ބޭންކް އޮފް މޯލްޑިވްސް (ބީއެމްއެލް) އިން މޯލްޑިވްސް އޮލިމްޕިކް ކޮމިޓީ (އެމްއޯސީ)އާ ގުޅިގެން ސްޕޯޓްސް ސްކޮލާޝިޕްގެ ފުރުސަތު ހުޅުވާލައިފިއެވެ.
ބީއެމްއެލްއިން ބުނީ މި ސްކޮލާޝިޕް ޕްރޮގްރާމުގެ އަމާޒަކީ އެތުލީޓުންގެ ހުނަރު ކުރިއަރުވައި ކުޅިވަރުގައި ފުރިހަމަ ކާމިޔާބީއެއް ހޯދުމުގައި އެހީތެރިވުން ކަމަށެވެ.
މި ސްކޮލާޝިޕްތަކަށް ކުޅުންތެރިން ހޮވުމުގެ ކަންތައް ބަލަހައްޓާނީ އެމްއޯސީން ކަމަށް ބީއެމްއެލްއިން ވަނީ ބުނެފައެވެ. އަދި މި ސްކޮލާޝިޕްގައި ބައިވެރި ވެވޭނީ އެމްއޯސީގެ މެމްބަރު އެސޯސިއޭޝަންތަކަށެވެ.
މި ސްކޮލާޝިޕްގެ ދަށުން، ހުރިހާ ހަރަދަކާއެކު ރާއްޖޭން ބޭރުގެ ހައި ޕާފޯމަންސް ޓްރެއިނިން ސެންޓަރުތަކުގައި ތަމްރީން ހޯދުމުގެ ފުރުސަތު ކުޅުންތެރިންނަށް ލިބޭނެއެވެ.
މިއީ ބީއެމްްއެލްއިން ސްޕޯޓްސް ސްކޮލާޝިޕަށް ހުޅުވައިލާ ދެވަނަ އަހަރެވެ.
މި ޕްރޮގްރާމްގެ ފުރަތަމަ ބެޗްގައި ހަތަރު ކުޅިވަރަކުން ބައިވެރިވި ހަތް ކުޅުންތެރިން ކާމިޔާބުކަމާއެކު ވަނީ ތަމްރީނު ފުރިހަމަކޮށްފައެވެ. މިއީ ރާއްޖޭގައި އެންމެ މޮޅު ހުނަރުވެރި ކުޅުންތެރިން ތަމްރީނުކުރުމުގައި ކުރިއަށް އެޅުނު ވަރަށް މުހިންމު ފިޔަވަޅެއް ކަމަށް ބީއެމްއެލްއިން ބުނެއެވެ.