ބޭރުގެ ފަރާތްތަކަށް ރާއްޖޭގައި އިންވެސްޓު ކުރެވޭ ފޮރިން އިންވެސްޓްމަންޓުގެ އައު ގާނޫނުގެ ދަށުން އިންވެސްޓަރުންނަށް ފުރުސަތު ހުޅުވާލައިފިއެވެ.
މި ގާނޫނުގެ މަގުސަދަކީ ރާއްޖޭގައި ކުރެވޭ ބޭރުގެ އިސްވެެސްޓްމަންޓުތައް މެދުވެރިކޮށް ފޮރިން ކެޕިޓަލާއި ޓެކްނޮލޮޖީގެ އިތުރުން އިލްމާއި ހުނަރު ގެނައުމަށް ފަހި މާހައުލެއް އުފެއްދުމާއެކު ރާއްޖެ ތަރައްގީ ކުރާނެ ހަރުދަނާ އުސޫލުތަކެއް ކަނޑައެޅުމެވެ.
މި ބިލު ފާސްކުރީ، އޯގަސްޓު 22ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައެވެ.
މި ބިލުގައި ބަޔާންކޮށްފައިވާ ބައެއް މުހިންމު ކަންކަން
- ބޭރުގެ ފަރާތްތަކަށް ރާއްޖޭގައި އިންވެސްޓް ކުރެވޭނެ ދާއިރާތައް ކަނޑައެޅުމާ ގުޅޭ އުސޫލުތައް
- އިންވެސްޓަރުން ރާއްޖޭގައި އިންވެސްޓްކުރުމުގެ ހުއްދަ ދޫކުރުމާގުޅޭ އުސޫލުތައް
- އިންވެސްޓަރުންނަށް ލިބިދޭނެ ހިމާޔަތާއި ރައްކާތެރިކަމާގުޅޭ އުސޫލުތައް
- އިންވެސްޓްމަންޓްތައް ދައުލަތަށް ނެގޭނެ ޚާއްސަ ހާލަތްތަކާއި އެ ގޮތަށް ނެގޭ އިންވެސްޓްމަންޓްތަކަށް ބަދަލުދެވޭނެ އުސޫލުތައް
ފޮރިން އިންވެސްޓްމަންޓުގެ ގާނޫނުގެ ދަށުން އެއްވެސް ފަރާތަކަށް ރާއްޖޭގައި ފޮރިން އިންވެސްޓްމަންޓެއް ކުރެވޭނީ، ހުއްދައަށް އެދި މިނިސްޓްރީއަށް ހުށަހަޅައިގެން އެޕްރޫވަލް އަދި ލައިސަންސް ހޯދުމަށްފަހުގައެވެ. އެ ގޮތުން އިކޮނޮމިކް މިނިސްޓްރީގެ ވެބްސައިޓު މެދުވެރިކޮށް ފޮރިން އިންވެސްޓްމަންޓުގެ އެޕްރޫވަލްއަށް މިހާރު އެދެވޭނެއެވެ.
އަދި ސްޕެޝަލް އިކޮނޮމިކް ޒޯނުގެ ގާނޫނު ފިޔަވައި ފޮރިން އިންވެސްޓްމަންޓާ ގުޅޭގޮތުން އެހެން ގާނޫނެއްގައި ބަޔާންކޮށްފައިވާ އުސޫލެއް މި ގާނޫނާ ފުށުއަރާނަމަ، އިސްކަންދޭނީ ވެސް މި ގާނޫނަށެވެ.
ރާއްޖޭގައި ކުރެވޭ ފޮރިން އިންވެސްޓްމަންޓާބެހޭ ގާނޫނެއް ފުރަތަމަ ވުޖޫދުވީ 1979ވަނަ އަހަރުގެ މެއިމަހުގެ އެއްވަނަ ދުވަހުގައެވެ. އެ ގާނޫނު ވުޖޫދުވިތާ 45 އަހަރު ފަހުން މިއީ ފޮރިން އިންވެސްޓްމަންޓާގުޅޭ ޒަމާނީ ބަދަލުތަކެއް ގާނޫނެއް ގެނެވުނު ފުރަތަމަ ފަހަރެވެ.
މި ގާނޫނަށް އަމަލުކުރަން ފެށުމާއެކު، މީގެ ކުރިން އޮތް "ދިވެހިރާއްޖޭގައި ކުރެވޭ ފޮރިން އިންވެސްޓްމަންޓާބެހޭ ގާނޫނު" އުވުނީއެވެ.