ޒީޓީވީގެ ކާމިޔާބު ޑްރާމާ ސީރީޒްގެ ބަތަލާ ޝްރައްދާ އާރްޔާއަށް އެއްމާބަނޑު ދެ ކުދިން ލިބިއްޖެއެވެ.
މިދިޔަ މަހުގެ 29ގައި ވިހެއި ބަތަލާއަށް ލިބިފައިވަނީ އަންހެން ކުއްޖަކާއި ފިރިހެން ކުއްޖެކެވެ. ޝްރައްދާއަށް އެއްމާބަނޑު ދެ ކުދިން ލިބިފައިވާކަން އިއުލާނުކޮށްފައިވަނީ ސޯޝަލް މީޑިއާ މެދުވެރިކޮށް ކުރި ޕޯސްޓެއްގައެވެ.
އިންސްޓަގްރާމްގައި ކުރި ޕޯސްޓުގައި ބަތަލާ ދެ ކުދިން އުރާލައިގެން ހުރި ފޮޓޯގެ ކެޕްޝަންގައި ޝްރައްދާ ބުނެފައިވަނީ، އެ އާއިލާއަށް ލިބުނު އުފާވެރިކަން ދެގުނަ އިތުރުވެފައިވާ ކަމަށެވެ. ޝްރައްދާއާއި ފިރިމީހާ އާރްޔާގެ ހިތް އުފަލުން ފުރިއްޖެ ކަމަށާއި އެ އާއިލާ ފުރިހަމަވީ ހީވެސް ނުކުރާވަރުގެ އުފާވެރިކަމަކާ އެކު ކަމަށް ބަތަލާ ވަނީ ބުނެފައެވެ.
ޝްރައްދާ ފިރިމީހާ އާރްޔާއާ އެކު--ފޮޓޯ/ޒޫމް
އިންޑިއާގެ ނޭވީ އޮފިސަރެއް ކަމަށްވާ އާރްޔާއާ ޝްރައްދާގެ ކައިވެނިކުރީ ވަނީ 2021 ވަނަ އަހަރެވެ. މި އަހަރުގެ ސެޕްޓެމްބަރު މަހު ޝްރައްދާ ބަލިވެއިންކަން އިއުލާނުކޮށްފައިވާއިރު ހަތް އަހަރު ވަންދެން މަސައްކަތް ކުރި ޓީވީ ސިލްސިލާ "ކުންދަލީ ބަގިޔާ" ޑްރާމާ ސިލްސިލާ ބަތަލާ ވަނީ ދޫކޮށްލާފައެވެ.
ދިގު މުއްދަތެއް ވަންދެން މަސައްކަތްކުރި ޑްރާމާ ސިލްސިލާ ދޫކޮށްލުމަކީ ފަސޭހަ ނިންމުމެއް ނޫން ކަމަށާއި ނަމަވެސް ކައިވެންޏަށް ފަހު އިތުރު ޒިންމާތަކެއް ދިރިއުޅުމަށް އިތުރުވެ މަންމައެއްގެ ޒިންމާ އެންމެ ފުރިހަމައަށް އަދާކުރަން ބޭނުންވާތީ މި ވަގުތަށް އެންމެ ރަނގަޅު ނިންމުމަކީ އެ ސިލްސިލާއިން ވަކިވުން ކަމަށް ބަތަލާ ވަނީ ބުނެފައެވެ.
ޓީވީ ސިލްސިލާތަކުގެ އިތުރުން ޝްރައްދާ ވަނީ ބައެއް ފިލްމުތަކުގައި ވެސް މަސައްކަތް ކޮށްފައެވެ. އޭގެ ތެރޭގައި މިދިޔަ އަހަރު ދަރުމާއިން ގެނެސްދިން "ރޮކީ އޯރް ރާނީ ކީ ޕްރޭމް ކަހާނީ" ހިމެނޭއިރު ޝްރައްދާގެ މަގުބޫލު ޑްރާމާ ސިލްސިލާތަކުގެ ތެރޭ "ތުމާރީ ޕާކީ"، "ޑްރީމް ގާލް" އަދި މޭ ލަކްޝްމީ ތޭރޭ އާގަންކީ" ހިމެނެއެވެ.