ކ. ގާފަރުގައި އާންމުންނަށް އުނދަގޫވާގޮތަށް ހަޓް ހަދައިގެން މަސްކައްކާ މައްސަލަ ބޮޑުވެ، އެކަމަށް ފިޔަވަޅު އަޅަން އެރަށު ކައުންސިލުން ނިންމައިފިއެވެ.
ގާފަރު ކައުންސިލުން މިއަދު ނެރުން އިއުލާނެއްގައި ވަނީ، އެ ރަށުގެ އެކި ސަރަހައްދުތަކުގައި ހަޓް ހަދައިގެން މަސްކެއްކުމުގެ މަސައްކަތް ކުރުމުގެ ސަބަބުން އަރާދުމުގެ ސަބަބުން އެސަރަހައްދުތަކުގައި ދިރިއުޅޭ ފަރާތްތަކަށް ސިއްޚީ ގޮތުންނާއި އަދި އެހެނިހެން ގޮތްގޮތުން ވެސް އުނދަގޫވާ ކަމަށެވެ. އަދި އެކަމުގެ ޝަކުވާތައް ކައުންސިލަށް ލިބޭކަމަށް އިއުލާނުގައި ވެއެވެ.
އެކަމަކީ އެކިފަހަރުމަތިން މަނާކޮށްފައިވާ ކަމެއްކަމަށް ވެސް ކައުންސިލުން ވަނީ ބުނެފައެވެ.
މަގުތަކާއި ގޯޅިތަކާއި އިޖުތިމާއީ ސަރަހައްދު ތަކާއި ހޭޅިފަށުގައި ތަކެތި ބެހެއްޓުމާއި ހަޓް ހެދުމާ ގުޅޭ ގަވާއިދުގެ ނުވަވަނަ ނަމްބަރުގެ ދަށުން އެއްވެސް ފަރާތަކުން ހަޓް ހަދަންވާނީ ކައުންސިލުން ހުއްދަ ލިބިގެން ކަމަށް ބަޔާންކޮށްފައި ވާނެ ކަމަށް އިއުލާނުގައި ވެއެވެ.
އާންމު އުނދަގުލާބެހޭ ގަވާއިދުގެ 11ވަނަ ނަންބަރުގައި އަވަށްޓެރިންނަށް އުނދަގޫވާގޮތަށް އަލިފާން ރޯކޮށް އެއަލިފާނުގެ ސަބަބުން އުފެދޭ ދުމުން އަވަށްޓެރިންނަށް އުނދަގޫ ވާނަމަ އެފަދަ ކަމެއް ކޮށްގެން ނުވާނެކަމަށް ބަޔާންކޮށްފައި ވާކަމަށް ވެސް އެރަށުގެ ކައުންސިލުން ވަނީ ބުނެފައެވެ.
އެހެންކަމުން އެއްވެސް ފަރާތަކުން ހަޓް ހަދައިގެންނާއި އެހެނިހެން ގޮތްގޮތުން އާންމުންނަށް އުނދަގޫވާގޮތަށް މަސްކެއްކުމުގެ މަސައްކަތް ކުރުމުގެ ސަބަބުން ކައުންސިލަށް ޝަކުވާއެއް ހުށަހެޅިއްޖެނަމަ އެމައްސަލައެއް ބަލައި ހަމަޖެހިފައިވާ އުސޫލުގެމަތިން ފިޔަވަޅު އެޅޭނެކަމަށް އެ ކައުންސިލުން ވަނީ ބުނެފައެވެ.