ހުޅުމާލޭ ދެވަނަ ފިޔަވަހިން ދިރިއުޅުމަށް ބީލަމުގެ އުސޫލުން އިތުރު 10 ބިން ވިއްކުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން އަނެއްކާވެސް އިއުލާނު ކޮށްފިއެވެ.
މިދިޔަ ހަފުތާގައި އެޗްޑީސީން ކުރި އިއުލާނުގައި ވިއްކަން ހުޅުވާލާފައި ވަނީ ބީޗްފްރޮންޓް ނުވަތަ އަތިރިމަތިން ތިން ބިމަކާއި ބީޗްސައިޑް ނުވަތަ އަތިރިމައްޗާ ދިމާލުން އެތެރެ މަގުން ހަތް ބިމެކެވެ.
އެގޮތުން ބީޗް ފްރޮންޓުން ވިއްކަނީ 1،638 އަކަފޫޓުގެ ބިމަކާއި 1،559 އަކަފޫޓުގެ ބިމެއްގެ އިތުރުން 3،250 އަކަފޫޓުގެ ބިމެކެވެ. ބީޗްސައިޑުން ވިއްކަނީ 1،534 އަކަފޫޓުގެ ފަސް ބިމަކާއި، 1،513 އަކަފޫޓުގެ ބިމެއްގެ އިތުރުން 1،230 އަކަފޫޓުގެ ބިމެކެވެ.
ބީޗް ފްރަންޓް ބިންތަކުގެ ބީލަން ފެށޭ އަގަކީ 4500 ރުފިޔާއެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4000 ރުފިޔާއެވެ.
ބީލަމުގެ އުސޫލުން ބިން ވިއްކުމަށް ހަމަޖެހިފައިވާ މަރުހަލާތައް:
- މަރުހަލާ 1: ޕޯޓަލް މެދުވެރިކޮށް ޝައުގުވެރިވެލައްވާ ބިމަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުން
- މަރުހަލާ 2: އެއް ފަރާތަށްވުރެ ގިނަ ފަރާތުން އީއޯއައި ހުށަހަޅާފައިވާނަމަ އެ ބިމަކަށް ބިޑް ކުރުން
އެޗްޑީސީން ބުނީ ބީލަން ހުށަހަޅަން ޝައުގުވެރިވާ ފަރާތްތަކުން ބީލަމުގެ އުސޫލުން ބިން ގަތުމަށް އެދި ހުށަހަޅާނީ ޕޯޓަލް މެދުވެރިކޮށް ކަމަށެވެ. އެހެންވެ، ޕޯޓަލްގައި ރަޖިސްޓަރީކޮށް މިހާރު ބީލަން ހުށަހެޅޭނެ ކަމަށާއި އިތުރު މައުލޫމާތު އެ ކޯޕަރޭޝަންގެ ހޮޓްލައިން 1516އިން ލިބޭނެ ކަމަށް އެޗްޑީސީން ބުންޏެވެ.
މީގެ ކުރިން ވެސް އެޗްޑީސީން ވަނީ ގިނަ ބިންތަކެއް ބީލަމުގެ އުސޫލުން ވިއްކުމަށް ހުޅުވާލާފައެވެ. އެގޮތުން މިއަހަރުގެ މެއި މަހު 13 ބިމެއް، އޮކްޓޯބަރުގައި 18 ބިމެއް އަދި މިދިޔަ މަހު އިތުރު އަށް ބިން ވިއްކުމަށް އިއުލާނުކުރިއެވެ.