އިސްރާއީލުން އެއްބަސްވެފައިވާ އިސްރާއީލާއި ލުބުނާނާ ދެމެދު ކުރަމުންދާ ހަނގުރާމަ ހުއްޓާލުމުގެ އެއްބަސްވުން ތަންފީޒު ކުރުމަށް ލުބުނާނުގެ ސިފައިންނާ ގުޅިގެން މަސައްކަތްކުރާނެ ކަމަށް އެ ގައުމުގެ ހަތިޔާރުއެޅި ޖަމާއަތް، ހިޒްބުاللهގެ ސެކްރެޓަރީ ޖެނެރަލް ނާއިމު ޤާސިމް ވިދާޅުވެއްޖެއެވެ.
ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުން ފުރަތަމަ ފަހަރަށް ޓީވީ މެދުވެރިކުރައްވައި ދެއްވި ޚިޠާބުގައި ޤާސިމް ވިދާޅުވީ އެއްބަސްވުމުގެ ޝަރުތުތަކުގެ ދަށުން 60 ދުވަހުގެ ތެރޭގައި ލުބުނާނުގެ ދެކުނަށް ފޮނުވާ ސިފައިންނާއެކު މައްސަލަތަކެއް ނުވަތަ ޚިޔާލުތަފާތުވުންތަކެއް އޮތް ކަމަކަށް ފެނިވަޑައިނުގަންނަވާކަމަށެވެ.
"އެއްބަސްވުމުގައިވާ ވައުދުތައް ތަންފީޒު ކުރުމަށްޓަކައި އަޅުގަނޑުމެންނާއި ލުބުނާނުގެ ސިފައިންގެ ގުޅުން ރަގަޅުވާނެ." ޤާސިމް ވިދާޅުވިއެވެ.
ލުބުނާނުގެ ދެކުނަށް ބައެއް ސިފައިން ފޮނުވައި، ލުބުނާނުގެ ކެބިނެޓާ ހިއްސާ ކުރުމަށް ތަފުސީލީ ޕްލޭނެއް ތައްޔާރު ކުރަމުންދާ ކަމަށް ސަލާމަތީ މަސްދަރުތަކާއި އޮފިޝަލުންނާ ހަވާލާދީ ރޮއިޓާސް އިން މީގެކުރިން ރިޕޯޓުކޮށްފައިވެއެވެ.
އެމެރިކާ މެދުވެރިވެގެން ކުރިއަށް ގެންދާ ހަނގުރާމަ ހުއްޓާލުމުގެ އެއްބަސްވުމުގެ ޝަރުތުތަކުގެ ދަށުން އިސްރާއީލުގެ ސިފައިން ލުބުނާނުން ފޭބުމަށް 60 ދުވަހުގެ މުއްދަތެއް ލިބިފައިވެއެވެ.
އިސްރާއީލުގެ އަސްކަރިއްޔާއިން ވަނީ ލުބުނާނާއި އިސްރާއީލުގެ ސަރަހައްދީ ރޮނގު ކައިރީގައި އޮންނަ ރަށްތަކަށް މީހުން އެނބުރި ދިއުމަށް ހުރަސް އަޅައި، އެ ރަށްރަށުގެ މީހުންނަށް އަމާޒުކޮށް ފާއިތުވެދިޔަ ދުވަސްތަކުގައި ހަމަލާތައް ދީފައެވެ.
އިސްރާއީލުން ހަނގުރާމަ ހުއްޓާލުމަށްވެފައިވާ އެއްބަސްވުމާ ޚިލާފުވެފައިވާ ކަމަށާއި، ބުރާސްފަތި ދުވަހު ލިތާނީ ކޯރުގެ އުތުރަށް ވައިގެ ހަމަލާއެއް ދީފައިވާ ކަމަށް ވެސް ލުބުނާނުގެ ސިފައިންނާއި ހިޒްބުالله އިން ވަނީ ތުހުމަތުކޮށްފައެވެ.
މިދިޔަ އަހަރު އޮކްޓޯބަރު މަހު އިސްރާއީލުން ހިޒްބުاللهއާ ދެކޮޅަށް ހަނގުރާމަ ފެށި ފަހުން ހިންގި އަސްކަރީ އޮޕަރޭޝަންތަކުގައި ހިޒްބުاللهގެ 12،500 އަށް ވުރެ ގިނަ އަމާޒަކަށް ހަމަލާދީފައިވާ ކަމަށް އިސްރާއީލުގެ އަސްކަރިއްޔާއިން ވަނީ ބުނެފައެވެ.
އޮކްޓޯބަރު މަހު ލުބުނާނުގެ ދެކުނަށް އެއްގަމު މަގުން ހަމަލާތައް ދޭން ފެށިފަހުން އިސްރާއީލުގެ އަސްކަރީ ބްރިގޭޑް ފެންވަރުގެ 14 ޓާސްކް ފޯހަކުން 100އަށް ވުރެ ގިނަ ހާއްސަ އޮޕަރޭޝަން ހިންގާފައިވާ ކަމަށްވެސް އިސްރާއީލު އަސްކަރިއްޔާއިން ބުނެފައިވެއެވެ.
އަދި ހިޒްބުاللهގެ 2،500 މެމްބަރުންނާއި އިސް އޮފިޝަލުން މަރާލާފައިވާ ކަމަށް ބުނެފައިވެއެވެ.
ލުބުނާނުގެ ސިއްޚީ އިދާރާއިން ބުނާ ގޮތުގައި 2023ވަނަ އަހަރުގެ އޮކްޓޯބަރު މަހުން ފެށިގެން ހިނގި ހަނގުރާމައިގައި ގާތްގަޑަކަށް 3،961 މީހުން މަރުވެ 16،520 މީހުން ޒަޚަމްވެފައިވެއެވެ.