ހައިވޭގައި އެކްސިޑެންޓުވުމުން މަޑުނުކޮށް، ދިޔަ ޒުވާނަކު ފުލުހުން ހުކުރު ދުވަހު ހައްޔަރުކޮށްފިއެވެ.
މި މައްސަލާގައި ހައްޔަރުކޮށްފައި ވަނީ 22 އަހަރުގެ ބ. އޭދަފުށީ، ފަސްމީރު، ޝުނާން މުޙައްމަދު ޝާކިރެވެ.
އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ވަނީ އަމުރުކޮށްފައެވެ.
މި މައްސަލައާ ގުޅިގެން ފުލުހުން ބުނީ، ހައިވޭގައި ބާރު ސްޕީޑުގައި ގަވާއިދާ ޚިލާފަށް އޯވާޓޭކްކުރި ސައިކަލެއް އެހެން ސައިކަލެއްގައި ޖެހި އެކްސިޑެންޓުވި މައްސަލައެއް ހުކުރު ދުވަހު މެންދުރު 14:43 ހާއިރު ރިޕޯޓު ކުރި ކަމަށެވެ.
މި އެކްސިޑެންޓުގައި އެ ސައިކަލުގައި ތިބި ދެމީހުންނަށް އަނިޔާވެގެން ހުޅުމާލެ ހޮސްޕިޓަލަށް ގެންގޮސްފައިވާ ކަމަށާއި އެއީ ދިވެހި ފިރިހެނަކާއި އަންހެނަކަށް ކަމަށް ފުލުހުން ވަނީ ބުނެފައެވެ.
ފިރިހެން މީހާއަށް ފަރުވާ ދިނުމަށްފަހު އޭނާ މީހާރު ހޮސްޕިޓަލުން ދޫކޮށްލާފައިވާ ކަމަށާއި އަންހެން މީހާއަށް އަދިވެސް ފަރުވާ ދެމުން އަންނަ ކަމަށް ފުލުހުން ބުނެއެވެ.
ފުލުހުން ބުނީ، ގަވައިދާ ޚިލާފަށް އޯވާ ޓޭކްކުރި ސައިކަލު ދުއްވި ޝުނާން އެކްސިޑެންޓު ވުމުން ވެސް މަޑުނުކޮށް ދިޔައީކަމަށެވެ.