މޯލްޑިވްސް ޙައްޖު ކޯޕަރޭޝަނުން ގެސްޓް ހައުސް ވިޔަފާރިކުރުމުގެ ނަތީޖާ ރަނގަޅުނުވާނެ ކަމަށް އިއްޔެ ފިނޭންސް މިނިސްޓަރު މޫސާ ޒަމީރު ވިދާޅުވުމުން، އެ ކަމުގައި މިނިސްޓްރީގެ ލަފައަށް އެ ކޯޕަރޭޝަނުން ތަބާވާނެ ކަމަށް މޯލްޑިވްސް ޙައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް މިއަދު ވިދާޅުވެއްޖެއެވެ.
ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހެދުމަށްޓަކައި ކ. މާފުށީގައި ސިޓީ ހޮޓަލެއް ތަރައްގީކޮށް ގެސްޓްހައުސް ވިޔަފާރީގެ ތެރެއަށް ވަނުމަށް ނިންމާފައިވާ ކަމަށް ޝަކީލް ވަނީ މިދިޔަ މަހު ވިދާޅުވެފައެވެ.
އެ ކަމާ ގުޅިގެން ރައްޔިތުންގެ މަޖިލީހުގެ އިއްޔެގެ ޖަލްސާގައި ފިނޭންސް މިނިސްޓަރު ޒަމީރު ވިދާޅުވީ، ޙައްޖު ކޯޕަރޭޝަނުން ގެސްޓްހައުސް ވިޔަފާރިކުރުމާ މެދު އެ ކުންފުނީގެ ބޯޑުންނާ ހިއްސާދާރުން ވިސްނާލަންޖެހޭ ކަމަށެވެ. އަދި، އެ ފަދައިން ވިޔަފާރިކުރުމުގެ ނަތީޖާ ރަނގަޅުނުވާނެ ކަމަށް ވެސް ޒަމީރު ވިދާޅުވިއެވެ.
އެ ކަމާ ގުޅިގެން "ސަން"އިން ސުވާލުކުރުމުން ޝަކީލް ވިދާޅުވީ، އެ ކަމުގައި ސަރުކާރާ ވާހަކަދައްކާ މަޝްވަރާކުރަމުން އަންނަ ކަމަށެވެ. ޙައްޖު ކޯޕަރޭޝަނަކީ 100 ޕަސެންޓް ސަރުކާރު ހިއްސާވާ ކުންފުންޏަކަށްވެފައި އެ ކުންފުނީގެ ޝެއާހޯލްޑަރަކަށް ވާނީ ވެސް ފިނޭންސް މިނިސްޓްރީ ކަމަށް ޝަކީލް ވިދާޅުވިއެވެ.
އެހެންކަމުން ފިނޭންސުން ދޭ ލަފައަށް ތަބާވާނެ ކަމަށާއި އެ ކަމާ މެދު އަހާނެ އިތުރު ސުވާލެއް ވެސް ނޯންނާނެ ކަމަށް ޝަކީލް ވިދާޅުވިއެވެ.
"އެހެންވީމާ ފިނޭންސް މިނިސްޓްރީން އެގޮތަށް ވިދާޅުވާ ކަމަށް ވާނަމަ މާނައަކީ އަޅުގަނޑުމެން ފޮލޯ ކުރާނީ ފިނޭންސް މިނިސްޓްރީގެ ލަފާ، ފިނޭންސް މިނިސްޓްރީގެ އެންގުން. އެއާ ދޭތެރޭގައި އެއްވެސް ސުވާލެއް ނޯންނާނެ،" ޝަކީލް ވިދާޅުވިއެވެ.
މާފުށީގައި ޙައްޖު ކޯޕަރޭޝަނުން އިސްލާމިކް ޓޫރިޒަމް ފަށަން ތައްޔާރުވަމުން އަންނަ ކަމަށް ޝަކީލް ވިދާޅުވިއިރު އެ ކުންފުނިން މިހާރު ޙައްޖަށް މީހުން ފޮނުވަނީ ގެއްލުމުގައެވެ.
އެ ގޮތުން، މިހާރު ޙައްޖަށް ގެންދާ އަގަކީ 2013 ވަނަ އަހަރު ކަނޑައެޅި އަގެކެވެ. އެއީ، 69،965 ރުފިޔާއެވެ. ޝަކީލް ވިދާޅުވީ، 3،000 މީހުން ޙައްޖަށް ގެންދާނަމަ ޙައްޖު ކޯޕަރޭޝަނުން މިހާރު އިތުރަށް 30 މިލިއަން ރުފިޔާ ޚަރަދުކުރަން ޖެހޭ ކަމަށް ޝަކީލް މީގެ ކުރިން ވިދާޅުވިއެވެ.