ދިވެހި ބަހުގެ އެކެޑަމީން ށ. ޅައިމަގުގެ ސަރުކާރު މުވައްޒަފުންނަށް ޚާއްސަކޮށް، ދިވެހިބަހުގެ ކޯހެއް މިއަދު ފަށައިފިއެވެ.
ދިވެހި ބަހުގެ އެކެޑަމީން ބުނީ، މި ކޯހަކީ އާންމުކޮށް މުޅި ރާއްޖެއަށް ހުޅުވައިލައިގެން، ދައުލަތުގެ އިދާރާތަކާއި މުވައްޒަފުންނަށް ޚާއްސަކޮށްގެން އޮންލައިންކޮށާއި ކުލާހަށް ހާޒިރުވެގެން ކިޔަވާ އުސޫލުން ހިންގާ ކޯހެއް ކަމަށެވެ.
މި ކޯހުގައި 37 މީހުން ބައިވެރިވެފައިވާއިރު، ކޯސް ކުރިއަށް ގެންދާނީ ހަ ދަންފަޅިއަކަށް ބަހައިލައިގެން ކަމަށް އެކެޑަމީން މައުލޫމާތުދެއެވެ.
އެކެޑަމީން ބުނީ، މި ކޯހުގެ މަގުސަދަކީ ދިވެހިބަހުގެ ހަމަތަކާއި ގަވާއިދުތަކާއި އުސޫލުތަކާ އެއްގޮތަށް ލިޔެކިޔުންތައް ބެހެއްޓުމާއި އަދަބު އިޙުތިރާމާއެކު މުއާމަލާތުކުރާނެ ގޮތްތައް މުވައްޒަފުންނަށް އޮޅުންފިލުވައިދިނުމާއި ދިވެހިބަހަށް މުވައްޒަފުން އަހުލުވެރި ކުރުން ކަމަށެވެ.
ޅައިމަގުގައި ސަރުކާރު މުވައްޒަފުންނަށް ޚާއްސަކޮށް، ދިވެހި ބަހުގެ ކޯހެއް ކުރިއަށްގެންދިޔުން ---
އެ ކޯހުގައި ކިޔަވައިދެއްވަނީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ މުޝީރު މުޙައްމަދު ޝާހިދު ޙަލީމާއި ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމެވެ.
އެ ކޯހުގައި ކިޔަވައިދޭ ބައިތަކުގެ ތެރޭގައި، ލަފުޒު ވަކިކޮށް ލިޔުމުގެ ގަވާއިދު އޮޅުން ފިލުވައިދިނުމާއި ސުކުނާއި ފިލިތައް އޮޅުންފިލުވައިދިނުމާއި ދިވެހިބަހުގެ ދަރަޖަތައް ބޭނުންކުރާ ގޮތް އޮޅުންފިލުވައިދިނުމާއި ރީތި ބަހުން އިބާރާތް ކުރާނެ ގޮތް ކިޔައިދިމުގެ އިތުރުން ތާނައިގައި ތިކި ޖަހައިގެން ލިޔަން ކިޔައިދިނުން ހިމެނެއެވެ.
މި ކޯސް މިއަދާއި މާދަމާ، ޖުމްލަ 10 ގަޑިއިރަށް ކުރިއަށް ގެންދަން ހަމަޖެހިފައިވާއިރު، މިއީ ޅައިމަގު ކައުންސިލުން އިސްނަގައިގެން ދިވެހިބަހުގެ އެކެޑަމީއާ ގުޅިގެން ކުރިއަށް ގެންދާ ކޯހެކެވެ.