މަސްތުވާތަކެއްޗާއެކު ހައްޔަރުކުރި ސިފައިންގެ މީހަކު ޝަރުތުތަކަކާއެކު ދޫކޮށްލައިފިއެވެ.
ކްރިމިނަލް ކޯޓުން ނެރެފައިވާ އަމުރުގައި ވާގޮތުން މި މައްސަލައިގައި ހައްޔަރުކޮށްފައި ވަނީ އެމްއެންޑީއެފްގެ ކޯސްޓްގާޑުގައި މިހާރުވެސް ވަޒީފާ އަދާކުރަމުންދާ މއ.ނައިޓްވިލާ އުމުރުން 21 އަހަރުގެ މީހެކެވެ.
އޭނާ ހައްޔަރުކޮށްފައި ވަނީ ރޭގެ ދަންވަރު 02:45 ހާއިރު ފުލުހުން މާލެތެރެ ޕެޓްރޯލުކުރަމުން ދަނިކޮށް އޭނާއަށް ފުލުހުން ފެނުމުން ހާސްވެ ބިރުގަނެ އެސަރަހައްދުން ދާން އުޅުމުން ކަމަށް ފުލުހުން ކްރިމިނަލް ކޯޓުގައި ބުނެފައިވެއެވެ.
އޭނާގެ މައްޗަށް ކުރެވިފައިވާ ތުހުމަތުތަކާ ގުޅިގެން ހެކީގެ ގޮތުގައި، އޭނާގެ ކުޑަކަމުދާ ތަކެތި ޓެސްޓުކުރިއިރު މަސްތުވާއެއްޗަކަށް ޕޮޒިޓިވް ވެފައި ވާކަމަށާއި އޭނާ ލައިގެންހުރި ސޯޓުގެ ވާތްފަރާތު ކުރިމަތީ ޖީބުން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ރަބަރު ޕެކެޓަކާއި ސޯޓުގެ ވާތަފަރާތު އަރިމަތީ ޖީބުންވެސް މަސްތުވާ ތަކެތިކަމަށް ޝައްކުކުރެވޭ އެއްޗެއްހުރި ރަބަރު ޕެކެޓެއް ފެނިފައި ވާކަމަށް ބުނެ ސީނަށް ދިޔަ ފުލުހެއްގެ ބަޔާން ހުށަހަޅާފައި ވާކަމަށް ކޯޓު އަމުރުގައި ވަނީ ބުނެފައެވެ.
ބަޔާނުގައި ވާގޮތުން މި މައްސަަލައިގެ ކުރީގައި އޭނާގެ ކުށުގެ ރެކޯޑެއް ވެސް ހައްޔަރު ރެކޯޑެއް ވެސް ނެތެވެ. އަދި މީނާއަކީ މިހާރުވެސް އެމްއެންޑީއެފްގެ ވަޒީފާގައި އުޅެމުންދާ ފަރާތެއް ކަމަށާއި ކުށުގެ ވެށީގައި އުޅޭ މީހެއް ނޫންކަމަށް ބެލެވޭ ކަމަށްވެސް ވަނީ ބުނެފައެވެ. ނަމަވެސް އޭނާގެ ހަށިގަނޑުން ފެނުނު މަސްތުވާތަކެތީގެ ބަރުދަން ޓްރެފިކިން މިންގަނޑަށް ނާރާ ކަމަށާއި އޭނާއާ ސުވާލު ވެސް ކުރެވިފައި ނުވާ ކަމަށް އިންވެސްޓިގޭޓިން އޮފިސަރު ވިދާޅުވިއެވެ.
އެ މައްސަލައިގައި އޭނާ ދޫކޮށްފައި ވަނީ ޝަރުތުތަކާއެކު ކަމަށް ކޯޓު އަމުރުގައި އޮތް ނަމަވެސް އެއީ ކޮން ޝަރުތުތަކެއް ކަމެއް ބަޔާންކޮށްފައިނުވެއެވެ.