ކުޅުދުއްފުށީ ސިޓީގައި އެ ސިޓީގެ ކައުންސިލުން ގާއިމުކޮށްފައިވާ ނޮލެޖު ސެންޓަރަށް ދިރާގުން އެހީތެރިކަން ފޯރުކޮށްދީފިއެވެ.
މި ނޮލެޖު ސެންޓަރަކީ މައުލޫމާތު ހޯދުމަށް އެހީތެރިވެ ދިނުމުގެ ގޮތުން ފޮތްކިޔުމާއި ކަންކަން ހިއްސާ ކުރުން ފަދަ ހަރަކާތްތަކަށް އެ ސިޓީ ކައުންސިލުން ގާއިމު ކުރި ތަނެކެވެ.
އެ ސެންޓަރަށް އެހީތެރިވުމުގެ ގޮތުން ދިރާގުގެ, ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގެ ދަށުން ވަނީ ކޮމްޕިއުޓަރު ސިސްޓަމްތަކަކާއި ވީޑިއޯ ކޮންފަރެންސް ބޭއްވޭ ޑިވައިސްތަކެއްގެ އިތުރުން ގިނަ އަދަދެއްގެ ފޮތް ހަދިޔާ ކޮށްފައެވެ.
މި ތަކެތި ހަދިޔާ ކުރުމުގެ މަގުސަދަކީ ޓެކްނޮލޮޖީއަށް އެކްސެސިބިލިޓީ އިތުރުކޮށް، އުނގެނުމަށް ލޯބި އުފެއްދުމާއި، ޢިލްމު ހިއްސާކުރުމާއި ޑިޖިޓަލް ލިޓްރޭސީގެ ސަގާފަތެއް އާލާކުރުމަށް މަގުފަހިކޮށްދިނުން ކަމަށް ދިރާގުން ބުނެއެވެ.
"އިލްމު އުނގެނުމުގެ މުހިންމު ހަބަކަށް ވެގެންދާނެ ނޮލެޖް ސެންޓަރަށް އެއްބާރުލުން ދިނުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް." ދިރާގުގެ މެނޭޖާ ކޯޕަރޭޓް ސޯޝަލް ރެސްޕޮންސިބިލިޓީ ބިޝާރާ ހަމީދު، ވިދާޅުވިއެވެ.
ދިރާގުގެ މެންބަރުންތަކެއް ގަސް އިންދުމުގައި ހަރަކާތްތެރިވަނީ:--- ފޮޓޯ/ ދިރާގު
މި ތަކެތި ހަދިޔާ ކުރުމުގެ އިތުރުން ދިރާގުގެ ޓީމުން ވަނީ އެ ސެންޓަރުގައި 100 ގަސް އިންދައި ދީފައެވެ. މިއީ އެ ސެންޓަރަކީ ފެހި, އަދި ތިމާވެއްޓާ ރައްޓެހި ތަނަކަށް ހެދުމުގެ މަގުސަދުގައި ކުރި ކަމެކެވެ.