ވޭތުވެދިޔަ އެއް އަހަރުތެރޭ ގޭންގު ކުށުގެ މައްސަލަތަކުގައި 50 މީހުން ހައްޔަރުކޮށް، 65 މީހުންނަށް ދައުވާކޮށްފައިވާ ކަމަށް ހޯމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ހޯމް މިނިސްޓްރީން މިއަދު އާންމުކުރި ވީޑިއޯއެއްގައި ހޯމް މިނިސްޓަރު އަލީ އިހުސާނު ވަނީ ފާއިތުވި 52 ހަފުތާގައި ގޭންގު ކުށްތައް ހުއްޓުވުމަށް ކުރި މަސައްކަތްތައް ހިއްސާކުރައްވާފައެވެ.
އޭގެ ތެރޭގައި މޯލްޑިވްސް ޕޮލިސް ސާވިސްގައި ގޭންގް ކްރައިމްތަކަށް ޚާއްސަ ވަކި ޑިޕާޓްމަންޓެއް އުފައްދާފައި، މާލެ އަދި ހުޅުމާލޭގައި ގޭންގުތައް ހަރަކާތްތެރިވެ އުޅޭ ސަރަހައްދުތައް މެޕްކޮށް، 24 ގަޑިއިރު ޕެޓްރޯލްކޮށް ބަލަހައްޓަން ފަށާފައިވެވާކަން މިނިސްޓަރު ފާހަގަކުރެއްވިއެވެ.
އަދި ނުރައްކާތެރިކޮށް ދުއްވާ ވެހިކަލްތަކާއި، އެފަދަ ގޭންގު މެންބަރުން ދެނެގަނެ، އެފަދަ އުޅަނދުތައް ޓޯކުރަން ފަށާފައި ވާކަމަށް ވެސް މިނިސްޓަރު ވިދާޅުވިއެވެ. ގޭންގު ކުށްތައް މަނާކުރުމާ ބެހޭ ގާނޫނެއް ވުޖޫދުވިތާ 14 އަހަރު ވެފައިވާކަން ފާހަގަކުރައްވައި މިނިސްޓަރު ވިދާޅުވީ، އެ ގާނޫނުގެ ދަށުން ދައުވާއެއް އުފުލިފައި ނުވާތީ، ގޭންގު ކުށްތައް ހުއްޓުވުމަށް އާ ބިލެއް އެެކުލަވައިލުމުގެ މަސައްކަތް މިހާރު ކުރަމުން ދާކަމަށެވެ.
ހަމައެއާއެކު ގޭންގު ކުށްތައް ހުއްޓުވުމަށްޓަކައި މިދިޔަ އަހަރުގެ ޖަނަވަރީ މަހުން ފެށިގެން އެ އަހަރުގެ ނޮވެމްބަރު 16ވަނަ ދުވަހާ ހަމައަށް ކުރި މަސައްކަތާ އަޅާބަލާއިރު މި ސަރުކާރުން އެއް އަހަރުތެރޭ ކުރި މަސައްކަތްތައް ގިނަކަން ވެސް މިނިސްޓަރު ވަނީ ފާހަގަކުރައްވައިފައެވެ.
ޖެނުއަރީ 2023 އިން 16 ނޮވެމްބަރު 2023އާ ހަމައަށް:
- ހައްޔަރުކުރެވިފައިވާ މީހުންގެ އަދަދު: 44
- މިހާރު ހައްޔަރުގައި ތިބި މީހުންގެ އަދަދު: 10
- ދައުވާ ކުރެވުނު މީހުންގެ އަދަދު: 35
- ހުއްޓުވާ ސުވާލުކުރެވުނު އަދަދު: 5،407
- ކުޑަކުދިން ހުއްޓުވާ ސުވާލުކުރެވުނު އަދަދު: 347
- ސަރަޙައްދުތައް ޗެކްކުރެވުނު އަދަދު: 17،314
- އުޅަނދުތައް ފާސްކުރެވިފައިވާ އަދަދު: 42
- ޗެކްކުރެވުނު އުޅަނދުތައް: 41
މި ދައުރުގެ ފުރަތަމަ 52 ހަފުތާގައި:
- ހައްޔަރުކުރެވިފައިވާ މީހުންގެ އަދަދު: 105
- މިހާރު ހައްޔަރުގައި ތިބި މީހުންގެ އަދަދު: 50
- ދައުވާ ކުރެވުނު މީހުންގެ އަދަދު: 65
- ހުއްޓުވާ ސުވާލުކުރެވުނު އަދަދު: 20،597
- ކުޑަކުދިން ހުއްޓުވާ ސުވާލުކުރެވުނު އަދަދު: 2،315
- ސަރަޙައްދުތައް ޗެކްކުރެވުނު އަދަދު: 106،174
- އުޅަނދުތައް ފާސްކުރެވިފައިވާ އަދަދު: 3،043
- ޗެކްކުރެވުނު އުޅަނދުތައް: 2،658
ރާއްޖޭގައި އުޅޭ ނަން މަޝްހޫރު ބޮޑެތި ގޭންގުތަކުގެ ކަންތައްތައް އެއްކޮށް ހުއްޓުވާނެ ކަމަށް މިނިސްޓަރު ވަނީ މީގެ ކުރިން ވިދާޅުވެފައެވެ. އިހުސާން ވިދާޅުވީ ގޭންގުތައް ހުއްޓުވޭނޭ ކަމުގެ 100 ޕަސެންޓް ޔަގީންކަން މިހާރު އެބައޮތް ކަމަށެވެ. އަދި އެކަން ކުރެވޭނޭ ގާބިލުކަން އަދުގެ ރައީސުލްޖުމްހޫރިއްޔާގެ އެބަހުރިކަން އޭނާ ވަނީ ފާހަގަކުރައްވާފައެވެ.
ރާއްޖޭގެ އަދުގެ ހާލަތަށް ބަލާއިރު ކުށުގެ މާހައުލުގައި އުމުރުން 12، 13 އަހަރުގެ ކުދީން ހަރަކާތްތެރިވަމުން އަންނަކަން ވަޒީރު ވަނީ ފާހަގަކުރައްވާފައެވެ. ނަމަވެސް މިހާރު އޮތް ގާނޫނުގައި ޖިނާއީ ކުށުގެ ޒިންމާ ނަގަންޖެހެނީ 15 އަހަރުން މަތީގެ ކުދީންނެވެ.
އެހެންކަމުން ޖިނާއީ ކުށުގެ ޒިންމާ ނަގަންޖެހޭ އުމުރު 12 އަހަރަށް ތިރިކުރުމަށް ނިންމާފައި ވާނެކަމަށާއި އެ އިސްލާހުގެ މަސައްކަތް ކުރަމުންދާ ކަމަށް ވެސް މީގެކުރިން އިހުސާން ވިދާޅުވިއެވެ.
ގޭންގު ކުށްތަކުގެ ބިލު ވަރަށް އަވަހަށް މަޖިލީހަށް ހުށަހަޅާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ މީގެ ކުރިން ވިދާޅުވެފައެވެ.