ޓެކްނިކަލް މައްސަލައަކާ ގުޅިގެން ގަން އިންޓަނޭޝަނަލް އެއާޕޯޓަށް މިއަދު ޖެއްސި "ގަލިވް އެއާ"ގެ މަތިންދާ ބޯޓަށް ބޭނުންވާ ޚިދުމަތްތައް އެ އެއާޕޯޓުން ފޯރުކޮށްދީފިއެވެ.
ގަލިވް އެއާއަކީ ބަލްގޭރިއާގެ ޗާޓަރު އެއާލައިނެކެވެ. ގަމު އެއާޕޯޓަށް މިއަދު ޖެއްސީ އޭ330 މަރުކާގެ މަތިންދާ ބޯޓެކެވެ.
ގަމު އެއާޕޯޓުން ކުރި ޕޯސްޓެއްގައި ވަނީ އެ އެއާލައިންގެ މަތިންދާ ބޯޓަށް މަރުހަބާ ކިޔާފައެވެ. އަދި ގަމު އެއާޕޯޓުގައި އެ ބޯޓު ޖައްސާފައި ވަނީ ކުޑަ ވަގުތުކޮޅަކަށް ޓެކްނިކަލް ސްޓޮޕްއޯވާއެއް ހަދަން ކަމަށް ބުނެފައިވެއެވެ.
https://fb.watch/wc6CwlTbTy/
އަދި އެ ބޯޓުގެ ދަތުރު މެދުނުކެނޑި ކުރިއަށް ގެންދިއުމަށް ބޭނުންވާ ޚިދުމަތްތައް ފޯރުކޮށްދީ، އޮޕަރޭޝަންތަކަށް އެއްބާރުލުންދީފައިވާ ކަމަށް ވެސް އެ އެއާޕޯޓުން ބުންޏެވެ.
ރާއްޖޭގެ އެއާޕޯޓުތަކަށް މިފަދަ ޓެކްނިކަލް ކަންކަމަށް ބޯޓުތައް ޖައްސައެވެ. މިއަހަރުގެ ޖުލައި މަހުގެ ކުރީކޮޅު އިޓަލީވިލާތުގެ އަސްކަރިއްޔާގެ ޖެޓުތަކެއް ވަނީ ތެޔޮ އަޅަން ވެލާނާ އިންޓަނޭޝަނަލް އެއާޕޯޓަށް ޖައްސާފައެވެ.
މި ޖެޓުތަކަށް ގިނަ ބައެއްގެ ސަމާލުކަން ވެސް ލިބުނެވެ.