ބޭ އޮފް ބެންގާލްގައި އުފެދިފައިވާ ބާރުގަދަ ތޫފާން "ފެންގަލް" އިންޑިއާގެ ދެކުނު އައްސޭރިފަށް ހުރަސްކޮށް އިންޑިއާއަށާއި ސްރީ ލަންކާއަށް އެރުމުގެ ސަބަބުން އެ ދެ ގައުމުން 19 މީހުން މަރުވެއްޖެއެވެ.
ފެންގަލްގެ ސަބަބުން އިންޑިޔާގެ ދެކުނު އައްސޭރިފަށުގެ ސަރަހައްދުތަކަށް ދަނީ ބޯކޮށް ވާރޭވެހެމުންނެވެ. އެ ތޫފާނާ ގުޅިގެން ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ޓަމިލް ނާޑޫ ސްޓޭޓާއި ޕުދުޗެރީ ސަރަޙައްދަށެވެ.
ތޫފާނުގެ ސަބަބުން އިންޑިއާގެ ދެކުނު ސިޓީއެއް ކަމަށްވާ ޗެންނާއީގެ ބައެއް ހިސާބުތައްވެސް ވަނީ ފެންބޮޑުވެފައެވެ. ހޮނިހިރު ދުވަހު އެ ސިޓީގެ ވައިގެ ދަތުރުތައް ވަގުތީ ގޮތުން މެދުކަނޑާލި ނަމަވެސް އިއްޔެގެ ވަގުތެއްގައި ވަނީ އަލުން ދަތުރުތައް ފަށާފައި ކަމަށް އިންޑިއާގެ އެއާޕޯޓު އޮތޯރިޓީން ބުނެއެވެ.
ތޫފާން ފެންގަލްއާއެކު އިންޑިއާގެ ސަރަހައްދުތަކުގައި ވައި ވެސް ވަނީ ބާރުވެފައެވެ. އަދި، ފެންބޮޑުވުމާ ގުޅިގެން ގިނަ އަދަދެއްގެ ބަޔަކު ގެދޮރުގައި ތާށިވެފައިވާއިރު، އެ މީހުން ސަލާމަތްކޮށް، ރައްކާތެރި ހިސާބުތަކަށް ބަދަލު ކުރުމަށް ކަމާގުޅޭ އިދާރާތަކުން ދަނީ މަސައްކަތް ކުރަމުންނެވެ. ޑިންގީ ފަދަ ކުދި އުޅަނދުފަހަރުގައި މީހުން ސަލާމަތް ކުރުމަށް މަސައްކަތް ކުރަމުންދާ މަންޒަރު، އިންޑިޔާގެ ޓީވީތަކުން އާންމު ކޮށްފައިވާ ވީޑިއޯތަކުން ފެނެއެވެ.
ޕުދުޗެރީގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އިންޑިޔާގެ އަސްކަރިއްޔާގެ ސިފައިން ވެސް ދަނީ ހަރަކާތްތެރިވަމުންނެވެ.
ސްރީ ލަންކާގެ ސަރަހައްދުތަކަށް ތޫފާން ފެންގަލް އެރުމުގެ ސަބަބުން އެ ގައުމުން 16 މީހުން ވަނީ މަރުވެފައެވެ. އަދި، ގިނަ އަދަދެއްގެ ބަޔަކަށް އަނިޔާވިއެވެ. ލަންކާގެ ކާރިސާތަކާ ބެހޭ މަރުކަޒުން ބުނީ، ފެންބޮޑުވުމާ ގުޅިގެން 139,944 އާއިލާއަކަށް ގެއްލުން ލިބުނު ކަމުގައެވެ. ފެންބޮޑުވުމާ ގުޅިގެން ލަންކާއިން ވެސް ގިނަ އަދަދެއްގެ ބަޔަކު ރައްކާތެރި ހިސާބުތަކަށް ބަދަލު ކުރަން ޖެހުނެވެ.
މި ހަފްތާގެ ކުރީކޮޅު "ފެންގަލް" ގެ އަސަރު ސްރީ ލަންކާގެ އައްސޭރިފަށުގެ ހިސާބުތަކަށް ކުރިއެވެ. ލަންކާއަށް ބޯކޮށް ވާރޭ ވެހުމާއި މޫސުން ގޯސްވެގެން ހިނގި ހާދިސާތަކުގައި 12 މީހަކު މަރުވެފައި ވާއިރު އޭގެ ތެރޭގައި ކުޑަ ހަ ކުދިން ވެސް ހިމެނެއެވެ.