އިސްރާއީލުގެ ސިފައިން ފަލަސްތީނުގެ ޣައްޒާގައި ކުރަމުން އަންނަނީ ނަސްލު ނައްތާލުމުގެ ހަނގުރާމައެއް ކަމަށް އެ ގައުމުގެ ކުރީގެ ދިފާއީ ވަޒީރު މޯޝޭ ޔަލޯން ވިދާޅުވެއްޖެއެވެ.
"އެތަނުގައި ހިނގަނީ ކޮންކަމެއް؟ ބެއިތު ލަހިއްޔާއެއް ނެތް، ބެއިތު ހަނޫންއެއް ނެތް، ސިފައިން ޖަބަލިއާގެ ތެރެއަށް ވަދެ ހަގީގަތުގައި އެ ބިމުން އަރަބިން ނެރެލަނީ." ޓީވީ ޗެނަލްއަކަށް ދިން އިންޓިވިއުއެއްގައި މޯޝޭ ބުންޏެވެ.
މޯޝޭ ފާހަގަކުރި ގޮތުގައި ޣައްޒާގެ އުތުރުގެ ސަރަހައްދުތަކަކީ ފަލަސްތީނުގެ ހަނގުރާމަވެރި ޖަމާއަތް، ހަމާސްގެ ހަމަލާތައް ހުއްޓުވުމުގެ މަގުސަދުގައި އޮކްޓޯބަރު މަހުގެ ހަ ވަނަ ދުވަހުން ފެށިގެން އިސްރާއީލުން ހަމަލާތައް ދެމުން އަންނަ ސަރަހައްދުތަކެކެވެ.
މޯޝޭ އެގޮތަށް ވިދާޅުވުމާ ގުޅިގެން އިސްރާއިލުގެ ސަރުކާރުގެ ގިނަ ބަޔަކު ވަނީ އޭނާއަށް ފާޑުކިޔާފައެވެ.
ގައުމީ ސަލާމަތާ ބެހޭ މިނިސްޓަރު އިޓަމާ ބެން ގްވިރް ވިދާޅުވީ އިސްރާއީލަށް ސިފައިންގެ ވެރިއެއްގެ ގޮތުގައި އެފަދަ ޝަޚުސިއްޔަތެއް ލިބުމަކީ"ލަދުވެތި" ކަމެއް ކަމަށެވެ.
ނަތަންޔާހޫގެ ލިކުޑް ޕާޓީންވެސް ވަނީ މޯޝޭގެ ވަހަކަތަކަކީ ނަޒާހަތްތެރި ނޫން ވާހަކަތަކެއް ކަމަށް ބުނެ ފާޑުކިޔާފައެވެ. އަދި އެއީ އިންޓަނޭޝަނަލް ކޯޓު އޮފް ޖަސްޓިސް (އައިސީސީ) އަށް ދިން ހަދިޔާއެއް ކަމަށްވެސް އެ ޕާޓީން ވަނީ ބުނެފައެވެ.
ހަނގުރާމައިގެ ޖަރީމާތައް ހިންގި ކަމަށް ތުހުމަތުކޮށް އައިސީސީ އިން ވަނީ އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ހައްޔަރު ކުރުމަށް މިދިޔަ މަހުގެ 21ވަނަ ދުވަހު އަމުރު ނެރެފައެވެ.
އުމުރުން 74 އަހަރުގެ މޯޝޭ އަކީ 2002ވަނައަހަރާއި 2005 އަހަރާ ދެމެދު އިސްރާއީލު ސިފައިންގެ އިސްވެރިއެއްގެ ގޮތުގައި މަސައްކަތްކުރެއްވި ބޭފުޅާއެވެ.
ބޮޑުވަޒީރު ބެންޖަމިން ނަތަންޔާހޫއާ މެދު ޚިޔާލުތަފާތުވުންތަކެއް އުފެދިގެން 2016ވަނަ އަހަރު އިސްތިއުފާ ދެއްވުމުގެ ކުރިން އޭނާ ވަނީ ދިފާއީ ވަޒީރު އަދި ދިފާއީ ވަޒީރުގެ ނާއިބުގެ މަގާމު ވެސް އަދާކުރައްވާފައެވެ.
މިދިޔަ އަހަރު އޮކްޓޫބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާގައި ހިންގަމުންދާ ލާއިންސާނީ އަމަލުތަކުގައި މިހާތަނަށް 44،382 މީހުން ވަނީ ޝަހީދުކޮށްލާފައެވެ.