އައްޑޫ ސިޓީގެ ގަމުގައި އޮންނަ އިންޓަނޭޝަނަލް އެއާޕޯޓުގެ ކަރަންޓު ވިއުގަ އިތުރަށް ވަރުގަދަ ކުރުމާ ގުޅޭ ގޮތުން ސްޓެލްކޯއިން، އެ އެއާޕޯޓު ހިންގާ އައްޑޫ އިންޓަނޭޝަނަލް އެއާޕޯޓް ކޮމްޕެނީ (އޭއައިއޭ)އާ މިއަދު މަޝްވަރާކޮށްފިއެވެ.
އައްޑޫ އެއާޕޯޓަށް މީގެ ކުރިން ކަރަންޓުގެ ޚިދުމަތް ފޯރުކޮށްދެމުން އައީ އެ ސިޓީއަށް މީގެ ކުރިން ކަރަންޓުގެ ޚިދުމަތް ފޯރުކޮށްދެމުންދިޔަ ފެނަކަ ކޯޕަރޭޝަނުންނެވެ. އެއަށްފަހު ސްޓެލްކޯއިން އިއްޔެ ވަނީ އައްޑުއަށް ކަރަންޓުގެ ޚިދުމަތް ފޯރުކޮށްދިނުމާ ރަސްމީކޮށް ހަވާލުވެފައެވެ.
އެ ކުންފުނީގެ މަސައްކަތްތައް ފެށުމާ ގުޅިގެން، ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރާއި ކުންފުނީގެ ބައެއް އިސްވެރިން މިހާރު އައްޑުއަށް ކުރައްވަމުންގެންދަވާ ދަތުރުގެ ތެރެއިން، މިއަދު ވަނީ އޭއައިއޭގެ ބައެއް އިސްވެރިންނާ ބައްދަލުކުރައްވާފައެވެ.
ސްޓެލްކޯއިން ބުނި ގޮތުގައި އެ ބައްދަލުވުމުގައި، ގަން އެއާޕޯޓު އަޕްގްރޭޑް ކުރުމުގެ މަޝްރޫއާއެކު އެއާޕޯޓަށް އިތުރަށް ބޭނުންވާނެ ކަރަންޓު ފޯރުކޮށްދިނުމާ ގުޅޭ ގޮތުން ވަނީ މަޝްވަރާކުރައްވާފައެވެ.
ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރާއި ކުންފުނީގެ ބައެއް އިސްވެރިން މިހާރު އައްޑުއަށް ކުރަމުންދާ ދަތުރުފުޅުގެ ތެރެއިން ގަން އިންޓަނޭޝަނަލް އެއާޕޯޓަށް ކުރި ޒިއާރަތުގެ ތެރެއިން --- ފޮޓޯ: ސްޓެލްކޯމީގެ އިތުރުން އެ ކުންފުނީގެ މުހިންމު ބޭނުންތައް ދެނެގަނެ އެއާޕޯޓުގެ ކަރަންޓުގެ ވިއުގަ އިތުރަށް ވަރުގަދަކޮށް، ހަރުދަނާކުރުމަށް ކުރެވެންހުރި މަސައްކަތްތަކާ ގުޅޭގޮތުން ވެސް ވަނީ މަޝްވަރާކުރައްވާފައި ކަމަށް އެ ކުންފުނިން ބުންޏެވެ.
އައްޑޫ ސިޓީގެ އެއާޕޯޓަކީ މި ވަގުތު މާ ގިނަ އިންޓަނޭޝަނަލް ދަތުރުތައް ކުރާ ތަނެއް ނޫނެވެ. އެންމެ ގަވާއިދުން އެ އެއާޕޯޓަށް ދަތުރުތައް ބާއްވަމުން އަންނަނީ ސްރީލަންކަންއިންނެވެ.
ގަން އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއެއް މިދިޔަ ސަރުކާރުގެ ފަހު އަހަރު ކަމަށްވާ 2023ގައި ވަނީ އިފުތިތާހުކޮށްފައެވެ. އިންޑިއާގެ އެކްޒިމް ބޭންކްގެ ލޯނެއްގެ ދަށުން ކުރިއަށްގެންދިޔުމަށް، 27 މިލިއަން ޑޮލަރުގެ އެ މަޝްރޫއު ހަވާލުކުރީ އިންޑިއާގެ ރެނާޓަސް ކުންފުންޏާއެވެ.
އެ މަޝްރޫއު ރާވާފައިވަނީ، އެއާޕޯޓުގައި ތަފާތު ވަސީލަތްތައް ގާއިމުކޮށް، އަހަރަކު 1.5 މިލިއަން ފަތުރުވެރިންނަށް ޚިދުމަތް ދެވޭ ގޮތަށް އެއާޕޯޓު ތަރައްގީ ކުރުމަށެވެ. އެހެންނަމަވެސް ތަފާތު ސަބަބުތަކާ ހެދި އެ މަޝްރޫއު ވަނީ ލަސްވެފައެވެ.