އައްޑޫ ސިޓީ މަރަދޫ ފޭދޫއިން މީހަކު ވަގަށްނަގައިގެން ގެންގުޅުނު ކަމަށް ބެލެވޭ ކުރުނބާތަކެއް ފުލުހުން ހޯދައިފިއެވެ.
އައްޑޫ ސިޓީ ފުލުހުން ކޮށްފައިވާ ޕޯސްޓެއްގައި ބުނެފައި ވަނީ، މި ކުރުނބާތަކަކީ މިދިޔަ ބުރާސްފަތި ދުވަހު ފުލުހުން ރަށުތެރެ ޕެޓްރޯލުކުރަމުން ދަނިކޮށް، މަރަދޫ ފޭދޫއިން މީހަކު ބަރޮލަކަށް ލައިގެން ދަނިކޮށް ފެނުނު ތަކެތި ކަމަށެވެ.
އެ ކުރުނބާތަކަކީ ވަގަށް ނަގާފައިވާ ތަކެތި ކަމަށް ބެލެވޭތީ ކުރުނބާތަކާއި ބަރޯ އައްޑޫ ސިޓީ ގަން ޕޮލިސް ސްޓޭޝަނަށް ގެންގޮސްފަައި ވާކަމަށް ފުލުހުން ވަނީ ބުނެފައެވެ.
ފުލުހުން ވަނީ ބަރޮލާއި ކުރުނބާތަކުގެ ވެރިފަރާތުން، ސައުތު ޕޮލިސް ކޯލް ސެންޓަރު ނަމްބަރު 125 އަށް ގުޅައި އެތަކެތި ގެންދިއުމަށް އެދިފައެވެ.
އައްޑޫގައި މިފަދަ ކުދި ވައްކަންތައް ވަނީ މި ފަހަކަށް އައިސް ވަރަށް ބޮޑަށް އާންމުވެފައެވެ.
މީގެ ކުރިން ވަގަށް ނަގާފައިވާ ކެޔޮގަނޑުތަކާއި، ކުރުނބާ އިހާތަކުގެ ވެރި ފަރާތް ހޯދަން ވެސް އެކި ފަހަރު މަތިން އިއުލާނުކޮށްފައި ވާއިރު ވަގަށް ނެގި އޭސީއަކާއި، ވޯޓާ ޑިސްޕެންސަރެއްގެ އިތުރުން ދެ ސްޕީކަރު ހޯދަން ވެސް ވަނީ އިއުލާން ކޮށްފައެވެ.