ފިލްމު "ޓުވެލްތު ފެއިލް" އަދި "ޕިރް ހަސީން ދިލްރުބާ"އިން ބޮޑު މަގުބޫލުކަމެއް ހޯދި އެކްޓަރު ވިކްރާންތު މަސީ ފިލްމީ ދާއިރާ މުޅިން ދޫކޮށްލީ ނޫން ކަމަށް ބުނެފިއެވެ.
ވިކްރާންތު ސޯޝަލް މީޑިއާގައި ކުރި ޕޯސްޓާ ގުޅިގެން ބައެއް މީޑިއާތަކުން އެ ވާހަކަ ލިޔެފައި ވަނީ އާއްމުންނަށް އޮޅޭފަދަ ގޮތަކަށް ކަމަށާއި އާއިލާއަށް ވަގުތު ހުސްކުރުމުގެ ފިލްމީ ދާއިރާއިން ދުވަސްކޮޅަކަށް ދުރަށްދާން ނިންމީ ސިއްހީ ސަބަބުތަކަކާ ހެދި ކަމަށް ވިކްރާންތު ވަނީ ބުނެފައެވެ. ނަމަވެސް އެކްޓަރަށް ދިމާވެފައިވާ ސިއްހީ މައްސަލަތަކާ ގުޅޭ ތަފުސީލެއް މިހާތަނަށް ހާމަކޮށްފައެއް ނުވެއެވެ.
ވިކްރާންތު ފިލްމު "ޓުވެލްތު ފެއިލް"ގެ މަންޒަރެއްގައި--ފޮޓޯ/ބޮލީވުޑްހަންގާމާ
ފިލްމީ ޚަބަރުތައް ގެނެސްދޭ ނިއުސް 18އަށް ދިން އިންޓަވިއުގައި ހުނަރުވެރި އެކްޓަރު ބުނީ އޭނާގެ މައިންބަފައިންގެ މަތިންނާއި އާއިލާގެ މެމްބަރުންގެ މަތިން ވަރަށް ބޮޑަށް ހަނދާންވާ ކަމަށާއި ފިލްމީ ދާއިރާއަށް ވަރަށް ވަގުތު ދެވިއްޖެ ކަމަށެވެ.
އެގޮތުން މީހާ މިހާރު 'ބާންޑް އައުޓް' ވެއްޖެ ކަމަށާއި އިންޑަސްޓްރީއިން ރިޓަޔާނުވެ ބޭނުން ވަނީ ވަރަށް ބޮޑު ބްރޭކެއް ފިލްމީ ދާއިރާއިން ނަގަން ކަމަށް 37 އަހަރުގެ އެކްޓަރު ވަނީ ބުނެފައެވެ.
އިންސްޓަގްރާމްގައި ވިކްރާންތު ކުރި ޕޯސްޓުގައި ބުނެފައި ވަނީ އޭނާ ދެން ބެލުންތެރިންނަށް ފެންނާނީ އަންނަ އަހަރު ރިލީޒް ކުރަން ތައްޔާރުވަމުން އަންނަ ދެ ފިލްމަކުން ކަމަށާއި އެއީ ބެލުންތެރިންނާ އޭނާ ބައްދަލުކުރާނެ އެންމެ ފަހު ދެ ފިލްމު ކަމަށާއި ބެލުންތެރިންގެ ފަރާތުން މިހާތަނަށް ލިބެމުން އައި ތަރުހީބާއި ލޯތްބަށް ޝުކުރު އަދާކުރާ ކަމަށެވެ.
ވިިކްރާންތު ފިލްމީ ދާއިރާއިން ނުފެންނާނެކަން އިއުލާނުކުރުމާ ގުޅިގެން އޭނާގެ ސަޕޯޓަރުން ވަނީ މާޔޫސީގެ މެސެޖުތައް އެކްޓަރަށް ފޮނުވާ ކަންބޮޑުވުން ފާޅުކޮށްފައެވެ. ވިކްރާންތުގެ އެންމެފަހުން ރިލީޒްވި ފިލްމަކީ "ދަ ސަބަރުމަތީ"ގެ ނަމުގައި ގެނެސްދިން ޕޮލިޓިކަލް ޑްރާމާއެކެވެ.