ސަރުކާރުން ގާއިމްކުރި ޕެޓް ކެއާ ފެސިލިޓީ، "އޮޅު ހިޔާ"ގައި ޚިދުމަތްތައް ދޭނެ ގޮތްތައް މިހާތަނަށް ހަމަޖެހިފައި ނެތުމުން އެ ފެސިލިޓީއަށް މިހާރު ނުގެންދިޔުމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން މިއަދު އެދިއްޖެއެވެ.
މިނިސްޓްރީން އެގޮތަށް އެދިފައިވަނީ، މާލޭގެ މަގުމަތީގައި ދިރިއުޅޭ ބުޅާތައް ނަގައި މި ހަފުތާއިން ފެށިގެން ފެސިލިޓީއަށް ގެންދަން ފަށާނެ ކަމަށް މާލޭ ސިޓީ ކައުންސިލުން މިދިޔަ ހަފުތާގައި ބުނެފައި ވަނިކޮށެވެ.
އެގްރިކަލްޗާ މިނިސްޓްރީން މިއަދު ނެރުނު ނޫސްބަޔާނެއްގައި ވަނީ މާލޭގެ މަގުމަތީގައި އުޅޭ ބުލާތައް އޮޅުހިޔާއަށް ގެންދިޔުމުގައި އަމަލުކުރާނެ ގޮތުގެ ޕްލޭންތައް މިނިސްޓްރީއިން މާލެ ސިޓީ ކައުންސިލާ ހިއްސާކޮށްފައި ވީނަމަވެސް އެ ކައުންސިލުގެ ހިޔާލެއް މިހާތަނަށް ލިބިފައި ނުވާތީ ބުޅާތައް މިވަގުތު އޮޅުހިޔާއަށް ގެންދިއުމަކީ ފެންނަ ކަމެއް ނޫން ކަމަށް ބުނެފައެވެ.
މިނިސްޓްރީން ވަނީ އެ އެސްއޯޕީތަކަށް ރިއާޔަތްނުކޮށް އެތަނަށް ބުޅާތައް ގެންދަން ފަށައިފިނަމަ ބުޅާތަކުގެ ސިއްހަތާއި ދުޅަހެޔޮކަމަށް ނޭދެވޭ އަސަރުތަކެއް ކުރުން އެކަށީގެންވާ ކަމަށް ބުނެފައެވެ. އަދި އެސްއޯޕީގައި ބަޔާންކޮށްފައިވާ އިންތިޒާމުތައް ހަމަނުޖައްސާ އޮޅުހިޔާއަށް ގެންދިއުމުން ބުޅާތަކަށް އަޅާލުމަށް ބޭނުންވާ މިންގަނޑުތައް ކަށަވަރު ނުވުމުގެ ނުރައްކާ އެބައޮތްކަން ވެސް މިނިސްޓްރީން ވަނީ ފާހަގަކޮށްފައެވެ.
ބުޅާތައް އޮޅުހިޔާއަށް ގެންދަން ނުފެންނަ ކަމަށްބުނެ މިނިސްޓްރީއިން ވަނީ ގެންދަން ނުފެންނަ ސަބަބުތައްވެސް ހާމަކޮށްފައެވެ. އެގޮތުން:
- އޮޅުހިޔާ އަދި އެތަނުގައި މަސައްކަތްކުރާ އެއްވެސް ފަންނީ މަސައްކަތްތެރިއަކު މިހާތަނަށް ރަޖިސްޓްރީ ކުރެވިފައި ނުވުން
- އަލަށް ގެނެވޭ ބުޅާތައް ކަރަންޓީނުކުރުމަށް ބޭނުންވާ ކޮށިތައް މިވަގުތު އޮޅުހިޔާގައި ނެތުން
- އޮޅުހިޔާގެ އޮޕަރޭޝަންތައް ހިންގުމަށް އެކަށީގެންވާ ނިޒާމެއް ގާއިމްވެފައި ނެތުން
- އޮޅުހިޔާގައި އުފެދޭ ނުރައްކާތެރި ބަޔޮލޮޖިކަލް ކުނި ނައްތާލުމަށް މިވަގުތު އެއްވެސް ނިޒާމެއް ގާއިމްވެފައި ނުވުން
- އޮޅުހިޔާއަށް މިވަގުތު ގެންދެވޭ ބުޅާތަކަށް އެކަށީގެންވާ ކާނާއާޢި ފެން ފޯރުކޮށްދެވޭނޭ ނިޒާމެއް ގާއިމްވެފައި ނުވުން
- އޮޅުހިޔާއަށް މިވަގުތު ގެންދެވޭ ބުޅާތަކަށް އަޅާލާނޭ އެއްވެސް މުވައްޒަފެއް ހަމަޖައްސާފައި ނުވުން
- އޮޅުހިޔާއިން ޚިދުމަތް ދިނުމަށް ބޭނުންވާނޭ ބޭސް ނުވަތަ ބޭސް ހޯދޭނޭ އެއްވެސް ނިޒާމެއް މިވަގުތު ހަމަޖެހިފައި ނުވުން
މިނިސްޓްރީން ވަނީ އޮޅުހިޔާއިން ޚިދުމަތްދޭން ފެށުމުގެ ކުރީން މި މައްސަލަތައް ހައްލުކުރަން ޖެހޭކަމަށް ބުނެފައެވެ. އަދި މިކަމުގެ އަޕްޑޭޓްތައް ހޯދުމަށާއި މި މައްސަލަތައް ހައްލުކުރުމަށް މާލެ ސިޓީ ކައުންސިލުގައި އެދިފައި ވާނޭ ކަމަށް މިނިސްޓްރީއިން ވަނީ ބުނެފައެވެ. ނަމަވެސް މިހާތަނަށް އެކަންތައްތައް ކުރެވިފައި ނުވުމުން އެކަންކަން ފުރިހަމަނުކޮށް އެތަނަށް ބުޅާތައް ނުގެންދިއުމަށް މިނިސްޓްރީއިން ވަނީ ސިޓީ ކައުންސިލަށް އިލްތިމާސް ކޮށްފައެވެ.
މިދިޔަ ބުދަ ދުވަހު މާލެ މިޓީ ކައުންސިލުން ބުނެފައިވަނީ ބުޅާތައް ފެސިލިޓީއަށް ގެންދަން ފެށުމުގެ އެންމެ ފަހުގެ މަޝްވަރާތައް އެންޖީއޯތަކާއެކު ކުރަމުންގެންދާ ކަމަށެވެ.
މާލޭގައި ބުޅާ ގިނަވެފައިވާއިރު އޭގެ ސަބަބުން ސިއްހީ އެތައް މައްސަލަތަކެއް ވެސް ކުރިމަތިވެއެވެ. ކައުންސިލުން މީގެ ކުރިން ވަނީ މާލޭގައި ބުޅަލުގެ އާބާދީ 3،000 އަށް އަރާނެ ކަމަށް ލަފާކުރެވޭ ކަމަށް ވިދާޅުވެފައެވެ.