ތިލަފުށީގައި ކުނިން ހަކަތަ އުފައްދަން ގާއިމުކުރާ ޕްލާންޓުގެ މަސައްކަތް ނިންމައި، 2027 ވަނަ އަހަރުގެ ތެރޭގައި އޭގެ މަސައްކަތް ފެށޭނެ ކަމަށް އެންވަޔަރަމަންޓް މިނިސްޓްރީން ބުނެފިއެވެ.
މިދިޔަ ސަރުކާރުގައި ވަނީ ތިލަފުށީގައި ކުނިން ހަކަތަ އުފައްދާ ޕްލާންޓެއް ގާއިމުކުރުމުގެ އަމަލީ މަސައްކަތް ފަށައިފައެވެ. މި މަޝްރޫއަކީ 2.3 ބިލިއަން ރުފިޔާގެ މަޝްރޫއެކެވެ.
އެ މަޝްރޫއާ ގުޅުވައި އެންވަޔަރަމެންޓް މިނިސްޓަރުގެ ނައިބު އަހުމަދު ނިޒާމް ޕީއެސްއެމްގެ ރާއްޖެ މިއަދު ޕްރޮގްރާމުގައި ވިދާޅުވީ، ރާއްޖޭގައި އެންމެ ގިނައިން ކުނި އުފެދޭ ސަރަހައްދަކަށް ވާނީ މާލެ ސަރަހައްދު ކަމަށާއި ވަރަށް އިސްކަންދީގެން ޒަމާނީ ފެންވަރުގައި ކުނި މެނޭޖުކުރުމުގެ ސިސްޓަމެއް ގާއިމުކުރުމަށް މަސައްކަތް ކުރާ ކަމަށެވެ.
ތިލަފުށީގައި ހެދިފައިވާ ކުނި ފަރުބަދަ: ޕްލާންޓުގެ މަސައްކަތް ނިންމައި، 2027ގައި ތިލަފުށީގައި ކުނިން ހަކަތަ އުފައްދަން ފަށަނީ -- ސަން ފޮޓޯ/ މުހައްމަދު ހައްޔާން
މިގޮތުން، 2027 ފެށެން ވާއިރަށް ތިލަފުށީގައި ކުރިއަށްދާ މަޝްރޫއު ނިންމާލެވޭނެ ކަމަށް އުއްމީދު ކުރާ ކަމަށް ނާޒިމް ވަނީ ވިދާޅުވެފައެވެ.
މިހާރު މިއޮތް ގޮތަށް މަސައްކަތް އިތުރު ކަމެއް ދިމާނުވެ ދާ ކަމަށްވަންޏާ 2026ގެ ނިޔަލަށް ނިމި، 2027ގައި ހަމަ [މާލެ] މި ސަރަހައްދުގައި ހަމަ ކުނިން ހަކަތަ އުފައްދަން ފެށިގެންދާނެ
ނާޒިމް ވިދާޅުވި ގޮތުގައި ތިލަފުށީގައި ގާއިމުކުރަނީ ދުވާލަކަށް 250 ޓަނު އަންދައި، އިންސެނެރޭޓުކޮށްގެން ހަކަތަ އުފައްދާނެ ދެ ޕްލާންޓެކެވެ. އެ ޕްލާންޓުތަކުން 13 ނުވަތަ 14 ވަރަކަށް މެގަވޯޓުގެ ކަރަންޓު އުފެއްދޭނެ ކަމަށް އޭނާ ވަނީ ލަފާކުރައްވާފައެވެ.
ކުރިން ކުނި މެނޭޖުކުރުމުގެ މަސައްކަތް ކުރަމުން އައި ގޮތާ އަޅައިބަލާއިރު، މިހާރު ބޮޑެތި ކުރިއެރުންތަކެއް ހޯދިފައި ހުރިކަން އޭނާ ވަނީ ފާހަގަކުރައްވާފައެވެ. އެގޮތުން، ތިލަފުށިން މިހާރު ކުނި ނާންދާ ކަމަށާއި ވެމްކޯއިން ކުނި މެނޭޖުކުރަމުން ދަނީ ވަކި ތަރުތީބަކުން އެކަމުގެ ތަޖުރިބާ ހުރި ބޭފުޅުން ކަމަށް ވަނީ ވިދާޅުވެފައެވެ.
ރާއްޖޭގައި އިއާދަކުރަނިވި ހަކަތައިން 33 ޕަސެންޓު ކަރަންޓު އެފެއްދުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އެ ވަރަށް ކަރަންޓު އުފައްދަން 1.3 ބިލިއަން ޑޮލަރު ބޭނުންވާ ކަމަށާއި އޭގެތެރެއިން މިހާތަނަށް ހިލޭ އެހީއަށް ހަމަޖެހުނީ 13 ޕަސެންޓު ކަމަށް މަރުކަޒީ ބޭންކް، (އެމްއެމްއޭ)ގެ ގަވަރުނަރު އަހުމަދު މުނައްވަރު މީގެކުރިން ވަނީ ވިދާޅުވެފައެވެ.