީހާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ބުންޏެވެ. އެއީ، ހއ. މާރަންދޫ/ އުތުރުގެ، އިބްރާހިމް މުޙައްމަދު (40އ)އެވެ.
އޭނާގެ ބަންދާ މެދު ގޮތެއް ނިންމަން މިއަދު ހުޅުމާލޭ މެޖިސްޓްރޭޓް ކޯޓަށް ހާޒިރުކުރުމުން ތަހުގީގު ނިމެންދެން ބަންދުކޮށްފައިވާ ކަމަށް ފުލުހުން ބުންޏެވެ.
މި މައްސަލައިގެ ތުހުމަތުގައި އިތުރު މީހަކު ހޯދުމުގެ މަސައްކަތް ފުލުހުން އަންނަނީ ކުރަމުންނެވެ.