ވ. ރަކީދޫގައި ކުރިއަށް އޮތް ދެ ހަފްތާ ތެރޭ 100 ޕަސެންޓު އިއާދަކުރަނިވި ހަކަތައަށް ބަދަލު ކުރުމަށް މަސައްކަތް ކުރަމުން އަންނަ ކަމަށް ސްޓެލްކޯއިން ބުނެފިއެވެ.
ރަކީދޫގައި މިހާރު ބޭނުން ކުރަމުން އަންނަނީ އިރުގެ އަލިން ސާފު ހަކަތަ އުފައްދައިދޭ ހައިބްރިޑް ޕީވީބެސްޑީޖީ ސިސްޓަމެކެވެ. އެ ސިސްޓަމް ބޭނުންކުރަން ފެށުމުން މިހާރު އެރަށުގައި ޖަނަރޭޓު ޖައްސަން ޖެހެނީ ދުވާލަކު ދެ ގަޑިއިރަށެވެ.
ރަކީދޫގައި ބޭނުންކުރާ ހައިބްރިޑް ޕީވީ-ބެސް-ޑީޖީ ސިސްޓަމަކީ ފޮޓޯވޯލްޓެއިކް ޕީވީ ސިސްޓަމަކާއި ބެޓެރީ އެނާޖީ ސްޓޯރޭޖް ސިސްޓަމް އަދި ޑީސަލް ޖެނެރޭޓަރު އެއްކޮށްލައިގެން އިތުބާރުހުރި ކަރަންޓު ފޯރުކޮށްދޭ ނިޒާމެކެވެ.
ރަކީދޫ އިންޖީނު ގޭގައި އެ ސިސްޓަމާ ގުޅުން ހުރި އިތުރު މައުލޫމާތު ދެމުން ސްޓެލްކޯގެ ރިނިވަބަލް އެނާޖީ ޑިޕާޓްމަންޓުގެ ޖެނެރަލް މެނޭޖަރު އިބްރާހީމް ނިޒާމް ވިދާޅުވީ، މުޅި ރަށަށް ބޭނުންވާ ކަރަންޓު ދުވާލު ފޯރުކޮށްދެނީ ސޯލާއިން ކަމަށާއި އިރުއޮއްސުމުން އެރަށަށް ބޭނުންވާ ކަރަންޓު ދެނީ ބެޓެރިން ކަމަށެވެ.
މިގޮތުން، އެ ބެޓެރިއަކީ 'ފޯނު ބެޓެރިއެއް' ގޮތަށް ޗާޖު ކުރެވޭ އެއްޗެއް ކަމަށާއި 95 ޕަސެންޓު ޗާޖުކޮށްގެން ރޭގަނޑަށް އެއްކޮށް ކަރަންޓު ދެވޭނެ ކަމަށް ނިޒާމް ވިދާޅުވިއެވެ.
ރަކީދުގައި ބޭނުންކުރާ ބެޓެރީ ސިސްޓަމް: ރަކީދޫގައި ކުރިއަށް އޮތް ދެ ހަފްތާތެރޭ، 100 ޕަސެންޓު އިއާދަކުރަނިވި ހަކަތައަށް ބަދަލުކުރަނީ --- ސަން ފޮޓޯ/ ނާއިޝް ނާހިދު
އެ ނިޒާމުގެ ބެޓެރި ބޭނުންކޮށްގެން ކަރަންޓު ދެމުން ދަނިކޮށް، 25 ޕަސެންޓު ޗާޖަށް ދަށްވުމުން ސަލާމަތީ ފިޔަވަޅެއްގެ ގޮތުން ބެޓެރިން ކަރަންޓު ދިނުން އެނާޖީ މެނޭޖްމަންޓް ސިސްޓަމްގެ ދަށުން ވަގުތުން ހުއްޓާލާނެ ކަމަށާއި އެ ހާލާތުގައި އޮޓޯއިން އިންޖީނު ހިންގަން ބަދަލުކޮށްލާނެ ކަމަށް އޭނާ ވިދާޅުވިއެވެ.
ކުރިއަތް އޮތް 20 އަހަރު ތެރޭ ވެސް އެ ބެޓެރިތައް ރަނގަޅަށް ބަލެހެއްޓޭނެ ކަމަށް އަންދާޒާ ކުރެވޭނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ، މިހާރު އެ ރަށުގައި ދެ ގަޑިއިރަށް އިންޖީނުން ކަރަންޓު ދޭން ޖެހުނަސް ވަރަށް އަވަހަށް އެ ރަށަށް ކަރަންޓު ފޯރުކޮށްދިނުން އެއްކޮށް އިއާދަކުރަނިވި ހަކަތައަށް ބަދަލު ކުރުމަށް ތައްޔާރު ވަމުން އަންނަ ކަމަށެވެ.
ކެޕްޝަން.. ރަކީދޫގައި ބޭނުންކުރާ ބެޓެރީ ސިސްޓަމް --- ސަން ފޮޓޯ/ ނާއިޝް ނާހިދު
މިހާރު އަޅުގަނޑުމެން އެމްޑީ [ސްޓެލްކޯގެ މެނޭޖިން ޑިރެކްޓާ ހުސައިން ފަހުމީ] ވާނީ ޓްވީޓްކޮށްފައި ދެ ގަޑިއިރަށް އަދިވެސް އިންޖީނު ހިންގަން ޖެހޭ ކަމަށް، އެކަމަކު އަޅުގަނޑުމެން މި ބަލަނީ 100 ޕަސެންޓު ރިނިއުވަބަލް މި ރަށް ކުރެވޭތޯ. ކުރިއަށް އޮތް ދެ ހަފްތާ ތެރޭގައި އިތުރު ބެޓެރި އެބަ ބެހެއްޓޭ އާރޯ ޕްލާންޓުގައި. އެ ބެޓެރި އިންސްލޯކުރެވުމުން ދެ ގަޑިއިރަށް ވެސް [އިންޖީނު] ހިންގަން ނުޖެހޭނެ ކަމަށް އަޅުގަނޑުމެން މި އަންދާޒާ ކުރަނީ
އިތުރަށް ވާހަކަދައްކަވަމުން، ނިޒާމް ވިދާޅުވީ، ރަކީދޫގެ ސަރުކާރު ހުރިހާ އިދާރާތަކެއްގެ ފުރާޅުގައި ސޯލާ ހަރުކޮށްގެން ވެސް މުޅި ރަށަށް ބޭނުންވާ ކަރަންޓު ނުއުފެއްދޭ ކަމަށެވެ. އެހެންވެ، 'އަވި ކަތަ' ސްކީމް ދަށުން އެއްބަސްވުމެއް ހަދައިގެން، އާންމު ގޭބިސީތަކުގެ ފުރާޅުތައް ކުއްޔަށް ނަގައިގެން ސޯލާ ހަރުކުރި ކަމަށް އޭނާ ވަނީ ވިދާޅުވެފައެވެ.
އެގޮތަށް ރަކީދޫގައި 12 ގޭބީސީއެއްގައި ސޯލާ ހަރުކޮށްފައިވާއިރު، އެއްބަސްވުމުގެ ދަށުން ފުރާޅުގެ ކުއްޔަށް ދެ ގޮތަކަށް ސްޓެލްކޯއިން ފައިސާ ދެއެވެ، އެއީ އެ މަހެއްގައި ކަރަންޓު ބިލަށް އަރާ ވަރުން އެ ފައިސާ ކެނޑުމަށް ފަހު ބިލު ފޮނުވުން ނުވަތަ އެ މަހެއްގައި ދޭން ޖެހޭ ފައިސާ ގޭބީސީއަކުން ދީފައި އިންނަ ބޭންކު އެކައުންޓަށް ޖަމާކޮށްގެނެވެ.
ރަކީދޫގައި ހަރުކުރި ސޯލާ ސްޓްރީޓް ލައިޓެއް: މި ލައިޓު ދިއްލެނީ އަވިން ހަކަތަ އުފައްދައިގެން ބެޓެރި ޗާޖުވެގެން --- ސަން ފޮޓޯ/ ނާއިޝް ނާހިދު
މިހާރު ސްޓެލްކޯއިން ފާސްކޮށްފައި އޮތީ އެއް ކިލޯ ވޯޓް ސޯލާ އަށް 105 ރުފިޔާ ކުއްޔަށް ދޭ ގޮތަށް ކަމަށްވާއިރު، ރަކީދޫގައި ސޯލާ ކުއްޔަށް ނަގާފައި ހުރި ދިހަ ގެއަކަށް އެ ފައިސާ ދެނީ ބޭންކު އެކައުންޓުންނެވެ. ބާކީ ދެ ގެއަށް ފައިސާ ފޯރުކޮށްދެނީ ކަރަންޓު ބިލުން އުނިކޮށްގެންނެވެ. މިގޮތުން، ކުއްޔަށްވާ ފައިސާ ސްޓެލްކޯއިން ދެނީ ދެ ގޮތުން ކުރެ، ކަސްޓަމަރު ޚިޔާރު ކުރާ ގޮތަކަށެވެ.
"އޭރު އެ ގެއަކަށް އެބަ ލިބޭ 15،00 ރުފިޔާ. އޭގެ މަނައީ އެގެއަކަށް ކަރަންޓު ބިލެއް ނުދާނެ. އެގޭގެ ބިލަށް އަރަނީ 1400 ރުފިޔާ މަހަކު. އެކަމަކު [ސޯލާ] ޖެހުމުގެ ސަބަބުން އެގެއަށް އެބަ ލިބޭ 1500 ރުފިޔާ. އޭގެ މަނާއަކީ 100 ރުފިޔާ އިތުރަށް އަދި، ސްޓެލްކޯއިން އެގެއަށް ދޭންޖެހެޔޭ" ސޯލާ ހަރުކޮށްފައި ހުންނަ ގެއަކަށް ފައިސާ ދޭ ގޮތް އިތުރަށް ނިޒާމް ތަފްސީލުކޮށްދެއްވިއެވެ.
ރަކީދޫ އިންޖީނު ގެ: ސްޓެލްއިން ވަނީ އެ ރަށަށް ބޭނުންވާ ހަކަތަ އުފައްދަން ސޯލާ ހަރުކުރުމަށް 12 ގެއެއްގެ ފުރާޅު ކުއްޔަށް ނަގާފައި --- ސަން ފޮޓޯ/ ނާއިޝް ނާޙިދު
އޭގެއިތުރުން، ރަކީދޫގެ ބަނދަރު ސްޓެލްކޯއިން ވަނީ ހަތަރު ސޯލާ ސްޓްރީޓް ލައިޓެއް ޖަހާފައެެވެ. މިގޮތުން، އިރުގެ އަވިން އެ ލައިޓުގައި އިންނަ ބެޓެރި ޗާޖުވެ، އިރުއޮއްސުމުން ލައިޓު ދިއްލާލެވޭނެއެވެ.
ވެރިކަމުގެ ފަސް އަހަރުގެ ތެރޭގައި ގައުމަށް ބޭނުންވާ ކަރަންޓުގެ 33 އިންސައްތައަކީ އިއާދަކުރަނިވި ހަކަތައިގެ ނިޒާމަކުން އުފައްދާ ކަރަންޓަށް ހެދުމަކީ ރައީސް މުއިއްޒުގެ ވައުދުފުޅެކެވެ.