ދަރުމަވަންތަ ހޮސްޕިޓަލާ ދިމާ ބޭރު ތޮށި މޫދުން އަނިޔާވެފައި އޮއްވައި މިއަދު ފެނުނު މީހާ މަރުވެއްޖެއެވެ.
އެ މީހާ މަރުވިކަން ފުލުހުން ވަނީ "ސަން"އަށް ކަށަވަރުކޮށްދެއްވާފައެވެ. މިގޮތުން، އެމީހާ އަކީ 55 އަހަރުގެ ދިވެހި ފިރިހެނެއް ކަމަށާއި އިތުރު ތަފުސީލުތައް ހިއްސާކުރަމުންދާނެ ކަމަށް ފުލުހުން ވަނީ ބުނެފައެވެ.
ކުރިން ފުލުހުން ބުނީ، އެ މީހާ މޫދުން ނަގައިގެން އައިޖީއެމްއެޗަށް ގެންދިޔަ ކަަމަށެވެ.
އައިޖީއެމްއެޗާ ހަވާލާދީ ފުލުހުން ބުނީ، އަނިޔާވެފައި ވަނީ އޭނާގެ ބޮލަށް ކަމަށާއި ބެލެވެނީ ބޮލުގައި އުޅަނދަކުން ޖެހިފައިވާކަމަށެވެ.
މި މައްސަލަ ފުލުހުން ދަނީ ތަހުގީގުކުރަމުންނެވެ.
މި ހާދިސާގެ ވީޑިއޯތަކެއް "ސަން"އަށް ލިބިފައިވާއިރު، ވީޑިއޯއިން ފެންނަނީ އެމީހާ އަށިގަނޑަށް ލައިގެން ގެންދަން މަސައްކަތްކުރާ މަންޒަރެވެ. އެ ސަރަހައްދަށް އާންމުންގެ ގިނަ ބަޔަކު އެއްވެފައި ވާއިރު، އެމީހާ މޫދުން ނަގައިގެން ގެންދިއުމުގައި ގިނަ އަދަދެއްގެ މީހުން އެހީވާ މަންޒަރު ފެނެއެވެ.
މީގެ އިތުރުން އެމީހާ އަށިގަނޑުގައި ބާއްވާފައި އޮތްއިރު، ހަރަކާތް ކުރާތަން ވެސް ވީޑިއޯއިން ފެނެއެވެ.