ބޮލީވުޑްގެ އެންމެ މަގުބޫލު ދެމަފިރިން ކަމަށްވާ އަބީޝެކް ބައްޗަން އާއި އައިޝްވާރިއާ ވަކިވާން އުޅޭކަމުގެ އަޑުތައް ފެތުރެމުން އައި ނަމަވެސް އެ ޚަބަރުތަކަށް ބީރުކަންފަތެއް ދީ އަބީޝެކް މިވަނީ އަންހެނުން އައިޝްވާރިއާއަށް ވަރަށް ބޮޑަށް ތައުރީފުކޮށްފައެވެ.
އަލަތު ދަރިފުޅު އަރާދިއާ ލިބުމަށް ފަހުވެސް އައިޝްވާރިޔާއަށް ފިލްމު އިންޑަސްޓްރީން ގިނަ ފުރުސަތުތަކެއް ލިބުނު ނަމަވެސް ބަތަލާ ނިންމީ ދަރިފުޅުގެ ކަންކަން ކުރުމަށް ގޭގައި މަޑުކުރުމަށް ކަމަށާއި އޭގެ ބަދަލުގައި އަބީޝެކްއަށް އިންޑަސްޓްރީގައި މަސައްކަތް ކުރުމުގެ މަގުފަހިވި ކަމަށް އެކްޓަރު ވަނީ ބުނެފައެވެ.
ދާދިފަހުން ރިލީޒްވި ފިލްމު "އައި ވޯންޓް ޓު ޓޯކް"ގެ އެކްޓަރު ބުނިގޮތުގައި ކުދިންގެ ކަންކަމުގައި އަވަދިނެތި ގޭގައި ތިބޭ މަންމައިން އެވަނީ އަގުނުކުރެވޭ ފަދަ ގުރުބާނީއެކެވެ. އެކަނިމާއެކަނި ގޭގައި އިނދެގެން ކުދިންގެ ކަންކަން ކުރުމަކީ ފަސޭހަ ކަމެއް ނޫން ކަމަށާއި ހަމަ އެއާއެކު އާއިލާގެ ފިރިހެނުންނަށް މިނިވަންކަމާ އެކު މަސައްކަތް ކުރުމުގެ ފުރުސަތު މަގުފަހިކޮށްދިނުމުގެ އެންމެ ބޮޑު އާރުކާޓީންނަކީ ވެސް ގޭގައި ތިބޭ އަންހެނުން ކަމަށް އަބީޝެކް ވަނީ ބުނެފައެވެ.
އަބީޝެކް އަންހެނުން އައިޝްވާރިޔާ އަދި ދަރިފުޅު އަރާދިޔާއާ އެކު--ފޮޓޯ/ޕިންކްވިލާ
އަބީޝެކް ފިލްމު ސެޓުތަކުގައި އެއް ޤައުމުން އަނެއް ޤައުމަށް ދުރު ދަތުރުކުރަމުންދިޔަ ނަމަވެސް ދަރިފުޅުގެ ކަންކަން އައިޝްވާރިޔާ ފުރިހަމަކުރާނެ ކަމުގެ ޔަގީންކަން އޮންނަ ކަމަށާއި އެކަމަށް އަންހެނުންނަށް ހިތުގެ އެންމެ އަޑިން ޝުކުރުވެރިވާ ކަމަށް އަބީޝެކް ބުނެފައިވެއެވެ.
އަބީޝެކް ބޮޑުވަމުން އައިއިރު ގޭތެރެއިން ވެސް ފެނިފައިވަނީ ހަމަ އެއް މަންޒަރެއް ކަމަށާއި ބައްޕަ އަމީތާބް ނުފެނި އެތައް ހަފުތާއެއް ވޭތުވާ ފަހަރު ވެސް އަންނަ ކަމަށް ދަ ހިންދޫ ނޫހަށް ދިން އިންޓަވިއުގައި އަބީޝެކް ވަނީ ބުނެފައެވެ.
އައިޝްވާރިޔާ އާއި އަބީޝެކް ވަކިވާން އުޅޭކަމުގެ އަޑުތައް ދޭތެރެދޭތެރެއިން މީޑިއާއިން ފެންމަތި ކުރި ނަމަވެސް މިކަމާ ގުޅިގެން ދެ ތަރިންގެ ފަރާތުން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
މީގެ ދުވަސްކޮޅެއް ކުރިން މީޑިއާ ރިޕޯޓަރަކު މިކަމާ ގުޅިގެން ކުރި ސުވާލަށް ޖަވާބު ދެމުން އަބީޝެކް ބުނީ މީޑިއާތަކުން ބޭނުންވާ ގޮތަކަށް ޚަބަރުތައް ފަތުރަމުން އަންނަ ނަމަވެސް އޭނާއަކީ އަދިވެސް އައިޝްވާރިޔާގެ ފިރިމީހާ ކަމަށާއި އޭނާ ސިންގަލް ނޫން ކަމަށެވެ.