ވ. ރަކީދޫގައި މިހާރު ބޭނުންކުރަމުން އަންނަ އިރުގެ އަލިން ސާފު ހަކަތަ އުފައްދައިދޭ ހައިބްރިޑް ޕީވީ-ބެސް-ޑީޖީ ސިސްޓަމާ އެކު އެ ރަށުގައި ޖަނަނޭޓާރު ޖައްސަން ޖެހެނީ ދުވާލަކު ދެ ގަޑިއިރަށް ކަމަށް ސްޓެލްކޯގެ މެނޭޖިން ޑިރެކްޓާ ހުސައިން ފަހުމީ މިއަދު ވިދާޅުވެއްޖެއެވެ.
ހައިބްރިޑް ޕީވީ-ބެސް-ޑީޖީ ސިސްޓަމަކީ ފޮޓޯވޯލްޓެއިކް ޕީވީ ސިސްޓަމަކާއި ބެޓެރީ އެނާޖީ ސްޓޯރޭޖް ސިސްޓަމް އަދި ޑީސަލް ޖެނެރޭޓަރު އެއްކޮށްލައިގެން އިތުބާރުހުރި ކަރަންޓު ފޯރުކޮށްދޭ ނިޒާމެކެވެ.
ރަސްމީ އެކައުންޓުން މިއަދު އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ، މިހާރު އެ ރަށުގައި ހިންގަމުންދަނީ ހައިބްރިޑް ޕީވީ-ބެސް-ޑީޖީ ނިޒާމެއް ކަމަށެވެ.
ފަހުމީ ވަނީ މި ނިޒާމުގައި ބޭނުންކުރަނީ އިރުގެ އަލިން ލިބޭ ހަކަތައާއި ބެޓެރީގައި ރައްކާކުރެވޭ ހަކަތަ ކަމަށް ވިދާޅުވެފައެވެ. އަދި، މި ނިޒާމާ އެކު އެ ރަށުގައި ޖަނަރޭޓަރު ޖައްސަން ޖެހެނީ މިހާރު ދެ ގަޑިއިރަށް ކަމަށް އޭނާ ވިދާޅުވިއެވެ.
ފަހުމީ ވަނީ އިއާދަކުރަނިވި ހަކަތައިގެ 33 އިންސައްތައިގެ އަމާޒަށް ވާސިލުވުމުގެ ތަސައްވުރާއި އެ ކަމަށް ކުރައްވާ މަސައްކަތްޕުޅަށް ރައީސް ޑރ. މުޙައްމަދު މުއިއްޒަށް ޝުކުރު އަދާކުރައްވާފައެވެ.
ފާހަގަކޮށްލެވޭ ގޮތުގައި އެންވަޔަރަމެންޓް މިނިސްޓްރީން ވަނީ "މަގޭ ސޯލާ" ޕްރޮގްރާމުގެ ދަށުން 750 ގޭބިސީއަކަށް ސޯލާ ޕީވީ ސިސްޓަމް ފޯރުކޮށްދޭނެ ކަމަށް ބުނެފައެވެ.
ވެރިކަމުގެ ފަސް އަހަރުގެ ތެރޭގައި ގައުމަށް ބޭނުންވާ ކަރަންޓުގެ 33 އިންސައްތައަކީ އިއާދަކުރަނިވި ހަކަތައިގެ ނިޒާމަކުން އުފައްދާ ކަރަންޓަށް ހެދުމަކީ ރައީސް މުއިއްޒުގެ ވައުދުފުޅެކެވެ.