ދިވެހި ރާއްޖެއިން ވިސާއާ ނުލައި ތަޖިކިސްތާނަށް ދެވޭ އެއްބަސްވުމެއްގައި މިއަދު ސޮއިކޮށްފިއެވެ.
ނިއުޔޯކްގައި މިއަދު ބޭއްވި ރަސްމިއްޔާތެއްގައި މިއެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ، އ.ދއަށް ރާއްޖެއިން ކަނޑައަޅުއްވާފައި ދާއިމީ މަންދޫބު ޑރ. އަލީ ނަސީރު މުޙައްމަދުއެވެ.
އަދި ތަޖިކިސްތާނު ސަރުކާރުގެ ފަރާތުން ސޮއިކުރެއްވީ، އ.ދ.އަށް ކަނޑައަޅުއްވާފައި ހުންްނަވާ ދާއިމީ މަންދޫބު ހިކްމަތު ޖޮނިބެކް އިސްމޮއިލްއެވެ.
ދިވެހިރާއްޖެއާއި ތަޖިކިސްތާނާ ދެމެދު ވިސާއާ ނުލައި ދަތުރުކުރެވޭ އެއްބަސްވުމެއްގައި ސޮއިކުރުމާއިއެކު، މިހާރުވެސް އަމަލުކުރަމުންދާ ޔުނިލެޓަރަލް ވިސާ ފްރީ ރެޖީމްގެ ދަށުން ވިސާއާއި ނުލާ 30 ދުވަހުގެ މުއްދަތަށް ދެޤައުމުގެ ރައްޔިތުން ދަތުރުކުރުމަށް އޮންނަ އުސޫލު ރަސްމީވާނެ ކަންވެސް ވަނީ ފާހަގަކޮށްފައެވެ.
މިމަހުގެ 15ވަނަ ދުވަހު ދިވެހިންގެ ތެރެއިން ޑިޕްލޮމެޓިކް އަދި އޮފިޝަލް ޕާސްޕޯޓު އޮންނަ ދިވެހިންނަށް ވިސާ ނެތި އަޒަރުބައިޖާނަށް ދަތުރުކުރެވޭ ގޮތަށް އެގައުމާއި ރާއްޖެއާ ދެމެދު ވެސް އެއްބަސްވުމެއްގައި ސޮއިކުރިއެވެ.
ދެހާސްތޭވީސްވަނަ އަހަރުގެ އެޕްރިލް މަހު ފޮރިން މިނިސްޓްރީން އާންމުކުރި ގޮތުގައި މިހާރު ރާއްޖެއިން 30އަށްވުރެ ގިނަ ގައުމަށް ވިސާއާ ނުލައި ދަތުރުކުރެވޭނެއެވެ.