ރައްޔިތުންގެ ޓެކްސް ފައިސާއިން މުސާރަ ނަގައިގެން ތިބޭ ސިޔާސީ މީހުންގެ މައުލޫމާތު ހާމަކުރަންޖެހޭނެ ކަމަށް ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒު މިރޭ ވިދާޅުވެއްޖެއެވެ.
ސަރުކާރުގެ ސިޔާސީ މަގާމުތަކުގައި ތިބި 248 މީހަކު ވަކިކުރިއިރު، އެއީ ކޮން ބައެއްކަން އެނގޭ ގޮތަށް މައުލޫމާތު ހޯދުމަށް އެދުމުން، އެއީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން ދޫކުރެވޭނެ މައުލޫމާތެއް ނޫން ކަމަށް ސަރުކާރާ ހަވާލާދީ ބައެއް ނޫސްތަކުން ވަނީ ބުނެފައެވެ.
ޑިމޮކްރެޓްސްއިން މިރޭ ބޭއްވި ކަންމަތީ ޖަލްސާގައި، މި ކަމާ ގުޅިގެން ވާހަކަ ދައްކަވަމުން ޝިފާޒު ވިދާޅުވީ ރައްޔިތުންގެ ޓެކްސް ފައިސާއިން މުސާރަ ނަގައިގެން ސިޔާސީ ތިބޭ މީހުން ރައްޔިތުންނަށް ފޮރުވަން ޖެހޭ ކަމެއް ނޯންނާނެ ކަމަށެވެ.
އެ ގޮތުން ސިޔާސީ މަގާމުތަކުގައި ތިބީ ކޮން ބައެއް ކަމާއި، އެ މީހުން ވަޒީފާ އަދާކުރި އޮފީހާއި ވަޒީފާގައި ކުރި މަސައްކަތް ވެސް ރައްޔިތުންނަށް އެނގެން ޖެހޭނެ ކަމަށް ޝިފާޒު ވިދާޅުވިއެވެ.
"...އެ ކަން ހިނގާ ގޮތް އިނގޭތީ މި ދެންނެވީ. އެއީ އެންމެ ހާމަކަން ބޮޑު ގޮތުގައި މަސައްކަތް ކުރަންޖެހޭ ފަރާތްތައް، ސިޔާސީ ބޭފުޅުންނަކީ... އެއީ ކޮން ބައެއްކަން ސިއްރުކުރަން ސަރުކާރެއް މި ގޮތަށް ބާއްވާކަށް އަޅުގަނޑުމެން ނުތިބޭނަން," ޝިފާޒު ވިދާޅުވިއެވެ.
އަސާސީ ހައްގުތައް ހިމާޔަތްކޮށްދިނުމަށް ރައްޔިތުންނަށް ހޯދައިދިން ގާނޫނު އަސާސީގައި ވެސް އެންމެ މުހިންމު އެއް ކަމަކީ ދެ ފުށް ފެންނަ ނިޒާމަކުން ވެރިކަން ހިންގުންކަން ޝިފާޒު ފާހަގަކުރެއްވިއެވެ.
ސަރުކާރުގެ ޚަރަދު ކުޑަކުރަން 15 ދުވަހުގެ ތެރޭ 228 ސިޔާސީ މުވައްޒަފުން މަގާމުން ވަކިކުރައްވާނެ ކަމަށް ރައީސް ޑރ. މުހައްމަދު މުއިއްޒު އިއުލާން ކުރެއްވީ މިދިޔަ އޮކްޓޫބަރުމަހުގެ 15ގައެވެ.
ވަކިކުރާނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި 109 ސީނިއާ ޕޮލިޓިކަލް ޑިރެކްޓަރުންގެ އިތުރުން 69 ޕޮލިޓިކަލް ޑިރެކްޓަރުން ކަމަށް މީގެ ކުރިން އެ މަނިކުފާނު ވިދާޅުވެފައިވެއެވެ. އެއީ ޖުމްލަ 221 ސިޔާސީ މަގާމެވެ.
އޮކްޓޫބަރު 31ގެ ނިޔަލަށް ސަރުކާރުގެ 248 ސިޔާސީ މުވައްޒަފުން ވަކިކޮށްފައިވާ ކަމަށް ރައީސް އޮފީހުގެ ތަރުޖަމާން ހީނާ ވަލީދުވަނީ ނޮވެންބަރުމަހުގެ އެއްވަނަ ދުވަހު ވިދާޅުވެފައެވެ. އެހެން ނަމަވެސް އެއްވެސް ތަފުސީލެއް ހާމައެއް ނުކުރައްވައެވެ.
މި ސަރުކާރުގެ ސިޔާސީ މަގާމުތަކުގައި ތިބި މީހުންގެ އަދަދު 700އަށްވުރެ އިތުރުނުވާނެ ކަމަށް މީގެ ކުރިން ބުނެފައިވެއެވެ. އެހެން ނަމަވެސް ސަރުކާރުގެ އެކި އިދާރާތަކުން ހިއްސާކޮށްފައިވާ މައުލޫމާތަށް ބަލާއިރު، ސިޔާސީ މަގާމުތައް 1،400 އަށްވުރެ އިތުރުވާނެ ކަމަށް ބެލެވެއެވެ.