ދަރިވަރުންގެ އުމުރާ ނުގުޅޭ ވާހަކަ ދައްކާ، ދަރިވަރުން ގްރޫމްކުރި ޓީޗަރެއްގެ މައްޗަށް ދައުވާ އުފުލުމަށް ޕްރޮސެކިއުޓާ ޖެނެރަލް (ޕީޖީ) އޮފީހަށް މިދިޔަ މަހުގެ 25ވަނަ ދުވަހު ފޮނުވާފައި ވާކަމަށް ފުލުހުން ބުނެފިއެވެ.
ދަރިވަރުންގެ އުމުރާ ނުގުޅޭ ވާހަކަ ދައްކާ، ދަރިވަރުން ގްރޫމްކުރިކަމަށް ތުހުމަތު ކުރާ މައްސަލައެއް ފުލުހަށް ރިޕޯޓުކުރީ މިދިޔަ އޮކްޓޯބަރު މަހުގެ 17ވަނަ ދުވަހުއެވެ.
ފުލުހުން ބުނީ މި މައްސަލަ ރިޕޯޓު ކުރީ މ، ފ، ދ، ތ، ލ. އަތޮޅުގެ ތެރެއިން އަތޮޅެއްގެ ރަށަކުން ކަމަށެވެ. މި މައްސަލައަކީ ކުޑަކުދިން ޝާމިލުވާ މައްސަލައަކަށް ވުމުން، ކުއްޖާގެ އައިޑެންޓިޓީ ރައްކާތެރި ކުރުމުގެ ގޮތުން ކުއްޖާ ނިސްބަތްވާ ރަށް ފުލުހުން ހާމަކޮށްފައެއް ނުވެއެވެ.
މި މައްސަލައިގައި ކޯޓު އަމުރެއްގެ ދަށުން ހައްޔަރު ކުރީ އުމުރުން 29 އަހަރުގެ ފިރިހެނެކެވެ. އޭނާ ހައްޔަރު ކުރީ އޮކްޓޯބަރު 27ވަނަ ދުވަހުއެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 20 ދުވަހަށް ބަންދުކުރަން މުއްދަތު ޖެހިއެވެ. އަދި އެއަށްފަހު 30 ދުވަހަށް ބަންދުކުރަން އަމުރުކުރިއެވެ.
ފުލުހުން ބުނީ މި މައްސަލައިގެ ތަހުގީގު ނިންމާ ދައުވާކުރަން މިހާރު ޕީޖީއަށް ފޮނުވާފައި ވާކަމަށެވެ.
މިފަދަ މައްސަލަތައް ރާއްޖޭގެ އެކި ހިސާބުތަކުން ދޭތެރެއަކުން ފެންމަތިވެއެވެ.