ކީރިތި ރަސޫލާގެ ހަތަރު ޚަލީފާއިންގެ ސުންނަތަށް ތަބާވެ، އޭގެން ނަމޫނާ ނަގައި، ކަޅު ފޮއި ރެއެއްގެ އަނދިރިކަންފަދަ ފިތުނަވެރި ދުނިޔޭގައި ހައްގު މަގުގައި ކެރިގެން ފައިތިލަ ސާބިތު ކުރަންޖެހޭ ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާ ޚާއްސަކޮށްފައިވަނީ "އަލްޚުލަފާއުއްރާޝިދޫންގެ ހަޔާތްޕުޅުން ދަރުސްތަކެއް"، މި މައުޟޫއުގެ މައްޗަށެވެ.
ޙުތުބާގައި ބުނީ، މާތްﷲ ކޮންމެ ނަބިއްޔަކަށްމެ އެ ބޭކަލަކަށް ތަބާވާނޭ ޞަޙާބީން ލެއްވި ކަމަށެވެ. އެހެންނަމަވެސް، މި އުންމަތަށް ކައުކުރެއްވި ނަބިއްޔާ މުހައްމަދުގެފާނުގެ އަޞްޙާބުންވެފައިވަނީ އުންމަތް ދެކެފައިވާ ރަންމުތްތަކެއްކަމަށް ޚުތުބާގައި ބުންޏެވެ. އޭގެ ތެރެއިން ވެސް 10 ބޭކަލަކު ޚާއްޞަކުރައްވައި އެ ބޭކަލުންނަށް ސުވަރުގޭގެ އުފާވެރިކަމުގެ ޚަބަރު ދެއްވާފައިވާ ކަމަށް ޚުތުބާގައި ވަނީ ބުނެފައެވެ.
އަލްޚުލަފާއުއްރާޝިދޫންއަކީ، މާތް ނަބިއްޔާގެ ޚަލީފާކަން ކުރެއްވި ހަތަރު އަޞްޙާބުބޭކަލުންކަމުގައިވާ އަބޫބަކުރުގެފާނާއި، އުމަރުގެފާނާއި، އުސްމާނުގެފާނާއި، އަލީގެފާނެވެ. މި ބޭކަލުންނަކީ ނަބިއްޔާ މުހައްމަދުގެފާނު، އެ ބޭކަލުންނަށް ތަބާވުމަށް އިރުޝާދުދެއްވައިފައިވާ ހަތަރު ބޭކަލުންނެވެ.
މި ބޭބޭކަލުންގެ ސުންނަތުގައި ހިފުމަށްޓަކައި އެ ބޭކަލުންގެ ހަޔާތްޕުޅަށް ނަޒަރު ހިންގައި، އެއިން ލިބޭ ފިލާވަޅުތަކުގެ އަލީގައި އަހަރެމެންގެ ދިރިއުޅުން ބިނާކުރުން ވަރަށް މުހިންމު ކަމަށް ޚުތުބާގައިވަނީ ހަނދާންކޮށްދީފައެވެ.
ފުރަތަމަ ޚަލީފާ: އަބޫބަކުރުގެފާނު
މުސްލިމުންގެ އެންމެ ފުރަތަމަ ޚަލީފާއަކީ އަބޫބަކުރުގެފާނެވެ. އެކަލޭގެފާނު ވެވަޑައިގެންފައިވަނީ އީމާންކަމާއި ހެޔޮ އަމަލުގައި ނަމޫނާ ބޭކަލެއްކަމުގައެވެ. ހެޔޮ ކޮންމެ ކަމެއް ކުރެއްވުމުގައި އެކަލޭގެފާނު ކުރި ހޯއްދަވައެވެ.
ބާރަށް ދުވާ އަހުގައި އެތައް ދުވަހަކުން ކުރެވޭ ދަތުރެއް މާތް ނަބިއްޔާ ކުޑަ ހިނދުކޮޅެއްގެ ތެރޭ ނިންމަވައިލައްވައި، ހަމަ އެ ދަތުރުފުޅުގައި އުޑުތަކަށް އަރައިވަޑައިގަތް ޚަބަރު ގަބޫލުކުރައްވަން ބައެއް ޞަޙާބީންނަށް ވެސް ދަތިފުޅުވިއެވެ.
އެހެނަސް މައްކާގެ މުޝްރިކުން މަލާމާތުގެ ރާގެއްގައި އަބޫބަކުރުގެފާނު އަރިހުގައި، ކަލޭގެފާނުގެ އެކުވެރިޔާ މުހައްމަދުގެފާނު އެފަދައިން އެބަ ޙަދީޘްކުރައްވައޭ، ކަލޭގެފާނު އެ ވާހަކަ ތެދުކުރައްވަންތޯއޭ ދެންނެވުމުން، އެކަލޭގެފާނުގެ ޖަވާބަކަށް ވީ ސިޔަރަތުގައި ރަން އަކުރުން ލިޔެވިފައިވާ ބަސްފުޅެކެވެ.
އާނއެކެވެ. އަހުރެން އެ ވާހަކަ ތެދުކުރަމެވެ. އަހުރެން މި ހުރީ ތިޔަށް ވުރެ މާ ބޮޑެތި ކަންތައްތައް އެކަލޭގެފާނާ ބެހޭ ގޮތުން ތެދުކޮށްގެންނެވެ. އެހެނީ ހެނދުނާއި ހަވީރު އެކަލޭގެފާނުގެ އަރިހަށް އުޑުގެ ޚަބަރުތައް (އެބަހީ ވަޙީ) އަންނަކަން އަހުރެން މި ހުރީ ތެދުކޮށްގެންނެވެ، ހުކުރު ޚުތުބާ
އެއާއެކު އަބޫބަކުރުގެފާނަށް އަރުވާފައިވަނީ އައްޞިއްދީޤުގެ ލަގަބެވެ.
އިސްލާމްދީނާ މެދު ޝައްކާއި ވަހުމުތައް އުފައްދައި ފަތުރަމުންދާ މި ޒަމާނުގައި އަހަރެމެން ވެސް އަބޫބަކުރުގެފާނު ދެއްކެވި ފަދަ ސާބިތުކަމެއް ދައްކާން ޖެހޭނެ ކަމަށް ޚުތުބާގައި ބުންޏެވެ. މީހަކު، އެ މީހެއްގެ ކޮށި ވިސްނުން ޙުއްޖަތަކަށް ހަދައި، މުސްލިމުންގެ ސިކުނޑި ދޮވެލުމަށް ޓަކައި ދައްކާ ވާހަކައަކުން، ޤުރުއާނާއި ސުންނަތުން ސާބިތުވާ، އިސްލާމް ދީނުގެ އަސާސަކާ މެދު ޝައްކު އުފައްދައިގެން ނުވާނެއެވެ.
އިސްލާމީ މަރުކަޒުގައި ހުކުރު ޚުތުބާ ދެނީ -- ސަން ފޮޓޯ/ މުޙައްމަދު ހައްޔާން
ދެވަނަ ޚަލީފާ: އުމަރުގެފާނު
އަލްޚުލަފާއުއްރާޝިދޫންގެ ތެރެއިން ދެވަނަ ޚަލީފާއަކީ އުމަރުގެފާނެވެ. އެކަލޭގެފާނަކީ، އިސްލާމްވެވަޑައިގަތުމުގެ ކުރީގައި މައްކާގެ މުޝްރިކުންގެ ތެރެއިން ނަބިއްޔާގެ މައްޗަށް އެންމެ އަދާވާތްތެރި އެއް ބޭކަލެކެވެ. އުރައިން ކަނޑި ދަންމަވައިގަނެ، ނަބިއްޔާ ގަތުލުކުރުމަށް އެކަލޭގެފާނު ވަޑައިގަތެވެ. ނަމަވެސް، މާތްﷲ އެކަލޭފާނަށް ހިދާޔަތް ދެއްކެވުމާ އެކު ދީނުގެ ދިފާއުގައި ވަގުތުން މަސައްކަތް ފެއްޓެވިއެވެ. ގުނާ އަދަދު ނުކުރެވޭހާ ގިނަގުނަ ޚިދުމަތްތަކެއް އިސްލާމްދީނަށް ކުރައްވައި ގިނަގުނަ ނަސްރުތަކެއް ހޯއްދަވައިދެއްވިއެވެ.
އެކަލޭގެފާނު ވެވަޑައިގަތީ ސިޔާސީ ދާއިރާއާއި ދައުލަތް ހިނގުމުގެ ގޮތުން ވެސް މުޅި އިސްލާމީ ދައުލަތަށް އިންގިލާބީ ބަދަލުތަކެއް ގެންނަވައި، އިސްލާމީ ފުތޫހާތު ފުޅާކުރެއްވި ވަރުގަދަ ލީޑަރަކަށެވެ. ޝައިތާނާ ވެސް އުމަރުގެފާނު ހިންގަވާ މަގަކުން ހިނގާން ޖެހިއްޖެ ނަމަ، މަގު ބަދަލުކުރާކަމުގައި މާތް ނަބިއްޔާ ޙަދީޘްކުރައްވައިފައިވެއެވެ.
އުމަރުގެފާނުގެ ޙަޔާތްޕުޅުން އަހަރެމެންނަށް ލިބޭ އެންމެ ބޮޑު އެއް ފިލާވަޅަކީ ޚުތުބާގައި ބުނި ގޮތުގައި، ތިމާއަކީ މާޒީގައި ކުށްތަކަށް އަރައިގަތުމާއި، ފާފަކުރުން ގިނަ، ދީނީ ކަންކަމަށް ފަރުވާކުޑަ މީހެއްކަމުގައި ވިޔަސް، އިސްލާހުވެ، ދީނަށާއި، އުންމަތަށް ޚިދުމަތްކުރުމަކީ ހުޅުވިފައިވާ ދޮރެއްކަމެވެ. އަދި، އެހާ ފަސޭހައިން މީސްތަކުންނާ މެދު އުންމީދު ކަނޑައިލައިގެން ނުވާނެކަމަށް ވެސް ޚުތުބާގައި ބުންޏެވެ.
ތިންވަނަ ޚަލީފާ: އުސްމާނުގެފާނު
މުސްލިމުންގެ ތިންވަނަ ޚަލީފާ، އުސްމާނުގެފާނު ފާހަގަކުރެވެނީ އަޚުލާގީ ރިވެތި ސިފަތައް ލިބިވަޑައިގެންވާ ލަދުވެތި ބޭކަލެއްގެ ގޮތުގައި ކަމަށް ޚުތުބާގައި ބުންޏެވެ. މަލާއިކަތުން ވެސް އެކަލޭގެފާނު ދެކެ ލަދުވެތިވެވަޑައިގަންނަވާކަމުގައި ރަސޫލާ ހަދީޘްކުރައްވައިފައިވެއެވެ.
އިސްލާމީ އަޚުލާގިއްޔާތުގެ މި ރިވެތި ސިފަތަކާ އެކު، އެކަލޭގެފާނަކީ ނަބިއްޔާގެ ދެ ދަރިކަނބަލަކާ ކައިވެނި ބައްލަވައިގަތުމުގެ ޝަރަފު ލިބިވަޑައިގަތް ހަމައެކަނި ޞަޙާބީއެވެ. އެހެންކަމުން އެކަލޭގެފާނަށް ޛުއްނޫރައިން ނުވަތަ ދެނޫރުގެ ވެރިޔާގެ ލަޤަބު ލިބިވަޑައިގަތެވެ.
އުސްމާނުގެފާނަކީ ތަނަވަސް އަދި މީސްތަކުންނަށް ނުހަނު ދީލަތި ބޭކަލެކެވެ.
ޚުތުބާގައި ބުނީ، އަހަރެމެންނަކީ ވެސް އުސްމާނުގެފާނެ ފަދައިން، އަޚުލާގީ ރިވެތި ސިފަތައް އަށަގެންފައިވާ، މުޖުތަމައަށް މަންފާކުރަނިވި ބަޔަކަށްވުމަކީ މުހިންމުކަމެއް ކަމަށެވެ.
އެކަން ހާސިލުކުރުމަށްޓަކައި، ދިރިއުޅުމުގައި އަޚުލާގީ ގޮތުން ހިފަހައްޓާނެ އިސްލާމީ އަސާސްތަކެއްގެ މައްޗަށް ބިނާވެފައިވާ އުސޫލުތަކެއް ކަނޑައަޅާށެވެ! އަދި އެ އުސޫލުތަކުގައި ވަރުގަދައަށް ހިފަހައްޓާށެވެ! ތިމާއަކީ ތަނަވަސްކަމުގެ އަހުލުވެރިއެއްނަމަ، ޒަކާތް ނެރެ، ނިކަމެތީންނަށް އެހީވެ، މީހުން ބިނާކުރުން ފަދަ މުޖުތަމައަށް ފައިދާ ކުރަނިވި ކަންކަމަށް ހޭދަކުރާށެވެ! ހުކުރު ޚުތުބާ
ހަތަރުވަނަ ޚަލީފާ: އަލީގެފާނު
އަލްޚުލަފާއުއްރާޝިދޫންގެ އެންމެ ފަހު ބޭކަލަކީ، އަލީގެފާނެވެ. އެކަލޭގެފާނަކީ ހިތްވަރުގަދަކަމުގެ ރަމްޒެކެވެ. ހަނގުރާމައިގެ މައިދާނުގައްޔާއި، ޚަލީފާކަމުގައި ބޮޑެތި ފިތުނަތަކެއްގެ ތެރޭގައި އެކަލޭގެފާނު ދެއްކެވި ގިޔާދަތާއި، ހިތްވަރަކީ ތާރީޚު ހެކިދޭ ކަންކަން ކަމަށް ޚުތުބާގައި ބުންޏެވެ.
މާތް ނަބިއްޔާ މަދީނާއަށް ހިޖުރަކުރެއްވުމަށް މައްކާއިން ނުކުމެވަޑައިގަތް ރޭގައި، މައްކާގެ މުޝްރިކުން ތިބީ އެކަލޭގެފާނުގެ ގެކޮޅުން ނުކުމެވަޑައިގަތުމާ އެކު، އެކަލޭގެފާނު އަވަހާރަކޮށްލާން ތައްޔާރަށެވެ. އެ ޚުތޫރަތްތެރި ވަގުތުގައި ވެސް މުޝްރިކުންނަށް އޮޅުވައިލެއްވުމަށް ނަބިއްޔާގެ ދާންމަތިކޮޅުގައި އޮންނެވީ އަލީގެފާނެވެ. އިސްލާމްދީނާއި، ރަސޫލާގެ ދިފާއުގައި އެކަލޭގެފާނުގެ ޖާނު ގުރުބާން ކޮށްލައްވާން ވެސް ތައްޔާރަށް ހުންނެވިކަން އެ ހިތްވަރުގަދަ އަމަލުފުޅުން އެނގޭ ކަމަށް ޚުތުބާގައި ބުންޏެވެ.
ހަތަރު ޚަލީފާއިންގެ ވާހަކަފުޅަށް ރިއާޔަތްކުރުމަށް ފަހު، މިއަދުގެ ހުކުރު ޚުތުބާގައި ބުނީ، އަހަރެމެންނަކީ ވެސް ދީނުގެ ދިފާއުގައި މަސައްކަތްކުރާ ބަޔަކަށް ވާންޖެހޭނެ ކަމަށެވެ. އަދި، ޒަމާނާ އެކު އަންނަ ގޮންޖެހުންތަކާ ކެރިގެން ކުރިމަތިލާ ބަޔަކަށް ވާންޖެހޭނެ ކަމަށް ޚުތުބާގައި ބުންޏެވެ.
ކަޅު ފޮއި ރެއެއްގެ އަނދިރިކަންފަދަ ފިތުނަވެރި ދުނިޔެއެއްގައި އަހަރެމެން ދިރިއުޅެމުންދާއިރު ހައްގު މަގުގައި ކެރިގެން ފައިތިލަ ސާބިތު ކުރާންޖެހޭ ކަމަށް ބުނެ، ޚުތުބާގައި ވަނީ ނަސޭހަތްތެރިވެފައެވެ.