ދިވެހިބަހުގެ އެކެޑަމީން ށ. ޅައިމަގުގެ ސަރުކާރު މުވައްޒަފުންނަށް ޚާއްސަކޮށްގެން ކުރިޔަށް ގެންދިޔަ 10 ގަޑިއިރުގެ ދިވެހިބަހުގެ ކޯސް މިއަދު ނިންމާލައިފިއެވެ.
މި ކޯސް ނިންމުމުގެ ރަސްމިއްޔާތުގައި ވާހަކަ ދައްކަވަމުން ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމް ވަނީ އިނގިރޭސި މީޑިއަމަށް ރާއްޖޭގައި ކިޔަވައިދިނުމުގެ ސަބަބުން ބޮޑުވަމުން އަންނަ ޖީލު ދިވެހިބަހާއި ވަރަށް ދުރުކަން ފާހަގަ ކުރައްވައިފައެވެ. ސްކޫލުތަކުގައި ކިޔަވައިދޭ މާއްދާތަކުގެ ތެރެއިން ދިވެހިންނާ ވަރަށް ބޮޑަށް ގުޅިފައިވާ ބައެއް މާއްދާތައް ވެސް ކިޔަވައިދެނީ އިނގިރޭސިބަހުންނެވެ. މި ކަމުގެ ސަބަބުން ދިވެހިބަހަށް ކުރާ ނޭދެވޭ އަސަރުގެ މައްޗަށް އަލިއަޅުއްވާލައްވައި އަޝްރަފް ވާހަކަ ދެއްކެވިއެވެ.
އެހެން ނަމަވެސް ތަކެއްޗާއި ތަންތަނާއި އަދި ހާލަތްތަކުގައި ބޭނުންކުރާނެ ލަފުޒުތައް ވެސް ދިވެހިބަހުގައި އެބަހުރިކަން އަޝްރަފު ފާހަގަ ކުރެއްވިއެވެ.
"ލަފުޒު ނެތީކީ ނޫނޭ، ބަސްކޮށާރު ނެތީކީ ނޫނޭ. އަޅުގަނޑުމެން ބަހަށް ބީރައްޓެހީ، އަޅުގަނޑުމެން ބަހަށް ނުފަރިތައީ... މި ވާގޮތަކީ އަޅުގަނޑުމެންގެ ސިކުނޑި ފަގީރީ. އަޅުގަނޑުމެން ވިސްނުމާއި ފިކުރު އެއަށްވުރެން ފަގީރުވަނީ" އަޝްރަފު ވިދާޅުވިއެވެ.
ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމް: ޅައިމަގުގައި ކުރިޔަށް ގެންދިޔަ ދިވެހިބަހުގެ ކޯސް ނިންމުމުގެ ރަސްމިއްޔާތުގެ ތެރެއިން --
މި ކޯހަކީ އާންމުކޮށް މުޅި ރާއްޖެއަށް ހުޅުވައިލައިގެން، ދައުލަތުގެ އިދާރާތަކާއި މުވައްޒަފުންނަށް ޚާއްސަކޮށްގެން އޮންލައިންކޮށާއި ކުލާހަށް ހާޒިރުވެގެން ކިޔަވާ އުސޫލުން ހިންގާ ކޯހެކެވެ.
މި ކޯހުގެ މަގުސަދަކީ ދިވެހިބަހުގެ ހަމަތަކާއި ގަވާއިދުތަކާއި އުސޫލުތަކާ އެއްގޮތަށް ލިޔެކިޔުންތައް ބެހެއްޓުމާއި އަދަބު އިޙުތިރާމާއެކު މުއާމަލާތުކުރާނެ ގޮތްތައް މުވައްޒަފުންނަށް އޮޅުންފިލުވައިދިނުމާއި ދިވެހިބަހަށް މުވައްޒަފުން އަހުލުވެރި ކުރުން އެކެޑަމީން ބުނެއެވެ.
ޅައިމަގުގައި ކުރިޔަށް ގެންދިޔަ ދިވެހިބަހުގެ ކޯސް ނިންމުމުގެ ރަސްމިއްޔާތުގެ ތެރެއިން --
އެކެޑަމީން ބުނި ގޮތުގައި ޅައިމަގުގައި ކުރިޔަށް ގެންދިޔަ ކޯހުގައި 37 މީހުން ބައިވެރިވި ކަމަށެވެ. ހަ ދަންފަޅިއަކަށް ބަހާލައިގެން މި ކޯހުގައި ކުރިޔަށް ގެންގޮސްފައިވަނީ:
- ދިވެހިބަހުން ރީތިކޮށް ވާހަކަދައްކާނެ ގޮތް އޮޅުންފިލުވައިދިނުމާއި ތަމްރީނު ހެދުން
- ލަފުޒު ވަކިކޮށް ލިޔުމުގެ ގަވާއިދު އޮޅުންފިލުވައިދިނުމާއި ތަމްރީނު ހެދުން
- ސާފު ރީތިބަހުން އިބާރާތްކުރާނެ ގޮތް ކިޔައިދީ ތަމްރީނު ހެދުން
- ދިވެހިބަހުގެ ގަވާއިދާ އެއްގޮތަށް ސުކުންކުރާނެ ގޮތްތައް އޮޅުންފިލުވައިދީ ތަމްރީނު ހެދުން
- ތާނައިގައި ތިކިޖަހައިގެން ލިޔާނެ އުސޫލު އޮޅުންފިލުވައިދިނުމާއި ތަމްރީނު ހެދުން
މި ކޯހުގައި ކިޔަވައިދެއްވީ، ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ މުޝީރު މުޙައްމަދު ޝާހިދު ޙަލީމާއި ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމެވެ.
ޅައިމަގުގައި ކުރިޔަށް ގެންދިޔަ ދިވެހިބަހުގެ ކޯސް ނިންމުމުގެ ރަސްމިއްޔާތުގެ ތެރެއިން --
މި ކޯހުގެ ބައެއް ބައިވެރިން ވަނީ މި ކޯހާއި ގުޅިގެން ޝުއޫރުތައް ހިއްސާކޮށްފައެވެ. އެ ގޮތުން ދިވެހިބަސް ބޭނުންކުރަންވީ ގޮތްތަކާއި، ބަސް ބޭނުންކުރުމުގައި ރަނގަޅު ކުރަންޖެހޭ ކަންކަން މި ކޯހުން އޮޅުންފިލައިގެން ދިޔަ ކަމަށް ޝުއޫރު ހިއްސާކުރަމުން ކޯހުގެ ބައިވެރިއަކު ބުންޏެވެ.
ޅައިމަގުގައި ކުރިޔަށް ގެންދިޔަ ދިވެހިބަހުގެ ކޯސް ނިންމުމުގެ ރަސްމިއްޔާތުގެ ތެރެއިން --
އެހެން ބައިވެރިޔަކު ބުނި ގޮތުގައި މިއީ ތަފާތު ޕްރޮގްރާމެކެވެ. އެ ގޮތުން ވަޒީފާގެ މާހައުލުގައި ކުރަމުންދާ މަސައްކަތަށް ވެސް އިތުރު ފުރިހަމަކަމެއް މި ކޯހުގެ ސަބަބުން ގެނުވާނެ ކަމަށް ބުންޏެވެ. އަދި މި ފަދަ ޕްރޮގްރާމްތައް ހިންގެނީ ވަރަށް މަދުންކަން ފާހަގަކޮށް، ގިނައިން މި ފަދަ ޕްރޮގްރާމްތައް ހިންގުމަށް އޭނާ އެދުނެވެ.
އިއްޔެ ފަށައިގެން މިއަދުގެ ނިޔަލަށް ކުރިޔަށް ގެންދިޔަ މި ކޯހަކީ ޅައިމަގު ކައުންސިލުން އިސްނަގައިގެން ދިވެހިބަހުގެ އެކެޑަމީއާ ގުޅިގެން ކުރިއަށް ގެންދިޔަ ކޯހެކެވެ.