ރައީސް ޑރ. މުހައްމަދު މުއިއްޒާއި އެ މަނިކުފާނުގެ އަނބިކަނބަލުން ސާޖިދާ މުހައްމަދު އިނގިރޭސިވިލާތަށް ކުރެއްވި ނުރަސްމީ ދަތުރުފުޅު ނިންމަވައިލެއްވުމަށް ފަހު މިއަދު އެނބުރި މާލެ ވަޑައިގެންފިއެވެ.
ނުރަސްމީ ދަތުރުފުޅެއްގައި ރައީސްގެ ދެކަނބަލުން އިނގިރޭސިވިލާތަށް ވަޑައިގަތީ މި މަހު 21 ގައެވެ.
ރައީސް އޮފީހުން މިއަދު ބުނީ، ރައީސްގެ ދެކަނބަލުން ހަވީރުގެ ވަގުތެއްގައި އެނބުރި މާލެ ވަޑައިގެންފައިވާ ކަމަށެވެ. އެހެންވެ، އެ މަނިކުފާނު ނުރަސްމީ ދަތުރުފުޅުގައި އިނގިރޭސިވިލާތުގައި ހޭދަކުރެއްވީ ހަފުތާއެކެވެ.
އެ ދަތުރުފުޅަކީ އަމިއްލަފުޅު ދަތުރުފުޅެއްކަމުން ދަތުރުފުޅާ ގުޅޭ އެއްވެސް މައުލޫމާތެއް ރައީސް އޮފީހުން ހާމައެއްނުކުރެއެވެ.
މި ދަތުރުފުޅުގައި ރައީސް ކުރައްވާ އިދާރީ މަސައްކަތްޕުޅުތަކުގެ ޚަރަދާއި އާއިލާއާއި އަމިއްލަފުޅު ކަންކަން ވެސް ހިމެނޭގޮތުން، މުޅި ދަތުރުފުޅުގެ ހުރިހާ ޚަރަދެއް ވެސް ކުރައްވާނީ އެ މަނިކުފާނު އަމިއްލަފުޅަށް ކަމަށް ރައީސް އޮފީހުން މީގެ ކުރިން ބުނެފައިވެއެވެ.
މީގެ ކުރިން ރައީސް ނުރަސްމީ ދަތުރުފުޅުތަކުގައި ސިންގަޕޫރަށް ވަޑައިގެންފައިވެއެވެ.