ފިލްމީ ތަރިން ކަމަށްވާ ޝާހިދު ކަޕޫރު އަދި ބަތަލާ ޕޫޖާ ހެގްޅޭ މުހިއްމު ރޯލް ކުޅޭ އެކްޝަން ތުރިލަ ފިލްމު "ދޭވާ" ރިލީޒް ކުރުން އަވަސްކޮށްފިއެވެ.
މީގެ ކުރިން މި ފިލްމު ސިނަމާ ތަކަށް ގެންނަން ނިންމާފައި ވަނީ އަންނަ އަހަރުގެ ފެބްރުއަރީ މަހު ގިނަ ބަޔަކު ފާހަގަކުރާ ލޯބިވެރިންގެ ދުވަހާ ގުޅުވައިގެންނެވެ.
ނަމަވެސް ފިލްމަށް ބެލުންތެރިން އެހާ ދުވަސް ވަންދެން އިންތިޒާރު ކުރުވުމުގެ ބަދަލުގައި މި ފިލްމުގެ ޕްރޮޑަކްޝަން ކުންފުނިން ނިންމާފައި ވަނީ އަންނަ އަހަރުގެ ޖަނަވަރީ މަހުގެ 31ގައި ފިލްމު ސިނަމާ ތަކަށް ގެނައުމަށް ކަމަށް ރިޕޯޓުތައް ބުނެއެވެ.
ފިލްމު "ދޭވާ"ގެ ސެޓުގައި ޝާހިދު އާއި ޕޫޖާ ޕްރޮޑިއުސަރު ސިދާތު ރޯއިއާ އެކު--ފޮޓޯ/ޕިންކްވިލާ
މިދިޔަ އަހަރުގެ ކުރީކޮޅު މަސައްކަތް ފަށާފައިވާ މި ފިލްމުން ޝާހިދު ފެންނާނީ ދޭވާ ކިޔާ ފުލުސް އޮފިސަރެއްގެ ރޯލްއިންނެވެ. ސިދާތު ރޯއި ކަޕޫރު ޕްރޮޑިއުސްކޮށް ރޯޝަން އެންޑްރޫސް ޑައިރެކްޓްކުރާ މި ފިލްމަކީ ސިދާތުގެ ކުންފުނި ރޯއި ކަޕޫރު ފިލްމްސް އާއި ޒީ ސްޓޫޑިއޯސް ގުޅިގެން އުފައްދާ ފިލްމެކެވެ.
ބަތަލާ ޕޫޖާ އާއި ޝާހިދު ފުރަތަމަ ފަހަރަށް ސްކްރީނުން ފެންނާނެ މި އެކްޝަން ތުރިލާއަކީ އަންނަ އަހަރު ރިލީޒްކުރާ ފިލްމުތަކުގެ ތެރެއިން ވަރަށް އުއްމީދީ ފިލްމެކެވެ.
ޝާހިދު ކަޕޫރު އެންމެ ފަހުން ބެލުންތެރިންނަށް ފެނިފައި ވަނީ މި އަހަރު ރިލީޒްވި ފިލްމު "ތޭރީ ބަތޯ މެ އޭސަ އުލްޖާ ޖިއާ"އިންނެވެ. ޝާހިދުގެ އެކްޝަން ފިލްމެއް ސިނަމާތަކަށް މި އަންނަނީ އެކްޝަން ރޯލަކުން ޝާހިދު ނުފެންނަތާ އަހަރެއް ފަހުންނެވެ.