ފެނަކަ ކޯޕަރޭޝަނަށް އޮޅިގެން ށ. ކޮމަންޑޫގެ ގެއަކަށް ހަތަރު ލައްކަ ރުފިޔާގެ ކަރަންޓު ބިލެއް ފޮނުވިއްޖެއެވެ.
ކޮމަންޑޫ ގެއަކަށް 412،648 ރުފިޔާގެ ކަރަންޓު ބިލެއް ފެނަކައިން ފޮނުވާފައިވާ ކަމަށް ބުނެ ސޯޝަލް މީޑިއާ ޕޯސްޓެއް އަންނަނީ ދައުރުކުރަމުންނެވެ.
އެކަމާ ގުޅުވައި ފެނަކައިން ކޮށްފައިވާ ޕޯސްޓެއްގައި ބުނީ، އެ ބިލަކީ އަލަށް އިންސްޓޯލްކުރި މީޓަރެއްގެ ރީޑިން ނެގުމުގައި ދިމާވި ކުށަކާ ގުޅިގެން ހެދުނު ބިލެއް ކަމަށެވެ.
މިގޮތުން، އެ ބިލުގެ މައްސަލަ ފާހަގަވެގެން ކަސްޓަމަރަށް ގުޅައިގެން ބިލު އިސްލާހުކޮށްފައިވާ ކަމަށް ފެނަކައިން ބުނެއެވެ. އަދި، ރަނގަޅު ބިލު މިހާރު އެގެއަށް ފޮނުވާފައިވާ ކަމަށް ވެސް އެ ޕޯސްޓުގައި ވަނީ ބުނެފައެވެ.
މި ފަހުން މަސް ނިމޭއިރު ކަރަންޓު ބިލުތައް ބޮޑުވާތީ، އެކަމުގެ ޝަކުވާތައް އާންމުން އަންނަނީ ކުރަމުންނެވެ.