މޯލްޑިވްސް ޙައްޖު ކޯޕަރޭޝަނުން ގެސްޓް ހައުސް ވިޔަފާރިކުރުމާ މެދު އެ ކުންފުނީގެ ބޯޑުންނާ ހިއްސާދާރުން ވިސްނާލަންޖެހޭ ކަމަށާއި ހުރިހާ ކުންފުންޏަކުން އެ ފަދައިން ވިޔަފާރިކުރުމުގެ ނަތީޖާ ރަނގަޅުނުވާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ވަޑައިގެން މިނިސްޓަރު ޒަމީރު ވަނީ މެންބަރުން ކުރެއްވި ސުވާލުތަކަށް ޖަވާބުދާރީވެވަޑައިގެންފައެވެ. އެގޮތުން، ވެލިދޫ ދާއިރާގެ މެންބަރު މުހައްމަދު އައްބާސް ވަނީ ޙައްޖު ކޯޕަރޭޝަނުން ގެސްޓްހައުސް ވިޔަފާރިއަށް ވަނުމުން ދެން ވާނީ ކިހިނެއްތޯ ސުވާލުކުރައްވާފައެވެ.
އެ ސުވާލުގެ ޖަވާބުގައި ޒަމީރު ވިދާޅުވީ، ކުންފުނީގައި އެކްސެސް ފަންޑު ހުރެއްޖެނަމަ އެކަމުގެ ސްޕެޝަލިސްޓުންނާ ހަވާލުކޮށްގެން ފަންޑު މެނޭޖްކޮށްގެން އޭގެ ފައިދާ ކުންފުންޏަށް ހޯދައިފިކަމަށްވާނަމަ އޭގެ ނަތީޖާ ރަނގަޅުވާނެ ކަމަށެވެ. ޓޫރިޒަމަށް އިންވެސްޓްކުރެވޭނެ ކުންފުނިތައް ސަރުކާރުގެ އެސްއޯއީތަކުގައި އެބަހުރި ކަމަށް ވެސް އޭނާ ވިދާޅުވިއެވެ.
އެހެންނަމަވެސް، ހުރިހާ ކުންފުނިތަކުން ގެސްޓްހައުސް ވިޔަފާރިއަށް ވަނުމުން އޭގެ ނަތީޖާ ރަނގަޅެއް ނުވާނެ ކަމަށް އޭނާ ވިދާޅުވިއެވެ.
"ޙައްޖު ކޯޕަރޭޝަނަށް ބަލާނަމަ ފަންޑު ލިބުނީމާ އެ ފަންޑު މެނޭޖްކުރުމަށް އެ މީހުންނާ މި ހަވާލުވަނީ. އެ ފަންޑު ނަގައިގެން އެ މީހުން ޙައްޖަށް ފޮނުވަން. އެހެންވީމާ އަޅުގަނޑަށް ހީވަނީ އަސްލު ގެސްޓްހައުސް ހިންގަން ޙައްޖު ކޯޕަރޭޝަނުން މަސައްކަތްކުރުން އޭގެ ޒާތުގައި އެންމެ ފައިދާ ހުރި ގޮތްތޯ ކުންފުނިގެ ބޯޑުންނާ ކުންފުނީގެ ހިއްސާދާރުން އެބަޖެހޭ ވިސްނާލަން،" ޒަމީރު ވިދާޅުވިއެވެ.
"އެހެންނަމަވެސް ހުރިހާ ކުންފުނިތަކުން އެޗްޑީސީއާއި ޙައްޖު ކޯޕަރޭޝަނާ ނޫނީ ފެނަކައާ އެންމެން ގެސްޓްހައުސްއާއި ރިސޯޓު ހެދީމާ އަޅުގަނޑަށް ހީވަނީ އޭގެ ނަތީޖާ ރަނގަޅެއް ނުވާނެހެން،"
ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހެދުމަށްޓަކައި ކ. މާފުށީގައި ސިޓީ ހޮޓަލެއް ތަރައްގީކޮށް ގެސްޓްހައުސް ވިޔަފާރީގެ ތެރެއަށް ވަނުމަށް ނިންމާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު ޝަކީލް ވަނީ މިދިޔަ މަހު ވިދާޅުވެފައެވެ.
އެގޮތުން، މާފުށީގައި އެ ކުންފުނިން ހަލާލް ޓޫރިޒަމް ފަށަން ތައްޔާރުވަމުން އަންނަ ކަމަށް އޭނާ ވިދާޅުވިއެވެ.
ޝަކީލް ވިދާޅުވި ގޮތުގައި ޙައްޖު ކޯޕަރޭޝަނުން މިހާރު ޙައްޖަށް މީހުން ފޮނުވަނީ ގެއްލުމުގައެވެ. އެ ގޮތުން، މިހާރު ޙައްޖަށް ގެންދާ އަގަކީ 2013 ވަނަ އަހަރު ކަނޑައެޅި އަގެކެވެ. އެއީ، 69،965 ރުފިޔާއެވެ. ޝަކީލް ވިދާޅުވީ، 3،000 މީހުން ޙައްޖަށް ގެންދާނަމަ ޙައްޖު ކޯޕަރޭޝަނުން މިހާރު އިތުރަށް 30 މިލިއަން ރުފިޔާ ޚަރަދުކުރަން ޖެހޭ ކަމަށެވެ.
އެހެންވެ، ޙައްޖަށް މީހުން ގެންދާ އަގު ކުޑަކުރަން ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހަދަން މަސައްކަތްކުރައްވާ ކަމަށް އޭނާ ވިދާޅުވިއެވެ.
މީގެ އިތުރުން، ޙައްޖު ކޯޕަރޭޝަނުން އަންނަނީ ހުޅުމާލޭގައި ލަގްޒަރީ އެޕާޓްމަންޓްތަކެއް ވެސް ބިނާކުރަމުންނެވެ. ޝަކީލް ވިދާޅުވި ގޮތުގައި މިހާރު ކުރިއަށް ދަނީ އެ އިމާރާތް ކުރެހުމުގެ މަސައްކަތެވެ. ކުރިއަށް އޮތް ދެތިން މަހެއް ތެރޭ އެ މަސައްކަތް އެވޯޑުކުރެވޭނެ ކަމަށް އޭނާ ވިދާޅުވިއެވެ.
ސަރުކާރުން ވަނީ ޙައްޖަށް މީހުން ގެންދަން ލިބޭ ހުރިހާ ކޯޓާއެއް ޙައްޖު ކޯޕަރޭޝަނަށް ދޭން ނިންމައިފައެވެ.
އެކަމަކު، އަންނަ އަހަރުން ފަށައިގެން ކޯޓާ އިތުރުވެއްޖެ ނަމަ، އިތުރުވާ ބައިން އަމިއްލަ ޖަމާއަތްތަކަށް ދިނުމުގެ ވިސްނުން ވެސް ގެންގުޅުއްވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މީގެ ކުރިން ވިދާޅުވެފައިވެއެވެ.